耶利米书 43章1节 到 43章13节   背景资料  上一笔  下一笔
Chit章记载chiah-ê来询问上帝旨意,并且清楚得tio̍h in所想beh听ê上帝信息了后ê反应,所采取ê行动kah in所chiù-chōa讲ê话完全无相仝。In认为先知耶利米所传达ê信息,并m̄是tùi上帝来ê旨意,却是受tio̍h伊ê秘书巴录ê影响chiah讲hiah-ê话。因为án-ne,上帝ài先知耶利米用象徵性ê动作,并且koh一pái传出上帝严厉ê警语,回应chiah-ê拒绝听从上帝旨意ê人。

真正ê问题是:做一个人祈祷询问上帝ê旨意ê时chūn,是beh上帝听伊ê,iáu是人应该听上帝ê?Chit章提出chit-ê严肃ê信仰功课,thang供大家思考kah反省。

第1节,先知耶利米照上帝指示hō͘伊ê话,「转告以色列人」,而且是「每一句话」lóng清楚、无遗漏,这mā是先知应尽ê职责(参考列王记上廿二:14)。

第2到3节,chit两节记载chiah-ê人听了后ê反应,in是用「傲慢」ê态度回应先知耶利米。In认为先知耶利米「讲白贼」,并且强调讲伊所传讲ê并m̄是上帝所「吩咐」ê,因为先知耶利米讲上帝「禁止」in去tòa埃及,m̄-nā是án-ne,甚至是即使去埃及,灾难mā kā kah跟tòe in去到埃及á是任何in所到ê所在(参考耶利米书四十二:18)。并且认为先知耶利米所讲ê,lóng是伊ê秘书「巴录煽动」,chiah hō͘伊「反对」in去埃及避难,是想beh hō͘ in被巴比伦人「杀害」,á是被「掠到巴比伦去」。

第4节,chit节讲in lóng拒绝听从先知耶利米ê话,「m̄肯听从上主ài in居留tī犹大ê命令」。

第5到7节,m̄-nā án-ne,chiah-ê人iáu做一件非常错误ê事,就是「Kā残存在犹大ê人kah tùi各国回乡ê难民lóng带到埃及去」,这其中iáu包括先知耶利米kah伊ê秘书「巴录」、「cha-po͘人、cha-bó͘人、儿童,kah众公主」等lóng同齐带去。这是kā in当做人质押去埃及,in认为安全、可靠ê所在。Á chit时chūn先知耶利米,一直保持沈默不语,因为伊知影无论是怎样辩护lóng无法度改变chiah-ê人。In执意去「埃及」,后来in来到「答比匿」,这是设tī埃及尼罗河下游三角洲东部之孟沙勒湖以南ê所在。

第8到10节,上帝ài先知耶利米「当tio̍h以色列人,搬一kóa大石头埋tī答比匿王宫门前广场ê灰泥下」,这是一种用戏剧性ê表演方式来讲预言,这主要teh表明:有一工,chiah-ê逃走到埃及去避难ê犹大菁英,会亲像chiah-ê石头仝款,被统治者控制tio̍h,无法度动弹,而chit位teh beh控制埃及王宫ê就是「巴比伦王尼布甲尼撒」,伊teh beh tī埃及ê土地顶面建造「宝座,thí开皇家ê帐棚」,这teh表示巴比伦王kā统治埃及ê意思。

第11到13节,chit三节lóng teh强调上帝beh透过「尼布甲尼撒beh来击败埃及」,而chit件预言确实发生tī主前568年,mā就是耶路撒冷被毁灭ê十八年后,巴比伦王尼布甲尼撒在位ê第三十七年,伊出兵讨伐埃及,当时埃及ê法老王名叫亚玛西士(Amasis),为tio̍h beh惩罚埃及不时tī亚细亚诸小国中制造动乱。虽然埃及并无被巴比伦消灭、统治,m̄-koh却遇tio̍h巴比伦军队严重ê蹂躏,后来并且听从巴比伦帝国ê警告,m̄敢继续反抗。另外一方面,上帝mā同时beh出手摧毁埃及人民敬拜ê「日头神」,这mā teh暗示埃及已经无法度抵抗巴比伦军队ê入侵。即使以色列人逃到埃及去避难,mā会「ná亲像牧者除去衫裤顶面ê ka蚤」,tī埃及人眼中in ná亲像「ka蚤」仝款,到时mā会hō͘跺掉。

重新查询 专卷研经 耶利米书系列
错误回报,请联系comm[@]fhl.net