耶利米书 44章1节 到 44章30节   背景资料  上一笔  下一笔
第四十二到四十三章讲tio̍h tī巴比伦帝国统治下ê犹大残存军事将领约哈难等人,虽然是恳求先知耶利米替in祈求,因in想beh知影上帝ê旨意,并且chiù-chōa讲:「无论上主—咱ê上帝ê话是好是pháiⁿ,咱一定听从。」(四十二:6a),ē-sái讲是,当先知耶利米tī十工了后得tio̍h上帝ê启示讲,ài chiah-ê残存ê犹大军事将领留tī犹大kah「hiah-ê siōng穷苦、无财产ê人」ê同胞同齐重建家园,上帝甚至ài先知耶利米kā chiah-ê残存ê犹大菁英讲beh建立in,bē拆毁in;培植in,不拔除in,因为上帝已经「后悔」惩罚犹大(参考四十二:10)。M̄-koh chiah-ê将领、菁英虽然bat信誓旦旦讲会听从上帝ê旨意,m̄-koh后来ê反应却是违背in chìn前所chiù ê chōa,却是照家己所认为安全ê路径,逃向埃及去避难。

第四十四章真清楚记载先知耶利米对hiah-ê执意m̄听从上帝信息而流亡到各地去避难ê犹大菁英发出信息,既然in坚持m̄听从上帝ê话,án-ne,无论in逃gōa chē,lóng会tī「家己决定beh去ê所在遭遇战争、饥荒á是瘟疫来死」。Mā就是讲,人如果teh kí上帝ê名chiù-chōa,就一定tio̍h确实照所立ê誓愿去行。以藐视ê态度回应上帝慈爱ê人,他绝对bē任其嚣张、逍遥,即使逃到天涯海角mā是仝款。

Chit一章mā特别提起有kóa妇女kah in ê丈夫公开对先知耶利米表示,in已经向所拜ê偶像神明许过愿,mā因为án-ne而得tio̍h饱足,享受tio̍h安乐ê福气,无tú-tio̍h遭祸。M̄-koh in chit-má却因为听从先知耶利米ê话,而灾难连连,痛苦无停。先知耶利米听了后,无加讲甚么,只表示既然in执意án-ne行,就去pah。M̄-koh in会亲目看tio̍h in ê国王西底家受tio̍h巴比伦国王ê处置,包括in认为安全ê埃及mā会仝款受罚,埃及国王合弗giú mā会tú-tio̍h仝款ê运命。

Chit段经文lóng是先知耶利米传出上帝beh严厉惩罚chiah-ê嚣张ê犹大菁英之信息。Chit段经文真可能是tī耶路撒冷沦陷chìn前,先知耶利米对全体南国犹大人民所讲ê话。Á其讲话ê时间可能是tī一个重要节期中,有真chē来自已经移居外国ê以色列人民回乡参加节期活动ê时。M̄-koh mā有无仝ê意见认为这本来是先知耶利米对hiah-ê逃走到埃及去ê犹大菁英,mā就是约哈难等人所讲ê,后来编者认为应该kā它扩大范围,hō͘所有早已经去到外国避难ê以色列人民lóng ē-tàng明白上帝bat透过先知耶利米警告in,可惜ê是in lóng拒绝听从上帝ê话,而且kā弃sak上帝当做是「理所当然」ê事。M̄-koh先知耶利米iáu是beh提醒散居tī外面国ê以色列人民,千万tio̍h会记得:弃sak上帝ê结果就是灾难会永远kah跟tòe in,即使in是寄居tī大家认为安全ê所在á是国家,mā是仝款。

第1节,chit节指出hiah-ê流亡到「埃及」去避难ê人,分别散居tī「密夺、答比匿、挪弗,kah埃及南部」等地方。chit-má上帝ài先知耶利米kā in讲关系in ê「运命」。

第2到6节,先知耶利米kā chiah-ê流亡到埃及等地去ê犹大人民讲,上帝一定会降灾难tī in原本引认为傲ê耶路撒冷,以及犹大各城市,因为in ê缘故,上帝beh会hō͘耶路撒冷kah犹大各城市成做废墟「无人khiā起」,主要原因是上帝差遣他ê奴仆传达信息hō͘ in,m̄-koh in「lóng是m̄听,mā m̄-chhap,m̄肯放弃向别ê神明献祭ê恶习」。

