Chit三节是分配土地后ê总结论，其实在约书亚ê时代并无ná亲像第43节所讲ê，完全占领所有ê迦南地，却是iáu有一部分ê土地iáu-koh是tī迦南人ê手中（参考十三：1—7）。士师记第一章起头就清楚记载，讲犹大支族koh继续去攻打迦南人。

Chit段经文siōng主要tī第45节所讲ê，上帝乃是坚持守约ê上帝。M̄-koh，这mā一定tio̍h有相对条件来配合，he就是以色列人民mā坚持遵守kah上帝所立ê约，若无，就无法度实现第44节所讲ê「上主赐hō͘ in全境太平，tú亲像伊对in ê祖先所应允ê」chit句话，像接落去ê士师记第二章第7节就是án-ne讲：「约书亚tī-.teh ê 日，kah 约书亚死了后hiah-ê看tio̍h 上主为以色列人所行大事ê 长老iáu tī-.teh ê 时，人民服事上主(全民版)」 m̄-koh，「Hit 代ê 人lóng死亡了后，koh 一代ê 人兴起，m̄ 知上主，mā m̄ 知他为以色列人所行ê tāichì。以色列人行上主看做pháiⁿ ê tāichì，去服事巴力，弃sak in 祖先ê 上帝—上主，就是chhōa in 出埃及地ê，去tòe 别ê 神明，就是四箍围hiah-ê 人民ê 神明，kā in 跪拜， 来惹上主ê 大受气。In mā 弃sak 上主，去服事巴力kah 亚斯她录(全民版)」（士师记二：10―13）án-ne，in所得tio̍h ê就m̄是「全境太平」，却是变成：「上主受气以色列ê人，kā in 交tī 抢掠in ê 人ê 手，in 就kā in 抢，他 koh kā in 卖 hō͘ 四箍围对敌ê 手，致使in tī 对敌ê 头前无koh khiā会tiâu。 In 无论去tó 位，上主就伸手降灾祸 hō͘ in，照上主所讲 ê 话，koh 照上主对in所chiù-chōa ê，in就非常困苦。(全民版)」（士师记二：14―15）