约伯记 33章23节 到 33章33节   背景资料  上一笔  下一笔
Tī前段讲述上帝ê启示,为tio̍h是beh hō͘人明白他ê旨意,希望透过chit种方式,hō͘人知影chhōe-tio̍h上帝拯救ê道路。Tī chit段经文中以利户进一步提起,天使mā会帮人tī上帝面前讲好话,为tio̍h是beh hō͘人免受刑罚。M̄-koh先决条件是人一定tio̍h知影认罪、悔改,若无,天使mā oh得开嘴。

第23到24节,以利户讲tī上帝ê身边有数算不尽ê天使,m̄-koh有一位「中介者」,thang帮助人行正确ê道路,做「所该尽ê本份」。以利户会án-ne讲,是因为约伯一再期待有一个中介者,thang hō͘伊kah上帝之间,有一个媒介(参考九:32—35、十六:19、21、十九:25)。以利户讲,chit位人kah上帝之间ê媒介天使,会向上帝陈情,请求上帝赦免「怜悯」,hō͘人m̄免被判刑而下「深坑」。

第25到26节,以利户认为,只要向上帝祈祷,约伯身上ê疾病一定会得tio̍h医,hō͘伊thang像以前hit种,以「愉快ê心敬拜上帝」。

第27到28节,m̄-koh祈求上帝医,siōng基本ê要件,就是承认家己「有罪」。以利户其实是teh指责约伯一直m̄承认家己有罪,而且一再否认家己犯罪,是上帝「故意」kā苦难加tī伊身上。因为án-ne,即使天使想beh替伊向上帝参详拜托mā难。Taⁿ,siōng重要ê,就是beh约伯真心祈祷,悔改认罪,上帝一定会赦免伊所犯ê罪。chiah ē-tàng免tī「坠入死亡ê深坑」。以利户是teh警告约伯,伊若m̄知真心悔改,向上帝祈求,一定无法度tùi死亡中被救赎。

第29到30节,chit两节mā是chit段经文ê结语。以利户讲上帝「接二连三」地做拯救ê工作,因为他是慈疼上帝,他只希望ē-tàng救人脱离「死亡ê深坑」,thang hō͘人ē-tàng「享受性命ê亮光」。因为án-ne,上帝施行拯救工作ê方式,就是差遣「天使」当「中介者」来帮助人。

第31到33节,以利户希望约伯ē-tàng kā伊所讲ê话听入去。以利户ài约伯「安静」落来,意思是ài约伯mài抢beh做答,tio̍h慢慢思考所听tio̍h ê话。因为约伯chìn前lóng会抢话提出辩解,chit-má以利户mā希望约伯稍安勿躁,先「安静」一下。伊并且对约伯表示只要伊讲得有道理,伊一定会「承认」约伯所讲ê「理直」。相对ê,若是约伯「m̄讲」,án-ne,伊就beh继续讲落去。伊表示beh kā「智慧」教授hō͘约伯。

重新查询 专卷研经 约伯记系列
错误回报,请联系comm[@]fhl.net