约伯记 17章1节 到 17章16节   背景资料  上一笔  下一笔
Chit章是约伯继续回应以利法ê话,tùi第十六章到第十七章约伯回应ê话中,并无中断ê句话,mā tùi chit两章经文中thang看出约伯坚定ê信心。伊一直深信:即使所有ê人lóng认为伊犯重大ê罪过,甚至指控伊隐瞒罪证,所以chiah会受tio̍h上帝án-ne严厉ê惩罚,m̄-koh伊iáu是坚信上帝thang为伊做证,iáu伊清白,因为伊实在是无辜ê受难者。

第1到6节,chit段经文thang看出约伯kah头前所表现出来之态度相差真大。Tùi第1节就thang看出伊是继续第十六章22节所提起ê,对性命失望到极点ê感触。伊tī chia讲「坟墓teh当等我入去」,然后tī第11到16节则讲坟墓已经thí开嘴随时thang「收留」伊入去。这mā明白约伯感受tio̍h性命siōng大ê悲哀,乃是伊身躯已经痛苦到极点,却iáu koh khah忍受亲朋好友ê嘲(sau)笑kah戏弄,hō͘伊感觉身心俱疲,受创甚巨。

Tī chit段经文中mā thang看tio̍h约伯记tī性命陷入极大ê困境下,iáu是无bē记得走chhōe上帝ê帮助,而且深信上帝chiah是伊siōng好ê保证人(á是中保)。Tī chia ê「作保」(证实)一词,mā thang看做是用「性命作保证」,án-ne,约伯已经表明伊ài kā家己ê性命献hō͘上帝,只为tio̍h向上帝祈求作伊ê担保者。伊会án-ne讲,是因为到目前是连一个愿意替伊作保ê人都无,因为伊陷入苦难中,致使亲朋好友lóng因为án-ne懔neh,而m̄敢为约伯作保,甚至iáu认为伊是罪有应得(参考十六:7—8)。

第5节,chit节thang参考第六章27节。Chit节是当时流行ê俗语,表示朋友之间应该忠实以对,而且会tī危急ê时chūn相挺,却m̄是背叛。Chit节mā强化第六章14到21节所提起ê,约伯认为当伊siōng需要朋友ê时chūn,chiah-ê朋友m̄-nā无帮助伊,而且iáu故意「出卖」伊。其实约伯ê chit句话kah-ná teh暗示伊ê chit三位朋友,有想beh并吞伊ê财产ê意思,in用chit种态度对待约伯,是因为in想beh hō͘约伯提早气愤来死。因为án-ne,约伯继续控诉chiah-ê朋友作为,对伊来讲ná亲像落井下石ê卑鄙行为。除了这以外,in iáu用koh-khah无堪ê方式侮辱伊,就是吐唾沫tī约伯ê面上,就ná亲像tī第2节所提起ê嘲(sau)笑、戏弄仝款。

第7到10节,约伯有kúi-nā pái描述家己ê身躯状况,已经jú来jú差,因为伊极大悲伤不断啼哭而影响视力。M̄-koh约伯相信有án-ne ê一工,chiah-ê参与kā伊谴责ê朋友知影真相了后,lóng会感觉大tio̍h惊,因为in lóng参与谴责约伯而得罪上帝。M̄-koh约伯并无因为chiah-ê朋友ê强力指责,就失去信心而退却,反tńg是要求伊ê chiah-ê朋友来kah伊公开辩论。伊beh hō͘ chiah-ê朋友知影,in并无比伊聪明jōa-chē(参考十二:3、十三:2)。

第11到14节,约伯koh一pái陈述家己对性命ê失望。Chit段经文thang tùi第十六章16节,á是tùi第十七章7节后面接落去,lóng是约伯teh哀叹家己对性命ê极大失望。Tī chit段经文中,约伯ê讲法已经teh表示:若是tī苦难中无法度减轻性命ê负担,往往会hō͘人对未来无koh寄望。当人对生存ê日子产生心灰意冷ê人生观ê时,常常会有过一工算一工ê消极态度出现。

Koh讲,约伯mā指出伊ê chiah-ê朋友安慰伊ê话是虚假、表面ê话,因为事实并m̄是如in所讲ê hit种,甚至认为in是颠颠倒是非,kā「乌夜」(指性命已经无希望)当做「日时」(指iáu有未来thang讲)。伊讲家己ê现况只有ē-tàng以「坟墓为父」,意思就是伊已经无「家」thang归;á是「蛆虫为母」,老母原本是beh养育gín-á长大ê,而蛆虫则靠食人身躯ê肉维持性命,tú好kah老母ê角色颠倒。Á「姊妹」,原本应该互相照顾、扶持ê,因为「姊妹」生活做伙,mā同时同齐成长,chit-má则彼此互相残杀。约伯用chiah-ê话来kā伊谴责ê chiah-ê朋友,in身为长辈,却无亲像老母仝款照顾伊,就算是同辈如姊妹,mā仝款未尽义务,kan-taⁿ会腐蚀伊ê性命而已。

第15到16节,约伯讲「阴间」chiah是伊性命ê去处。M̄-koh若是成(chiâⁿ)实到à「阴间」,chit种人人koh有甚么希望?其实约伯虽然是一再地提起「阴间」,m̄-koh伊并无清楚真正「阴间」是án怎ê景况,因为伊并无去过。

重新查询 专卷研经 约伯记系列
错误回报,请联系comm[@]fhl.net