约伯记 20章1节 到 20章29节   背景资料  上一笔  下一笔
Chit章是琐法ê发言,mā是chit-ê 回合ê最后一位朋友发言。Tī第一回合中,伊mā是最后一位发言,而伊两pái发言ê内容kah用词lóng真严苛。其实,琐法tī chit章ê讲词并无甚么特别ê新意,iáu-koh是停留tī善有善报、恶有恶报ê传统层面上,而且tī伊ê讲法中,lóng tī说明约伯一定是犯罪真重,chiah会有chiah-ni̍h大ê苦难临身。

    第1到3节,chit三节是琐法表明伊无法度koh再保持沉默,因为伊受不了约伯án-ne「侮辱」朋友。伊指出约伯所讲ê话hō͘伊「心烦意乱」,chit句话ê意思是teh指情绪bē稳、急躁、激动。因为án-ne,伊「忍bē-tiâu beh ài回答」伊讲约伯所讲ê lóng是「侮辱ê话」,chia所讲ê「侮辱」,有含责备ê意思。

第4到5节,琐法认为tī chit世界上,确实是thang看tio̍h「邪恶人」、「不虔ê人」兴旺,m̄-koh chiah-ê人ê「得意lóng是目nih-á久」。Chit种讲法就是圣经中典型ê智慧文学作品之特色,约伯ê chiah-ê朋友lóng真ài用类似chit种话来劝勉伊。

第6到7节,琐法认为约伯ê谈话充分显示了伊ê骄傲,因为约伯有kúi-nā pái一再直接向上帝挑战,亲像:第九章32节、第十三章3、22到24节等等。约伯chiah-ê朋友ê观念是,人算甚么,怎样thang án-ne向上帝讲话?伊讲人ê性命根本ná亲像「粪土」仝款,会hông弃sak,甚至连丢gōa chēmā m̄知,chit种人,有甚么好骄傲ê。

第8到9节,这是形容邪恶ê人所有ê一切,tī伊ê性命中lóng是真短促,ná亲像喘做一困就消失了,á是「如梦消失去」,醒来就消失à。琐法ê chit种讲法,是teh暗示约伯目前遭遇ê处境,显示过去ê约伯,乃是虚有ê,不实在ê,taⁿ chiah会「消失得无踪无迹」。琐法认为邪恶ê人无论jōa-ni̍h-á有成就,其结果就是亲像「夜间ê景象」,只要天一下光,koh-khah án怎都「见bē-tio̍h伊」ê影迹。因为chit种人真紧to̍h会ná亲像「失踪」ê人仝款,销声匿迹。这是因为上帝惩罚ê结果(参考以赛亚书廿九:7)。

第10到11节,第10节ê背景是一种「因果报应」ê观念(参考出埃及记廿二:21—24)。琐法chit种话,真显然是teh暗示约伯á是伊ê 众kiáⁿ,过去一定bat拒绝过穷乏人向in乞讨,taⁿ换做约伯beh向人乞讨,m̄-koh却无人怜悯伊。琐法认为作恶ê人即使过去「少年力壮」,m̄-koh「无久」就lóng会消失,无koh存在,ná亲像「土粉」仝款。Chia ê「土粉」mā thang解释为死亡。如圣经所讲,人死了后kā tńg来归「土粉」(参考创世记三:19)。

第12到19节,chit段经文lóng是用相对句型,来说明邪恶人ê处境,kah伊过去辉煌ê成就成对比。Mā是tùi chit节开始,以后ê诗歌lóng是描述邪恶ê人会遇tio̍h ê就是真实ê报应结果。

Tī chit段经文中,是用第15节做中心经文,然后有前后两节经文相对;
(a)第12节kah第18节相对,kā「甘甜」ê物khǹg tī「嘴舌下脚」,意思是teh指伊tam bē-tio̍h真正甘甜ê气味。Kah第18节ê「劳苦得来ê一切」,却「无法度享受」chiah-ê「财富」仝款。

