Tùi chit章开始，士师记作者一一绍介上帝赏赐hō͘以色列人民有士师带领in，这mā是tùi约书亚了后，进入士师ê时代，然后chiah有先知运动出现。Tī这章经文中，作者先绍介两位士师，一是俄陀聂（第7到11节），二是用笏（第12到31节）。会有士师出现，lóng有一个基本前提，就是以色列人民得罪上帝，去拜偶像神明，上帝受气，允准外族人来欺负in，in chiah Tī痛苦中祈求上帝怜悯赦免。就án-ne上帝差派士师去带领in抵抗外族侵略。Chit种情况重复出现，mā说明以色列人民对上帝ê忠实度非常低，这mā反映出每一个时代ê信徒mā差不多是án-ne，值得反省。

Chit段经文真清楚记载tī迦南地里，约书亚kah以色列人民并无kā迦南人全部消灭，而且留落来bē少迦南地ê原住民，chiah-ê原住民留落来，mā提供了几则重要ê伏笔：一是以色列人民结局ná亲像上帝对摩西所讲ê，in会背叛上帝，去拜偶像神明（参考申命记三十一：16—18、三十二：5—6、15—18）。二是hō͘以色列人民有机会继续学习战事。

第1到2节，chit两节说明tī迦南地iáu留落来真chē原住民，上帝用chit种方式训练以色列人民ê新生代学会晓战事。因为以色列人民是小国，四面lóng是强猛ê国家，学会晓战事mā是一种生存之道。M̄-koh teh发展军事ê同时，一定tio̍h谨记一件事：一个国家、民族，á是一个人ê生存，是beh óa靠上帝，án-ne chiah是性命ê生存之道（参考诗篇三十三：16—19）。

第3节、第5节，chit两节lóng记落来了留tī迦南地ê族群，有非利士人ê五个城市，包括有：亚实突、亚实基伦、迦萨、迦特，kah以革伦等。另外在迦南地iáu有：迦南人、赫人、亚摩利人、比利洗人、希未人，kah耶布斯人等。

第4节、第6节，chit两节提起上帝hō͘ chiah-ê民族留tī迦南地，一直成做以色列人民警惕ê对象，主要是希望以色列人民ē-tàng对上帝忠实，ná亲像in ê祖先顺服上帝仝款。可惜ê是后来以色列人民是kah chiah-ê人通婚，拜in ê神明。