士师记 17章1节 到 17章6节   背景资料  上一笔  下一笔
Tùi第十七章到第廿一章,是士师记ê结尾部分。这部分是用两个故事串连起来,其一是tùi第十七到十八章,叙述tī米迦ê厝里发生ê故事,其二是tùi第十九章到廿一章,叙述发生tī一个利未人身上惨痛ê事件而引发ê以色列人民内战――联合攻打便雅悯族人。虽然是两个事件,却有仝一个主题:tī「hit时,以色列无君王」,然后附加一句形容社会景象ê话是「人人tòe家己ê意思做tāi-chì」(参考十七:6、十八:1、十九:1、廿一:25)。比较特别ê是tī chit五章中,都无koh再提起头前所重视ê「士师」角色人物。然后koh再紧接落去ê撒母耳记就提起以色列人民向先知撒母耳要求膏立国王统治in(参考撒母耳记上八:5、19),chiah-ê充分表示出以色列人民tī迦南地生活了一段时间了后,受tio̍h迦南文化ê影响真深。

Chit段经文讲tio̍h有一个人名叫米迦,意思就是「甚么人亲像上帝」?换句话讲,无人知影上帝是甚么款ê。后来米迦ê老母ài人「铸造」一座上帝ê神像来膜拜,这mā表示in bē记得十诫ê第二诫-bē-tàng为上帝铸造任何偶像-chit-ê诫命(参考出埃及记二十:4)。这mā说明以色列人民tī信仰上堕落ê情况已经非常严重à。

第1到2节,chia绍介tòa tī以法莲山区ê米迦,伊偷老母ê钱。M̄-koh当伊听tio̍h老母诅咒偷钱ê人,因为án-ne,非常惊惶,就赶紧招认家己就是ná偷钱ê盗贼。Á米迦ê老母为tio̍h beh「抵销」家己所发出ê咒言,赶紧改用祝福ê话,讲hit笔钱beh奉献hō͘上帝,希望用chit种方式来消除kiáⁿ米迦可能因为án-ne而带来ê厄运,因为当时ê人深信人诅咒ê誓言必定会实现。

而有趣味ê是米迦偷老母ê钱是「一千一百块银á」,这数目tú好是非利士人o͘-se参孙爱上ê cha-bó͘人黛利拉ê金额,(参考士师记十六:5),in ài伊为tio̍h钱出卖参孙。因为án-ne,chia用「一千一百块银á」当做这事件ê开始,kah-ná mā teh隐喻这m̄是一件好事,却是kah出卖性命有关ê事。

第3到4节,米迦ê老母知影家己kiáⁿ偷钱却hō͘家己诅咒ê时,赶要紧伊ê kiáⁿ米迦the̍h钱去请师傅铸造一座木头偶像,外面用银á包裹起来,kā chit座木头偶像放厝里膜拜。Chit种情形ná亲像基甸后来tī家己ê家乡铸造一座偶像,致使以色列人民弃sak上帝去膜拜ná偶像(参考八:24—27)。
Chiah-ê lóng tī说明以色列人民确实是真迦南化了,弃sak了上帝jú来jú遥远。因为连siōng基本mā是siōng重要ê十诫lóng会bē记得,其他关系摩西律法规定ê生活规律就koh khah免讲à。

第5到6节,chia讲米迦koh替chit座神像穿上「以弗得」,iáu指定家己ê一个kiáⁿ作祭司,换句话讲,伊等于tī厝里开一个神坛仝款,án-ne,hō͘人去伊ê厝膜拜,而且tùi第十八章14节、17节等等koh khah清楚看tio̍h,后来in-tau中ê偶像神明jú来jú chē尊了,可见问题ê严重性。士师记作者会tī第6节讲大家lóng跟tòe家己ê意念去做tāi-chì,差不多是已经kā上帝bē记得kah chheng-khì-liu-liu了,可见当时以色列人民已经败坏到极点à。

重新查询 专卷研经 士师记系列
错误回报,请联系comm[@]fhl.net