Tùi第7节开始，直到第十六章31节，chit段篇幅lóng是记载有关士师ê事。

Chit段经文绍介第一位士师—俄陀聂。伊是迦勒ê小弟基纳斯ê kiáⁿ（第9节）。Chit位迦勒，就是tī摩西时代，tùi每一个支派中派出一位领袖进入迦南地去侦测实况ê代表之一，是犹大支派耶孚尼ê kiáⁿ（参考民数记十三：8）。伊kah约书亚两个人lóng主张应该进入迦南地m̄免惊惶，以色列人民有能力征服迦南地ê居民。M̄-koh其他ê代表lóng表示bē-tàng行，认为迦南人强大硕壮，根本phah不赢。结果上帝受气，只有hō͘迦勒kah约书亚kah hiah-ê年纪未满二十岁以上ê以色列人民进入迦南应允之地（参考民数记十四：26—30）。

第7到8节，chit两节ē-sái讲是士师出现ê固定句型。是因为以色列人民背叛上帝去拜偶像神明，惹起上帝愤怒，而hō͘外族人来侵犯以色列人民。上帝是用chit种方式tī惩罚，mā是一种教导以色列人民一定tio̍h对上帝忠实ê方式。

Chia提起统治以色列人民ê是「古珊、利萨田王」，这是甚么人？真oh清楚，不过chit-ê名ê意思是teh指「双倍恶毒ê古珊」ê意思。Án-ne thang理解弃sak上帝ê结果，就是加倍痛苦。以色列人民tī chit王之统治下，痛苦生活了八年之久。

第9到11节，俄陀聂是上帝差派hō͘以色列人民ê第一位士师，上帝差派伊，上帝ê灵充满伊，hō͘伊thang每pái出征lóng phah赢。因为án-ne，伊带领以色列人民长到四十年，保持太平，直到伊往生为止。