耶利米书 48章1节 到 48章25节   背景资料  上一笔  下一笔
Chit章是关系摩押受惩罚ê记事,mā是先知文献中,讲述摩押ê遭遇篇幅siōng长ê一章。Tī旧约圣经先知文献中,一再出现有关上帝对摩押这民族忿怒ê信息。先知耶利米除了chit章之外,mā kúi-nā pái传出上帝beh惩罚摩押ê信息(参考九:25、廿五:21、廿七:3)。

摩押城是设tī死海以东,是罗得kah cha-bó͘-kiáⁿ乱伦所生ê kiáⁿ孙(参考创世记十九:37)。In bat用钱买收巴兰,ài伊去陷害以色列人民(参考民数记第廿二到廿四章),然后koh tī什亭谷ê所在,用cha-bó͘人去诱惑以色列人民弃sak上帝(参考民数记廿五:1—3)。后来,摩西律法真清楚规定,摩押人kah亚扪人「bē-tàng加入上主ê聚会」,并且iáu警告以色列人民,tī「有生之日bē-tàng为in走chhōe平安kah繁荣」(参考申命记廿三:3—6),这mā说明两个族群之间,虽然有远亲ê血缘关系,彼此之间ê仇恨却非常大。另外一方面,列王记下第廿四章2节记载主前601年,当犹大王约雅敬决定背叛巴比伦帝国而kah之对抗ê时,摩押koh kah巴比伦联合攻打犹大,hō͘犹大ê国势koh khah衰微。Mā因为án-ne,摩押kah犹大之间ê冲突koh khah厉害。

这kui章lóng是讲tio̍h摩押ê灾难,而tùi第26到30节之经文就thang看tio̍h摩押真正ê问题是骄傲。换句话讲,tī摩押人ê心中,根本就无kā上帝khǹg tī in眼里,in认为家己有能力thang抵抗上帝ê权威。

Tī chit段经文中提起真chē城市ê名,每提起一个城市名称,就会记载灾难tòe-tiâu其后出现,表示上帝决定严厉惩罚摩押人,而且严厉ê程度tùi第8节就thang清楚看出来。

Koh讲,chit段经文mā真清楚描述出摩押ê灭亡,是kah伊ê骄傲有密切关系,这国家ê人民根本就m̄相信上帝,自认比上帝伟大。M̄-koh当上帝惩罚摩押ê时,摩押就会知影家己就亲像上帝手中ê酒瓶仝款,上帝随时ē-tàng轻易kā瓶内ê酒倾倒tī地上。

第1到3节,「尼波」,这原本是分配给吕便支派ê土地(参考民数记三十二:4、38),tī亚嫩河以北,靠近尼波山ê所在。大约tī主前840年,摩押背叛了以色列,攻落chit-ê城。

「基列亭」,这是一个古老城市(参考创世记十四:5),设tī约旦底本西北大约十公里ê所在。

「希实本」chit-ê城市,原本是分配给吕便支派ê(参考民数记三十二:37、45,约书亚记十三:17)。后来重新分配ê时,kā它分配给迦得支派作为利未人ê城市(参考约书亚记廿一:38—39)。

「玛得缅」kah「何罗念」,chit两个城市ê地点lóng已经无法度thang考。

Chia讲「摩押ê光辉消失去à」,因为巴比伦军队已经摧毁in ê家园,hō͘伊成做废墟了。

Chit段经文描述chiah-ê城市kā tī巴比伦军队攻入ê时,摩押人民发出「大声哀叫」,就ē-tàng明白巴比伦军队入城后残酷ê刣戮手段。Á城市m̄-nā是hō͘「被占领了」,人民mā「就会领受侮辱」,是teh表示巴比伦军队入侵了后,对待战俘ê手段lóng真残忍,一屑á都留情。

第4到6节,chia讲「孩童ê哭声传到琐珥」,是teh表示灾情确实是非常惨重,gín-á ê父母若m̄是teh相刣中死去,就是hō͘俘虏了,只chhun gín-á而已。Chiah-ê gín-á四界流浪chhōe in ê亲人,m̄-koh却chhōe bē-tio̍h。

Chia提起「琐珥」chit-ê城市,原本是一个土地肥ê城市,设tī死海ê东南部。

「鲁希」,中文《和合本》用「鲁希坡」,是仝款ê意思,只是并无清楚确实所在地。

Chit段经文讲chiah-ê城市ê摩押人民「像旷野ê野驴á奔逃」,以确保家己ê性命。因为巴比伦ê军队刣戮手路非常残酷,若beh保全性命,就beh赶紧逃走。M̄-koh差不多每一个城市lóng会听tio̍h人民「啼哭」、haiⁿ-haiⁿ叫ê声音。

第7节,chit节真清楚讲出摩押真正ê问题,就是狂傲,认为只要有「军力财力」作óa靠,就甚么lóng m̄免惊了。M̄-koh当上帝beh惩罚一个人á是一个国家ê时,koh有甚么人ē-tàng承受得起?无任何人á是国家ē-tàng抵挡上帝ê惩罚。

「你ê神明基抹」,这是摩押人siōng崇拜ê神明。Tī民数记第廿一章29节,列王记上第十一章7节、33节,以及列王记下第廿三章13节等等,lóng有提起摩押ê神明基抹。作者beh表明ê是圣经一贯ê信念:无一个神明ē-tàng tī上帝chìn前khiā立会tiâu,mā无任何一个神明ē-tàng kah上帝对抗。因为án-ne chia讲摩押ê神明基抹,会「流亡」,意思是teh指基抹神明,kā会kah俘虏仝款,hō͘人当做物件买卖,甚至精美ê神像雕刻mā ē-tàng作艺术品拍卖。	

