Tī前一段经文是用上帝ê天庭为背景，说明上帝tī天顶召开天庭会议，是用上帝kah撒旦ê对话为主轴。chit-má是第二段ê故事，背景则tńg来到人间ê世界，以约伯ê奴仆连续来对伊报告，讲厝里tú-tio̍h极大ê灾难，以及用简洁有力ê笔调，描述约伯对厝里所tú-tio̍h ê灾难ê回应。

第13到15节，tùi第13节开始，讲上帝允准撒旦对约伯进行连串测试。Mā ē-sái讲是撒旦开始进行它tī天庭会议后，tùi上帝手中得tio̍h ê「执行令」，ná亲像「搜索令」仝款。撒旦想beh tī约伯身上chhōe-tio̍h线索，证明约伯mā不过是一个为tio̍h牟取利益ê信徒，却m̄是真心敬拜上帝ê人。然后第一个灾难发生，奴仆来报告讲有「示巴人」来抢夺伊ê牛、驴á，并且刣死看守chiah-ê牛、驴á ê奴仆。参照tī第3节记载ê，讲约伯有一千头牛、五百匹驴á。虽然无讲看守chiah-ê cheng-seⁿ ê奴仆有jōa-chē，m̄-koh确定tī chit群奴仆中只chhun「一个」奴仆ē-tàng逃生。

注意第15节、第16节、第17节、第19节lóng有「只有我一个人」，chit句「只有我一个人」，表示虽然kui个情况非常无好，tī极大困境中，上帝iáu是一直维持kah约伯ê关系，无中断。

    第16节，这是第二pái灾难，是tùi第一pái灾难中逃tńg来ê奴仆报告iáu未结束，chit-ê奴仆就走来传话，报告所发生ê第二个灾难。Chit种连续发生ê灾难，表示灾难连连而来，hō͘约伯lóng无喘息ê机会。第二个灾难是「雷电tùi天而降」，chit pái ê灾难是kah上帝ê管理有关。表示上帝并无特别照顾约伯，chiah致使「雷电tùi天而降」破坏约伯ê产业，这mā就证明上帝并m̄是亲像撒旦所讲ê，lóng是特别恩待约伯「时常保护伊、伊ê厝，kah伊所有ê一切」（参考第10节）。Chit pái ê灾难造成约伯另一pái重大ê损失，共计有羊群七千只，以及teh照顾这七千只羊群ê「顾羊人」，仝款，tī灾难中只chhun「一个」顾羊人ē-tàng逃难出来，其余ê lóng被雷电击刣死亡。

第17节，这是第三pái ê灾难。Chit pái灾难肇祸者是「迦勒底人」，chit-ê族群是来自北方，tī巴比伦定居ê半游牧民族，后来成做巴比伦帝国ê核心份子。Chia讲，迦勒底人「分三队打击」，意思是teh指in被完全包围，无逃脱ê空间。Chit pái ê灾难是三千只骆驼被抢去，而奴仆mā仝款被杀害到只chhun一个人逃走。Tùi第一个「牲口」到第二pái ê羊群，直到chit-má ê骆驼等，chiah-ê灾难lóng kah约伯ê财富有密切关系。如果chiah-ê财富lóng是tùi上帝来ê赏赐（参照第10节），chit-má开始，上帝赏赐hō͘约伯ê一切lóng丧失。

第18到19节，这是第四pái灾难，灾祸tùi上帝来所创造ê自然界，这mā是属tī上帝管理ê范围。撒旦beh引发约伯对上帝起怀疑之心，siōng好ê方式，就是hō͘约伯会埋怨上帝，埋怨上帝怎样会hō͘这属tī他ê手thang控制、管理ê「暴风」，tùi「旷野hia刮来」来打击伊ê产业，m̄-nā「吹倒屋子」，koh khah严重ê是iáu压死去「厝内ê人」，而tī厝内所有ê人，就是约伯所有正tī宴席中欢乐ê kiáⁿ kah奴仆。Ná亲像chìn前ê灾难仝款，只有「一个」奴仆会赴逃生，走来向约伯报告chit件大灾难。

第20到21节，chit两节是约伯听tio̍h各种部门逃出来ê奴仆ê报告后ê反应。而且chiah-ê反应是tī伊听tio̍h十个kiáⁿ lóng tú-tio̍h灾难死去了后，伊chiah表示哀伤。Tī这chìn前ê前三pái灾难中，约伯都无对拥有ê财产之损失表示过任何意见。另外一方面，mā可能是因为发生ê灾难，lóng是接踵而到，hō͘约伯根本就无有时间反应，直到伊已经一无所有时，伊chiah ē-tàng定下心来检视家己所受tio̍h ê惨重损失，kah所受tio̍h ê伤害。

Chia讲约伯「悲伤地拆裂衫裤、剃掉头毛」，这是以色列人民teh表示性命中siōng哀伤ê状态（参考创世记三十七：34，以赛亚书十五：2—3）。第21节约伯所讲ê chit句话，mā是siōng常常hông基督徒引用ê经文之一。

「我空手出世，mā tio̍h空手tńg去」，chit句话tī中文《和合本》是「我赤身出tī母胎，mā必赤身归回」（参考传道书五：15，提摩太前书六：7）。「母胎」，这是teh指孕育性命ê「老母」。Á土地ná亲像孕育人类性命ê「老母」仝款。「上主赏赐ê，上主koh收tńg来」，约伯án-ne讲，是teh见证伊身上所发生ê一切事件，lóng必定kah上帝ê创造、作为有密切关系。因为án-ne，如果beh了解真相，一定tio̍h tńg来到上帝hia chiah  ē-tàng明白其中ê意义（参考哥林多前书十三：12）。

第22节，「约伯并无犯罪」，chit句话表示tī撒旦ê怀疑中，约伯确实是ná亲像上帝对伊ê认bat仝款，并m̄是因为「有利可图」chiah-tio̍h上帝忠实。M̄-koh chit句话mā说明以色列人民久长以来ê观念—好人有好报，恶人会有恶报，chit种观念并m̄是正确ê。Koh讲，chit句话mā说明好人、无犯错ê人，á是「无辜ê」，lóng有可能会遇tio̍h ná亲像约伯所tú-tio̍h ê仝款，是性命中siōng残酷ê境遇。Á约伯ê chit句话mā同时是teh反驳箴言所讲ê「善有善报、恶有恶报」chit种观念（参考箴言十：3、十：24—25、十三：9、十四：11）。Tī约伯记ê作者看起来，箴言chit种「善有善报、恶有恶报」ê观点，并m̄是正确ê。因为至少tùi约伯身上ê经验所看tio̍h ê并m̄是án-ne。