第7节,chit节是上帝ài先知耶利米提问chiah-ê犹大菁英ê问题,问in「为甚么」ài做上帝看做讨厌ê事?为甚么beh hō͘ in kah家己ê后代lóng「灭绝」?这tú好说明in心中根本to̍h无上帝,只有利益。

第8到9节,chit两节清楚说明chiah-ê人即使是逃到埃及去,iáu是仝款积习难改,in已经习惯拜偶像,tùi án-ne「激怒」了上帝。而且是「犹大君王kah王后」等领导阶层者带头拜偶像,做上帝看做「邪恶ê事」。Án-ne chiah是真正ê问题所在。因为chiah-ê领导者对上帝无忠实,人民就会放肆,弃sak上帝。

第10节,「直到今á日」,这是teh指先知耶利米劝勉in、公开指责in ê时刻。Chiah-ê逃走到埃及去避难ê犹大菁英,iáu m̄知「痛改前非」,m̄知beh「敬畏」上帝,mā m̄遵守上帝ê律法诫命。因为会「敬畏」上帝ê人,必定会遵守上帝所颁布ê律法诫命。

第11节,chit节讲出上帝决定采取严厉惩罚ê方式,就是beh「毁灭kui个犹大」。

第12节,特别指出约哈难等chit群逃走到埃及去避难ê菁英,因为m̄听上帝ê话,「硬beh逃走到埃及去tòa」,m̄-koh结果是仝款会hō͘上帝「全部消灭」,无论in ê「地位高低lóng tio̍h tī埃及战死á是饿死」,就是战争、饥荒、瘟疫ê灾难会紧跟tòe in。

第13到14节,chit两节真清楚讲出上帝用「战争、饥荒,kah瘟疫」惩罚耶路撒冷,mā tio̍h用仝款ê方法惩罚chiah-ê逃「到埃及去」ê犹大人民,而且是「无一佳哉免得」,无人ē-tàng koh再tńg去犹大故乡。

「除了少数难民」,chit句话mā koh一pái说明上帝tī极大ê忿怒中,lóng是存留teh恩典,无全部毁灭,却是留tio̍h残存m̄-koh忠贞tī上帝ê子民。

Chit段经文特别提起为甚么chiah-ê tī埃及ê犹大人民会m̄听从先知耶利米ê话,特别是一阵众妇女,原因是in认为bat tùi所拜ê偶像神明得tio̍h福气,taⁿ ài in表示坚决无放弃向偶像神明烧香献祭。因为án-ne,先知耶利米转达了上帝ê信息hō͘ chiah-ê拒绝改过归向上帝ê犹大人民,清楚kā in讲,上帝一定会严厉惩罚in,而惩罚ê方式,就是用战争、饥荒、瘟疫等。为tio̍h beh证明上帝ê话是真,上帝beh hō͘ in一个记号。

第15到18节,chit段经文mā说明chiah-ê逃到埃及去避难ê犹大菁英,kah一kóa犹大人民ê妇女,in提出in拒绝听从先知耶利米转达上帝信息ê原因,就是in bat允准bó͘去向偶像神明祭拜,结果得tio̍h chiah-ê偶像神明ê回应,hō͘ in丰富ê物质生活,thang「食得饱,非常享福,无灾无祸」,ē-sái讲是当in听先知ê苦劝,m̄-thang koh再拜偶像后,却发觉灾难连连,in ê「同胞m̄是战死就是饿死」。Chiah-ê理由hō͘ in无愿意继续听从先知耶利米ê话,决定koh再tńg去拜偶像。In ê chit种讲法kah主前第八世纪先知何西阿谴责北国以色列人民bē记得上帝ê恩典完全仝款(参考何西阿书二:8)。

第19节,chiah-ê妇女特别提醒先知耶利米,讲in会án-ne做,并m̄是家己暗中去做ê,却是众丈夫lóng同意了后in chiah去做。Chit种回答是有根据ê,根据摩西律法ê规定,cha-bó͘人beh下愿做甚么事,有丈夫同意就ē-tàng(参考民数记三十:6—16)。因为以色列人民ê宗教事务,是cha-po͘人teh决定ê,cha-bó͘人只有ē-tàng听从cha-po͘人决定ê事去行。Chiah-ê cha-bó͘人向先知耶利米提出chiah-ê答辩ê时,其实mā是teh表明in所行ê,并m̄是只出tī家己ê主张,却是有丈夫ê认thang。