第8到9节,chit节讲出kui个摩押国家会被消灭。因为所有ê「城镇lóng tio̍h毁灭,一个mā不存留」,包括「山谷」、「平原」,若m̄是被「蹂躏」,就是hō͘「践踏」,这表示巴比伦军队攻进摩押了后,掠夺了一切所有,mā摧毁了所有一切。因为án-ne,「hō͘摩押khiā立墓碑」,表示它会完全被「毁灭」,所有城市lóng会成做「废墟,koh khah án怎都无人tòa」。

第10节,chit节是编者加入ê经文。

「不专心做上主工作ê人该受诅咒」,这是古代ê人ê观念:每一国家lóng有siōng重要ê神明,如果该神明无法度庇护该国家免tī灭亡,则该神明mā会hō͘俘虏,kah受掠ê人民仝款当对敌者ê奴隶。战胜者往往用chit种方式处理chiah-ê俘虏得来ê神明,就是kā chiah-ê神明掠到家己ê神庙里,khǹg tī神庙内神像面前。Chit种做法是teh表示:绑敌人ê神tńg来献hō͘家己ê神明。然后koh再kā chiah-ê「俘虏」来ê神像拖到外面,用火烧掉就是表明用chiah-ê神明献祭hō͘家己ê神仝款。Á hiah-ê祭司mā可能就tī火烧hiah-ê战败ê神明像中同齐被烧死,这就是chit节所讲ê「不专心做上主工作ê人该受诅咒」。

「不挥动刀剑刣敌ê人该受诅咒」,chit句话有两个层面ê意思:一是上帝指派巴比伦军队去攻打摩押作惩罚,若是巴比伦帝国无认真有怠慢,会受tio̍h上帝ê惩罚。二是teh指摩押城内ê人民á是军队,看见危险就收手,若是无勇敢起来抵抗敌人,国家灾难就会跟tòe来到。

第11节,chit节说明摩押虽然过去经历过被侵略、占领,m̄-koh从来m̄-bat有亡国、受掠ê经历,mā因为án-ne,hō͘ in lóng是「头尾安逸无忧」,ná亲像封tiâu瓶嘴里ê酒仝款,保持「香醇」好味。

第12节,「时chūn会到」,这mā是先知文献中不时出现ê词句,表示上帝审判ê时间teh beh来临。上帝beh ná亲像倒酒一般「Kā摩押倒掉」,m̄-nā是「Kā酒瓶倒空」,甚至iáu koh khah「摔碎酒瓶」,这真清楚表示摩押chit-ê国家bē koh再有任何存在ê价值á是功能。

第13节,因为人民被俘虏,经历惨痛ê迫害,就无koh对in ê守护神「基抹」有任何信心。

「以色列人对in所óa靠ê神明贝特利失去信心」,这是teh指所罗门王往生后,以色列人民分裂做做南、北二个国家;南国名叫犹大,北国号名以色列。北国开国第一位国王耶罗波安一世,为tio̍h beh安抚无法度tńg来到耶路撒冷去敬拜、献祭ê北国人民,伊用造金牛ê方式来引诱北国以色列人民弃sak对耶和华上帝ê忠心,伊铸造两头金牛,一头金牛立tī伯特利,另外一头立tī但。然后对人民讲:「Lín上耶路撒冷敬拜太辛苦了。以色列人民,这就是领lín出埃及ê神明!」。这就是chit所在所讲ê以色列人民「所óa靠ê神贝特利」之背景。伊tī伯特利祭坛顶向伊所铸造ê金牛献祭,并且tī伯特利设立祭司,ài in tī伊所建造ê神殿事奉。耶罗波安mā订定每年八月15日是去伯特利向这金牛献祭烧香(参考列王记上十二:28—33)。M̄-koh北国以色列并无因为拜这金牛而得tio̍h庇护。主前721年北国以色列被亚述帝国所消灭,人民受掠贩卖四散各地做奴隶。

第14到16节,chit两节讲出摩押会遇tio̍h毁灭ê结果ê原因,就是认为拥有强势ê军事武力就ē-tàng保护家己国家ê安全,m̄-koh结果iáu是hō͘巴比伦hō͘灭亡了。虽然摩押有「siōng精锐ê少壮部队」,非常猛勇,m̄-koh只要是上帝决定beh毁灭ê,任何精锐ê部队mā抵挡不了,上帝决定beh hō͘巴比伦来摧毁摩押,hō͘它ê「终局逼近」,而且是「无久会荒废」。

第17到20节,chit段诗歌是一首哀歌,teh形容摩押被毁灭ê时ná凄惨ê景况。

「威力光荣」、「光荣ê位上」等chit种用词,lóng teh表示过去一段时间里,摩押确实是一个真hō͘人羡慕、喜爱khiā起ê所在,因为摩押除了有真好ê经济实力外,mā有真坚强ê军事设施。M̄-koh摩押ê统治者可能因为án-ne而「专横ê霸权」,会欺负附近国家á是少数民族。因为án-ne,当巴比伦帝国军队开始侵吞伊ê时chūn,真chē附近被伊欺负、压迫过ê弱小民族会袖手旁观,像「亚罗珥」ê居民就会「khiā tī路边观望」,问hiah-ê逃难ê人到底出了甚么问题,而逃难ê人回答是只有ē-tàng为摩押「蒙羞沦陷」哀号「啼哭」,因为「摩押灭亡了」。

第21到25节,chit段经文列出了摩押ê主要城镇名单,其中有kóa地方lóng bē-tàng考了。

重新查询 专卷研经 耶利米书系列
错误回报,请联系comm[@]fhl.net