约伯记 27章1节 到 27章12节   背景资料  上一笔  下一笔
Chit章mā是kah第廿四到廿六章仝款,约伯所讲ê话,伊ê朋友听bē落去,就koh插嘴回应。M̄-koh却无一定是teh回应约伯所讲ê,in只希望约伯ē-tàng承认家己犯罪。M̄-koh约伯一直认为伊ê受苦,并m̄是因为伊有犯错。却是一定有上帝特别ê旨意。伊只是想beh了解上帝到底是有甚么计画。

Chit章thang分做两个段落,一是第1到12节,是约伯teh回应比勒达ê话,续落来是第二部分ê第13到23节,chit段是琐法回应约伯ê话。

Chit段经文是约伯一贯ê言论,tī第九章35节、第十章7节、第十三23到24节、第十九章25节、第廿三章7节等等经文,lóng thang看出约伯teh表达伊无辜受难ê心境,伊希望上帝iáu hō͘伊清白。

    第1到2节,「约伯续落来发言」,表示约伯迫不及待ê抢tio̍h讲话,可能是因为约伯已经听bē落去伊chiah-ê朋友所讲ê话。约伯用「chiù-chōa」ê语气表示上帝对伊并无「公道」。原因是伊无法度理解所遇tio̍h ê苦难ê原因。

第3到6节,约伯讲「只要上帝ê活气iáu teh我内面」,chit句话表示上帝kah伊之间ê关系尚且存在,无脱离á是切断。Mā就是讲,只要伊iáu活teh,一定会用实际ê行动来见证家己讲话真实不欺。Á上帝是thang tùi伊ê心内证实伊所讲ê话lóng是真实ê。约伯用koh khah坚定ê语气讲伊ê chiah-ê朋友一再指责伊犯罪,m̄-koh坚持家己是「无辜」ê,伊绝对无放弃chit种立场,直到往生lóng是án-ne。第6节ê「坚持」表示绝对m̄ kah邪恶、扭曲ê事妥协ê意思。

第7到10节,真清楚ê,约伯tī chia所指ê「敌人」kah「攻击我ê人」,就是teh指伊ê chit三位朋友(参考十九:2—3)。伊讲chiah-ê人lóng该受tio̍h「惩罚」。这mā是伊反击ê一种方式。伊认为对上帝不敬虔ê人所讲ê话不值得注意听,上帝mā bē注意听in haiⁿ-haiⁿ叫ê声音,因为in m̄-bat向上帝祈祷「求告过」。

第11到12节,chit节thang用来比较第廿五章,kah第廿六章5到14节比勒达所讲ê话。Tī chit两段经文中,比勒达对约伯讲伊所认bat ê上帝非常伟大,而chit-má却变成约伯kā伊讲ê朋友伊所认bat ê上帝非常伟大。伊chit种讲法,其实是teh讽刺伊ê chiah-ê朋友,讲in并无真正认bat上帝。约伯清楚知影上帝乃是「全能者」,chit种观念是非常正统ê信仰态度。续落来约伯一再认为伊ê chiah-ê朋友所讲ê,lóng真不切实际,伊讲chiah-ê朋友所叙述ê上帝,kah事实有真大ê cheng差,是真「荒谬」之言。


重新查询 专卷研经 约伯记系列
错误回报,请联系comm[@]fhl.net