第13节，民众欢喜聚集tī耶稣身边听伊ê教导，kah第四章1到2节、第五章21节、第六章34节、第十章1节等等记载仝款。

抽税ê人，耶稣时代ê犹太人kā chit种工作者看做是「罪人」á是「pháiⁿ人」（参考路加福音十九：7），因为这是teh替罗马帝国徵税，犹太人当然无欢喜chit种人，mā因为in ê工作是kah罗马人常做伙，因为án-ne，mā被看做是「无清气」ê人，in无法度参与会堂、圣殿ê敬拜，甚至无法度上法庭当证人。

「来跟tòe我」，耶稣呼召利未kah呼召彼得、安得烈，以及雅各kah约翰等门徒所用仝款。注意，耶稣所用ê lóng是命令语句。

注意第17节，chit节mā是诠释耶稣到世间来工作siōng明确ê一节。「健康」kah「有病ê人」、「好人」kah「pháiⁿ人」对比。甚么人chiah需要上帝ê救恩？mā thang问讲是甚么人需要医生？这是耶稣提出来beh hō͘经学教师kah法利赛人去省思ê功课。