Chit章讲tio̍h有关产妇ê洁净问题。早期社会对tī妇女生kiáⁿ ê事感觉有神秘感，真可能kah当时gín-á ê死亡率真koân有密切关系。因为án-ne，总会有一kóa规律、要求，好hō͘产妇tī该段时间内kah一般人区隔出来，免得因为婴á受tio̍h不必要ê感染发生意外。表面上看起来，kah-ná teh生男育女ê事顶面有「不平等」ê规定――生男ê，总共歇困四十工；生女ê，共歇困八十工，这提供了一个信息：男婴比女婴壮。Koh讲，因为男婴出世后第八工tio̍h接受割礼，因为án-ne，第八工就洁净à。

Tī chit段所谓「无清气」ê时间内，不准夫妇有性行为发生，若无连丈夫mā变成无清气。Án-ne，对产妇确实是真大ê帮助，thang达tio̍h充分ê歇困。

Chit段经文是关系生男女婴á ê产妇，需要保持洁净ê规定。

第1到4节，chia讲产妇生男婴，只有七工无清气，因为第八工，男婴就一定tio̍h接受割礼（参考创世记十七：12），á割礼表示圣洁，是kah神圣ê上帝立约之记号。因为án-ne，割礼了后，男婴就属tī圣洁ê子民。M̄-koh为tio̍h产妇ê安全，一定tio̍h chiah koh等三十三工，等流血停止了，chiah算洁净。

第5节，若生女婴，无清气时间加出男婴一倍，有十四工。而且tio̍h等六十六天，mā是比生男婴加出一倍ê时间，是属tī无清气。

会有chit种差别，真可能对男女之间ê认知有关，mā可能是因为女婴后来会有月经，需要koh khah chē歇困。M̄-koh thang看出hō͘ in临盆ê妇女有koh khah chē歇困时间，对in ê复原是有好处。