约伯记 33章1节 到 33章22节   背景资料  上一笔  下一笔
Chit章是以利户针对约伯ê问题开始讲话,特别是针对约伯一再自认清白、无辜ê言论kah态度,表达了伊ê看法。Tùi以利户ê言论thang看tio̍h伊m̄-nā自负,iáu自认为真有智慧(参考第33节),并且家己认为伊ê话ē-tàng hō͘约伯心服口服。

Tī第三十二章记载以利户所讲ê言词中,mā有意思beh邀请以利法、比勒达、琐法等三人加入伊ê辩论,不过包括约伯在内,kah-ná lóng m̄理伊,若无,就是in三人已经无想beh koh进行任何辩论,因为án-ne,以利户chiah会直接转向约伯讲话。

    Chit段经文中,以利户向约伯表明伊所讲ê话,lóng有上帝ê灵teh引chhōa,伊用chit种方式teh表明家己讲ê话,lóng是真实ê。以利户强调上帝真伟大,当约伯一再控诉上帝对伊ê惩罚是错误ê时,以利户则是beh hō͘约伯知影,上帝并m̄是三言两语就ē-tàng认bat清楚ê。其实以利户chit种讲词mā无甚么新ê见解。

    第1到4节,伊Tī chit段无算短ê篇幅中,lóng是直接称呼「约伯」ê名(参考三十三:31、三十七:14),讲话ê语气kah-ná家己比约伯iáu koh khah年长,而事实上伊真可能比约伯iáu少年。chit-má伊讲家己所讲ê话是「出tī到诚」、「是诚实话」。伊讲「上帝ê灵造」伊,意思是teh指伊chit-má所beh讲ê话,是充满tio̍h智慧。

第5节,以利户开始先kā约伯讲,若有任何想beh「答辩」ê话,尽管讲出来。伊用chit种语句开始,mā用chit种话结束(参考第32节)。可能是受tio̍h头前约伯kah三位朋友一来一往ê问kah答之间ê影响,伊mā kā约伯讲随时lóng ē-tàng「答覆」。

第6到7节,「tī上帝面前lóng仝款」,这是tī「土粉」ê基础上论人kah人之间ê性命关系。Chit点mā是基督教信仰ê基础,任何人「tī上帝面前」无贫贱富贵之别,所有ê人lóng是用「土粉造成」ê,lóng是罪人,无一个是「行善」ê(参考诗篇十四:1)。「土粉」mā thang表示「卑贱」、「无tap-sap 」ê意思。人虽然是用「卑贱」ê「土粉」所创造ê,ē-sái讲是tī人ê性命中,有上帝赐hō͘人ê「性命之气」(参考创世记二:7),chiah hō͘人ê性命有意义。以利户想beh hō͘约伯thang讲透枝,因为án-ne,伊提醒约伯,既然大家tī上帝面前lóng仝款,lóng是上帝用土粉所造ê,约伯thang m̄免自卑,m̄免「惊」伊,因为伊mā是人,并无甚么好惊惶ê。「我bē向你施压力」,chit句话tú好说明以利户并m̄是上帝,无够额来对约伯造成威胁。

Chia「压力」(《和合本》用「重压」)一词ê原意,有含恐吓、惩罚ê意思就是tī内面。Á「施压」这字,tī希伯来文有「手」ê意思。换句话讲,是出重手打击对方,á是用「手」压tòa对方ê意思。因为约伯bat表示上帝ê惩罚hō͘伊感觉不安,因为án-ne伊祈求上帝「无koh恐吓」伊(参考九:34、十三:21)。因为上帝乃是性命ê主,相对tī受造ê人,上帝有绝对ê主权。Taⁿ,以利户对约伯强调伊kah约伯两人之间lóng是平等,无需要有chit种惊惶感。

第8到11节,chit段经文是以利户引用约伯讲过ê话,因为án-ne,teh引用chìn前伊特别声明hiah-ê话是出tī约伯家己ê话á是观点。

以利户引用约伯讲ê「你讲:我无辜,无犯甚么过错」,chit句thang参考第九章35节b句、第十章7节a句、第十三章23节、第十六章17节a句、第廿三章7节等等,因为án-ne,讲上帝是「故意」beh hō͘伊承受ê(参考九:20—21、九:30—31)。约伯mā讲上帝kā伊当做「仇敌看待」(参考十三:24、十九:11)然后用「用铁链锁tiâu」伊,「窥伺」伊ê「每一个行动」,chiah-ê话thang参考第七章18到19节、第九章18节,特别是tī第十三章27节,差不多完全引用约伯ê话。

第12到13节,以利户真直接就指出约伯「m̄-tio̍h去」,伊讲伟大ê上帝m̄是人随便就ē-tàng指责ê。伊会án-ne讲约伯,是因为约伯约伯一再要求上帝回答伊ê问题。M̄-koh,以利户认为上帝是审判官,thang m̄回答人ê问题,ná亲像传道书第六章10节作者所讲ê,人m̄ kah比伊伟大ê人抗辩。仝款ê,上帝比任何人lóng伟大,人无法度想beh kah上帝辩论。

    第14到16节,以利户认为上帝并无沉默,却是有回答,只是「无人注意听伊ê话」。伊指责约伯并无专心注意听上帝ê话,kan-taⁿ会要求上帝听伊ê,这是错误ê态度。伊讲上帝m̄-nā是对人传达信息,上帝mā用「梦」á是「异象」向人启示他ê旨意。这表示即使人teh困重眠,上帝mā无停止他ê信息,因为上帝无需要歇困。甚至为tio̍h beh hō͘人听见他ê话,上帝mā会用「警告吓(heⁿh)惊」ê方式,hō͘沉睡ê人惊醒起来。

    第17到18节,上帝向人讲话,为tio̍h beh hō͘人赶紧「弃sak罪行」,「bē致使自高自大」,以利户chit种讲法,已经teh提醒约伯,讲伊经历chiah-ni̍h大ê性命惨剧,koh khah应该tio̍h谦卑家己,án-ne chiah会明了上帝ê话。伊认为就是因为上帝慈悲、怜悯,虽然他有绝对权柄thang hō͘人「落阴府」,m̄-koh他并无án-ne做,而且颠倒,他是一再施怜悯,beh救人「脱离死亡」。

第19到20节,Tī以利户ê看法里,「疾病」kah「身躯ê痛苦」,lóng是上帝管教ê方式。Á chit-má约伯tú好病得非常严重(参考七:5、十三:28、三十:17)。因为án-ne,Tī以利户ê观点里,破病并无一定是pháiⁿ事,破病会hō͘人知影家己ê有限。

第21到22节,以利户认为:无论人jōa-ni̍h-á有权势、财富á是能力,对性命ê掌握iáu是非常有限。Chia所讲ê「皮肉」、「骨头」,lóng是teh指肉体,而「灵魂」则是teh指人ê心灵。肉体ê痛苦kah心灵ê苦闷,lóng tī说明人需要上帝ê扶持、看顾kah带领。

重新查询 专卷研经 约伯记系列
错误回报,请联系comm[@]fhl.net