Chit章是延续第十章，主要teh说明迦南地各部落、郡主、城邦ê王，in一听tio̍h以色列军队势如破竹般直捣迦南地南部ê各区域，chit-má换做迦南地北部各地ê真chē部落、族群、郡主、城邦lóng整装联合koh khah chē ê军队，为tio̍h是beh希望ē-tàng将以色列ê势力驱逐出去，m̄-koh结果ná亲像南部ê族群仝款，iáu是hō͘约书亚带领ê以色列军队hō͘击溃。

南方ê部落是由耶路撒冷王带头，chit-má北方ê是由夏琐王耶宾带头，传话hō͘其他部落领袖，包括玛顿王约巴、伸仑王、押soah王，以及北边山区、加利利湖南边ê约旦谷、丘陵地带kah多珥附近沿海一带诸王等，这表示夏琐王ê影响力非常大，甚至iáu召集南部一kóa iáu未降服tī以色列ê地区部落，大家lóng相联系集合起来，beh攻打以色列。作者用in「人数加得tio̍h像海滩上ê沙粒。In拥有真chē马匹kah战车」，tio̍h kah以色列人作战。

第1到5节，真清楚将北部联军kah南部几个部落ê军队连结，主要攻打ê对象，就是以色列ê军队。其实，这mā是迦南人ê保卫战，联盟共同出击，mā表示in彼此ê利害相关连。当区域发生危险ê时，无任何一个部落、族群ē-tàng置身度外。

第6节，是kui章ê中心经文，主要teh说明无论对敌以色列ê军队有jōa-ni̍h-á精锐，á是人数jōa-ni̍h-á庞大，只要有上帝kah以色列军队同在，in lóng m̄免惊惶，因为真正teh相刣ê，m̄是以色列军队，是上帝亲自为以色列人战争，无人甚么人ē-tàng抵挡得了上帝。

第7到9节，chit段讲述约书亚带领以色列人ê军队攻落了北到米斯利弗・玛音kah西顿，东到米斯巴谷，直到kā敌人击退并且刣了了为止。约书亚lóng是照上帝hō͘伊ê指示去做。

第10到11节，将北部kah东部ê顶面所讲chiah-ê族群、部落攻陷了后，约书亚率军转向tńg来攻打北部地区siōng强大ê夏琐国，mā是仝款彻底毁灭hit-ê城，kah人民。

第12到14节，thang看出作者ê主要目的，就是beh说明约书亚像摩西仝款，只要是上主所命令ê事，伊lóng遵照去行。Tio̍h注意ê，是chia特别提起北部地区ê城市，除了夏琐被彻底毁灭外，其余都无，m̄-koh以色列人洗劫了城内所有ê财物并刣了了城内所有ê人民。

第15节，chit节koh一pái强调约书亚kah摩西仝款，lóng是上帝忠仆，只要上帝ê命令，约书亚像摩西，lóng一一遵照án-ne去做。