士师记 1章1节 到 1章10节   背景资料  下一笔
Tùi第一章到第二章5节,ē-sái讲是后来圣经作者记录以色列人民teh进入迦南地了后,攻城掠地ê概况。资料并无完全,m̄-koh,却是早期ê史料,对认bat以色列人民进攻迦南地经过ê认bat有帮助。因为chit段经文thang补足约书亚记tī记载上ê欠缺。Thang án-ne讲,约书亚记kā重点khǹg-tī北方ê战事记录,而士师记chit段则偏重tī南方ê记事。

Ná亲像约书亚记一起头就写ê「上主ê奴仆摩西死后」,chit本士师记一起头mā是写tio̍h「约书亚死后」,然后开始叙述有关以色列人民活动ê情形。Tī无领袖ê带领下,出埃及后ê以色列人民,第一pái经验到无如摩西、约书亚chit种领导者帮in请示上帝ê旨意,mā无人来带领in行正确ê道路。

第1到2节,tùi第1节就真清楚看出,以色列人民进入迦南地后,并无赶走迦南人,并无亲像约书亚记hit种,讲lóng kā迦南地所有土地kah民族lóng攻取并统治à。Chia讲直到约书亚往生ê时,迦南人iáu是无被降服。因为án-ne,in继续beh征服kui片迦南地,chit-má iáu有迦南人khiā起ê所在iáu未攻取落来。In问上帝ê旨意,上帝beh犹大支族tāi先去攻打,上帝会帮助in。

第3到7节,犹大kah西缅是仝款是雅各kah利亚生ê gín-á,西缅是雅各ê第二kiáⁿ,犹大是第四个kiáⁿ。M̄-koh后来ê发展是犹大兴旺,西缅衰微到落尾并入了犹大支派。犹大支族邀请西缅支族加入in ê行伍,准备去进攻迦南人ê区域。In攻取迦南kah比利洗人ê区域。Chit位比色城ê王「亚多尼・比色」,家己承认上帝用chit种报应ê方式来惩罚伊,因为伊过去bat砍过「七十个王」脚手ê大头拇,chit-má伊因为战败而被俘虏,受tio̍h ê待遇mā是仝款,被犹大kah西缅两支族ê联军kā伊脚手ê拇指砍掉。古代中东地区会用chit种方式来惩罚对敌ê军事领袖,hō͘ in无法度koh再继续领军作战。Chit位亚多尼・比色王后来就死tī耶路撒冷。

Chit段经文是关系犹大征服耶路撒冷ê记事。

第8节,chia讲犹大攻打耶路撒冷,并且占领了hit-ê城。虽然是phah赢了,m̄-koh实际上当时hit-ê城iáu未被以色列人占领,chit点tùi第一章21节就ē-tàng看出来。后来是到à大卫时代chiah攻落hit-ê城(参考撒母耳记下五:6—10),并且建造hit-ê城成做以色列帝国ê首府。

第9到10节,chia讲tio̍h犹大继续去攻打附近ê部落,包括有:希伯仑(大卫bat tī chia继位为以色列ê王长到七年,参考撒母耳记下五:5)、示筛、亚希幔,kah挞买族ê人等。

重新查询 专卷研经 士师记系列
错误回报,请联系comm[@]fhl.net