Chiah-ê人án-ne回答,thang tùi列王记下第廿二章到第廿三章30节,á是历代志下第三十四章到第三十五章,有关约西亚改革犹大宗教信仰ê情形看会tio̍h。伊虽然真致力tī改革ê运动,却tī一场kah埃及军队ê战争中往生,hō͘犹大ê以色列人民无法度接受chit种打击,认为约西亚王就是因为摧毁巴力神庙kah女神亚舍拉神柱,chiah会tī战争中往生。Á tī历代志下ê记录中,约西亚推动ê宗教改革运动kah先知耶利米是有关连ê(参考历代志下三十五:25),这就是为甚么chiah-ê人会对先知耶利米讲:「咱m̄听你奉上主ê名对咱讲ê话。」因为in认为听从先知耶利米ê话,结果是国王tī战场上往生,致使国家需要赔偿埃及ê庞(pâng)大军事费用(参考历代志下三十六:3),hō͘ in开始面临挨饿、生活困苦ê结果。

M̄-koh in bē记得一件非常重要ê事:为甚么需要约西亚进行宗教改革?就是因为因弃sak上帝,致使in所行ê事lóng离开上帝ê诫命,行尽一切ê pháiⁿ事(参考耶利米书七:5—15),因为án-ne,当约西亚teh进行改革ê时,其过程是非常艰辛ê,因为伊继承落来ê是伊阿公玛拿西、老父亚们所留落来ê宗教信仰堕落ê弊病。其实,beh改掉上两代留落来ê弊病,却m̄是一朝一夕thang成,甚至有时chūn会开koh khah chē ê时间chiah ē-tàng完成。Mā thang án-ne讲,如果m̄是玛拿西kah亚们两代tī信仰上ê堕落,约西亚thang m̄免花hiah-ni̍h chē时间tī进行宗教信仰改革,伊thang真紧完成国家大事、人民心灵ê更新,而hō͘国家koh khah符合上帝ê旨意,犹大国真可能会因为án-ne koh一pái恢复大卫王朝时代ê辉煌景象。

第20到23节,chit段经文是先知耶利米回应in ê话。伊hō͘ chiah-ê犹大人民知影,上帝真清楚in tī大街小巷中烧香献祭hō͘偶像神明,只是上帝怜悯in,无降大ê灾祸hō͘ in,结果in却认为上帝根本khah输迦南神明巴力kah天后。先知耶利米hō͘ in知影,taⁿ灾难来临,就是上帝hō͘ in ê回答。先知耶利米koh一pái强调,in会tú-tio̍h大灾难降临,是因为in弃sak上帝,去拜别人ê神明,「m̄遵守上帝ê诫命」,得罪了上帝。

第24到25节,先知耶利米传出上帝ê话,讲既然in执意beh拒绝上帝,上帝就无koh chhap in,tòe in去。这mā是使徒保罗所讲,当人故意m̄承认上帝ê时,上帝会「chhut-chāi」chit种人去做伊想beh做邪恶ê事(参考罗马书一:24、26、28)。

第26到27节,上帝表示拒绝koh再hō͘ chiah-ê悖逆ê犹大人民使用他ê「圣名」,并且koh一pái提起上帝beh hō͘ in战死,á是因为瘟疫而「病死」,直到「全部消灭」。

第28节,tī chit节却讲出上帝tī极大ê忿怒中iáu有慈悲怜悯,他会看顾ná一阵忠实tī他ê子民,他决定留落来chiah-ê人来做见证。Chit种留落来一kóa少数人做见证,就是先知文献中一再出现ê「残存ê人民」,á是用「劫后余生」chit-ê词,表示上帝是慈悲、怜悯ê,犹大人民虽然恶质到足以完全消灭in,m̄-koh上帝无án-ne做,他iáu为in留落来延续以色列民族命脉ê一小群残存ê人。

第29到30节,为tio̍h beh hō͘犹大人民确信上帝ê信息,上帝决定hō͘ chiah-ê犹大人民「一个记号」,证明上帝ê惩罚一定会来临。这记号就是除了巴比伦王尼布甲尼撒王thang为tio̍h án-ne事做见证外,mā有「埃及王合弗giú」mā会hō͘巴比伦王掠、杀害,无法度庇护hiah-ê去埃及ê避难者。

重新查询 专卷研经 耶利米书系列
错误回报,请联系comm[@]fhl.net