(b)第13节kah第17节相对,「tam味它ê气味」应该是一件真甜美ê事,ē-sái讲是邪恶ê人性命是目nih-á ê,真紧to̍h会消失(夭折),chit种人,即使有「流奶kah蜜ê溪流」,伊mā看bē-tio̍h这幅súi ê景象,koh-khah无可能享受拥有ná亲像「江河」仝款chē ê「橄榄油」ê欢喜。

(c)第14节kah第16节相对,用「毒蛇ê毒汁」来形容ná亲像被毒蛇咬中仝款,死亡已经临到。

琐法想beh表达一点:好人即使食了简单ê食物,mā会受tio̍h祝福。相对ê,「邪恶人」即使食到ê食物非常好味thang口,mā会「发酸」败坏,结果一食进腹肚里,就变成ná亲像「毒蛇ê毒汁」一般,kan-taⁿ会hō͘人kā所食进腹肚里ê食物全lóng「吐出」来。琐法tī chia强调讲,上帝必定会收tńg来邪恶人原本收藏ê财富。Chit种观念tī箴言ê作品中mā不时出现(参考箴言八:17—21)。伊认为因为邪恶ê人所有ê财富,tú好证明伊是由欺骗、欺压得来ê记号。因为án-ne,就算伊kā财富藏tī别人看bē-tio̍h ê「腹中」,上帝mā会kā它「tùi伊腹中gîm出」。

第19节,thang参考弥迦书第二章1到2节。Chit种邪恶ê人是上帝所谴责ê对象。琐法提出以色列人久长以来ê传统生活规范:bē-tàng欺压sàn-chhiah人。Chit节thang看出琐法指责约伯就是chit种邪恶ê人,会欺负、剥削穷困ê人。

第20到21节,chit两节连续用否定句型,包括「无」、「无法度」、「不留落来」、「无法度持久」等。琐法提醒约伯「贪欲无止境」,而且在世间ê任何物件lóng「无法度保留」。伊用chit种方式teh kā约伯讲,遇tio̍h án-ne凄惨ê境遇,就是因为家己所做邪恶ê事ê结果,致使甚么都无留落来。

第22到23节,琐法认为邪恶者tī「siōng满足得意」ê时chūn,往往上帝已经决定beh伸手惩罚了,当上帝审判时刻一到,就是邪恶者灾祸来临ê时chūn。M̄免koh再在乎管邪恶人吞食jōa-chē财富,当上帝一发出「大受气」,惩罚就会亲像「暴风雨打击」到伊身上,hō͘伊无法度逃脱。

第24到25节,thang参考阿摩司书第五章19节。Chit两节真清楚说明邪恶ê人绝对无法度逃避上帝ê惩罚。上帝ná亲像一个勇猛ê战士,攻击敌人从来m̄-bat松手。诗人mā持仝款ê看法(参考诗篇一三九:7—12),指出只有愚戆ê人chiah会想beh逃避上帝ê惩罚。

第26到28节,照琐法chit种观点,邪恶人所有ê一切lóng会真紧消灭,而这lóng是上帝亲自惩罚chiah会án-ne。伊强调邪恶ê人犯罪必定会留落来明确ê证据,包括天顶ê天使会有记录,地上ê土粉mā会留落来in作恶ê痕迹,因为án-ne「天」kah「地」lóng会做证,出来控诉邪恶ê人所做ê一切恶事。伊认为约伯就是因为作恶,chiah会引起上帝愤怒而hō͘伊所有ê财富「荡然无存」。其实,约伯所beh控诉ê并m̄是伊tī财富ê损失,却是带来比chiah-ê koh khah大ê苦难,就是hō͘伊ê亲朋好友侮辱,甚至讥笑伊,而且远离了伊。

第29节,是chit首诗歌ê结尾语。琐法只是无明讲伊认为邪恶ê人就是约伯而已。

重新查询 专卷研经 约伯记系列
错误回报,请联系comm[@]fhl.net