Tī前三章lóng是kah烧化祭ê礼仪有关，烧化祭表明出来ê主要意义，就是kah上帝有亲密结连ê关系。

Tùi第四章到第五章13节，lóng是关系赎罪祭ê条例。赎罪祭teh表达祈求上帝ê赦免kah赦免。虽然有一种讲法认为chit种祭，真可能是比较晚期chiah出现ê，特别是可能tī被掠到外国去了后，用chit种祭来表达认罪，祈求上帝怜悯。M̄-koh chit种讲法并无完全被接受。因为在列王纪下第十二章16节，就有提起赎罪祭kah赎过祭ê事，chit时in iáu未被掠到他国做奴隶。

后来tùi chit-ê赎罪祭发展出「赎罪日」（参考十六：29-34），是全国性ê节日，每年举行一pái，同时举行禁食，并且停止一切ê工作，包括外侨在内，lóng一定tio̍h举行遵守。换句话讲，献赎罪祭ê时，心情是严肃ê，bē-tàng带有一丝á欢乐ê气氛。

Chit段经文是谈论因为疏忽á需要用献赎罪祭来表明忏悔，恳求上帝赦免ê祭。

第1到2节，这是tùi上帝来ê命令，对hiah-ê「无意中犯了罪，违反了上主ê禁令」者，就需要献赎罪祭，表示承认错误，用此来表明悔改。这表示是无意中犯罪，m̄是明知故犯ê罪。

第3到4节，chia讲tio̍h大祭司犯罪连累了人民，就需要「献一头无残缺ê小公牛」当做赎罪祭。这是因为大祭司身分高，影响kui个族群。因为án-ne，伊献赎罪祭，mā teh表示kui个族群共同犯罪仝款。

第5到7节，chit三节讲tio̍h宰杀小公牛ê时，所流出来ê血作三种仪式：一是大祭司tio̍h用chéng头á ùn血，然后tī圣幕内面ê帐帷前hiù七pái。这七pái mā表示完全洁净ê意思。因为大祭司犯罪，伊进入圣所就是污秽了圣所。二是用血抹tī圣幕里ê香坛凸出ê四角，这是洁净香坛，此香坛是上帝kah他ê子民会面ê所在。因为大祭司犯罪，致使这香坛mā被污秽了，需要洁净。三是另外ài kā chhun落来ê血倒tī圣幕门口献烧化祭ê座上，表示chit-ê祭坛因为大祭司犯罪，mā遭污秽à。chit-má因献小公牛ê血会得thang洁净。

第8到12节，chia规定内脏除了肠á，lóng tio̍h烧献外，其它包括皮、肠á、肉、头、腿等，lóng tio̍h带到营外倒灰ê所在烧hō͘伊成灰，表示所犯ê罪藉tio̍h chit只小公牛ê烧献，á化做乌有。