Chit章kah第三十五章ê背景仝款，mā是约雅敬作犹大王ê时发生ê事，时间大约是tī主前600到604年间。Chit一章mā是耶利米书中真重要ê一章，因为咱thang tùi chit章知影先知耶利米是透过口授ê方式，ài伊ê秘书写落来上帝传达hō͘伊ê话。因为án-ne，有bē少圣经学者根据chit点，认为耶利米书就是由秘书巴录抄写而成ê一本经册。

Tùi chit章thang看tio̍h先知耶利米预言国王约雅敬m̄-nā「无后代好继承大卫ê王位」，而且「尸体会被hiat-ka̍k tī野外，日时头受炎阳烧灼，瞑间受寒霜侵袭」（参考第30节）。Thang想像会tio̍h，先知耶利米就是因为对国王约雅敬讲chiah-ê无礼貌、有损国王尊严ê话，结果因为án-ne受难被监禁。

Chit段经文说明尼利亚ê kiáⁿ巴录，伊是先知耶利米ê秘书，mā照先知耶利米ê吩咐，一一地记落来先知耶利米口述ê话，然后the̍h去耶路撒冷宣读hō͘犹大以色列人民听，希望án-ne ē-tàng唤醒in，hō͘ in赶紧悔改。

第1节，「约雅敬作犹大王ê第四年」，chit句话thang参考第廿五章1节。

Chit一年是主前605年，chit年mā是巴比伦王尼布甲尼撒王就任ê第一年，上帝对先知耶利米讲话。

第2到3节，上帝ài先知耶利米kā他所讲ê话，「每一件事lóng tio̍h记录落来」，而且tùi「约西亚王ê时代到今á日」所讲过ê话，mā就是讲tùi主前639年直到chit-má，「有关以色列、犹大，kah列国ê每一件事」，全部lóng tio̍h记录落来。上帝期待用chit种方式，ē-tàng唤醒hiah-ê悖逆ê犹大人民悔改「弃sak邪恶ê道路」，án-ne，上帝就会「赦免in ê罪恶过犯」。

第4节，为tio̍h beh kā上帝hō͘伊ê信息lóng记录落来，先知耶利米请伊ê秘书「尼利亚ê kiáⁿ巴录」来做记录，伊「一一口授」hō͘巴录。

巴录，chit-ê名ê意思是「伊是应该受o-ló ê人」。伊是西底家之王宫大臣西莱雅ê兄弟（参考五十一：59），是先知耶利米ê得力助手，替先知耶利米写落来上帝ê启示，mā替伊收藏上帝beh伊购买tī亚拿突ê土地契约册（参考三十二：1—12），当耶路撒冷被巴比伦攻陷ê时，伊kah先知耶利米lóng被犹大人押到埃及ê答比匿（参考四十三：6）。

第5到7节，先知耶利米tī chia提起伊「被禁止上圣殿」，这是因为伊bat tī圣殿门口传讲上帝ê信息，亲像：第七章2到15节、第十九章14节到第二十章6节、第廿六章2到6节等等，伊ê话语引起人民kah市政府官员ê忿怒，因为án-ne被禁止继续tī民众聚集siōng chē ê所在—耶路撒冷圣殿ê所在传讲任何话语。M̄-koh上帝iáu是beh伊hō͘秘书巴录去，而且时间是tī「下pái禁食ê日子」，到圣殿去「向群众大声宣读」上帝hō͘先知耶利米ài伊记录落来ê话语。Án-ne，有可能「hō͘ hiah-ê tùi各地来ê犹大人ē-tàng听见」，而会知影悔改，「弃sak in邪恶ê道路」，这tú好说明先知运动ê共同主题：呼吁人民tio̍h悔改，认罪。所谓「邪恶ê道路」，是teh指去拜偶像。
第8节，「巴录照」先知耶利米ê指示去做，tī圣殿民众聚集ê所在「宣读了上主ê话」。

第9节，「约雅敬作犹大王ê第五年九月」，这是主前604年12月。这年九月ê禁食，真可能kah巴比伦军队攻陷了tī巴勒斯坦ê亚实基伦，而且开始进兵耶路撒冷有密切关系。然后犹大「人民为取悦上主，宣布禁食」，in希望用chit种方式取悦上帝。M̄-koh chit种想法kah方式lóng是错误ê。

第10节，巴录就án-ne照先知耶利米ê话去做，伊tī靠近「新门」ê所在宣读先知耶利米ài伊记录落来ê册卷内容。