约书亚记 10章1节 到 10章14节   背景资料  上一笔  下一笔
Chit章主要记载基遍人kah以色列人签订合约,并且成做以色列人ê附庸国,致使迦南地各城邦、族群等国王lóng紧张起来,加上基遍原本就kah耶路撒冷等郡王无密切ê关系,就án-ne耶路撒冷王就决定联合其他城邦郡主攻打基遍。Koh讲,因为基遍tú好是阻挡以色列军队南下ê屏障,是国防ê重要位置,因为án-ne,chiah-ê族群会联合来攻打基遍,mā是teh为家己ê安全作考虑。Á以色列既然成做基遍ê宗主国,就有责任保护基遍ê安全,因为án-ne,当chiah-ê邦城联合起来攻打基遍ê时,基遍王随时请求约书亚出兵援助,约书亚马上派大军去攻打亚摩利人ê联军。

Chit段经文记载耶路撒冷王亚多尼・洗德联合希伯伦、耶末、拉吉,kah伊矶伦等五个亚摩利王联合起来进攻基遍。其实,chit种政策mā是耶路撒冷王teh对迦南地ê族群宣告:甚么人kah以色列人合作,结果就会kah基遍ê遭遇仝款。是一种警告ê方式。

第1到5节,chia特别提起约书亚m̄-nā彻底毁灭了艾城,而且将hit-ê城ê国王刣死,chit种消息传到迦南地各地区,必定会引起所有郡主、城邦领袖lóng大tio̍h惊、惊惶起来。特别是艾城位居险要ê地理位置,而且大城,lóng会被以色列人攻取落来,耶路撒冷koh khah是位居山丘,无容易攻落ê城堡,ná亲像后来hit-ê城ê耶布斯人放话hō͘ beh带兵攻打hit-ê城ê大卫讲ê:「你若无除chiah-ê chheⁿ-mê-.êkah 跛脚ê,就bē-tàng 入来chit 所在。(全民版)」(撒母耳记下五:6)不过看tio̍h基遍降服tī以色列人,而且成做附庸国家,就án-ne决定联合所有亚摩利人所khiā起ê顶面所讲chiah-ê城ê王,先围攻基遍,in认为只要ē-tàng将基遍攻打落来,就算以色列人想beh继续进攻其他城镇,mā难。

第6节,因为前一章有提起基遍人顺服以色列,并且订立了和平条约,表示基遍愿意成做以色列ê附庸,所以基遍人就派人去传话hō͘约书亚,kā伊讲所有亚摩利人联合起来攻打基遍,请求约书亚派兵来救援、帮助基遍。

第7到8节,约书亚派出大军,而且精锐部队前去救援,上帝mā藉chit-ê机会koh一pái kā约书亚讲,ài伊m̄免惊惶,上帝会kah以色列ê军队同在。这mā表示chit场战争,会是上帝带领以色列人征战。

第9到11节,真清楚说明是上帝亲自出手打击亚摩利人,他tùi天顶降落冰雹,hō͘亚摩利人无法度逃脱以色列军队ê突击。另外一方面mā说明约书亚确实是一个聪明koh守约ê领导者,趁半暝率军队进攻围困基遍ê亚摩利人。速度之快超出亚摩利人ê想像,mā因为án-ne,一听tio̍h以色列军队来到,亚摩利人就惊到m̄敢迎战而想beh逃离,上帝降落冰雹阻挡,结果士兵死伤惨重,单是hō͘冰雹phah死ê人,就比以色列军队koh khah chē。

第12到15节,mā是旧约圣经中非常奇特ê一段记事,chia提起约书亚向上帝祈祷,hō͘日头kah月娘lóng停止bē振动,直到以色列军队phah败仇敌亚摩利人。上帝因为应允chit pái ê战争,而且上帝mā亲自phah亚摩利人。所以,上帝听约书亚ê祈祷,日头kah月娘lóng是上帝所创造,因为án-ne,lóng听从了上帝ê命令,直到约书亚带领ê以色列军队战胜为止。Chit种祈祷天象改变ê记事,mā发生tī先知以利亚ê身上,伊祈求上帝mài落雨,mā不降甘露,长到三年ê时间,致使大地饥荒(列王记上十七:1-7、十八:1),说明ê是,如果是出tī上主ê旨意,就是天顶ê星辰mā会听从。亲像摩西tī埃及国王面前所引发出来ê各种灾难就是一个例证。

约书亚ê chit首诗歌,记载tī「雅soah珥册」上,另外,撒母耳记下第一章19到27节是一首大卫王为扫罗kah约拿单写ê挽歌,mā记载tī「雅soah珥册」上,这是一本记载「以色列战史」ê史册,m̄-koh并无编入圣经正典中。

作者强调一件事,并m̄是以色列军队精锐thang退敌,却是:「上帝为以色列征战!」chiah hō͘敌军因为听tio̍h ài面对以色列军队就惊惶失措,溃to̍h bē-sái得军。另外一方面,这mā是teh表示约书亚kah摩西仝款,in lóng是上帝ê忠仆,in ê祈祷,上帝lóng会垂听。

Chit段经文mā带来一个重要ê信息:日头、月娘,chit两种星体是迦南人所崇拜ê神明,in mā听从上帝ê指挥,这mā teh表示chit两种星辰lóng m̄是神明,lóng是上帝所创造ê万物之一,所有受造物lóng会听从上帝ê命令。只有创造万物ê上帝chiah是真正神。

重新查询 专卷研经 约书亚记系列
错误回报,请联系comm[@]fhl.net