耶利米书 32章16节 到 32章35节   背景资料  上一笔  下一笔
第16到25节ê chit段经文是先知耶利米信仰告白,mā是一篇非常好ê见证词。是先知耶利米向上帝所许ê祈祷词。Tùi第26到35节ê chit段经文是上帝回应先知耶利米tī第23节所讲ê祷词,thang清楚知影上帝为何会用hiah-ni̍h严厉ê手段来惩罚以色列人民。

第16到17节,先知耶利米讲上帝是「以家己ê大能大力创造天地」(参考耶利米书廿七:5),通常提起上帝ê「大能大力」,lóng是用来形容上帝带领以色列人民行出埃及。既然是大有能力ê上帝,就「无做bē到ê事」。

第18到23节,chit段经文是先知耶利米歌颂上帝ê颂词,伊讲:

上帝以「无变ê疼对待千万人」,m̄-koh mā会「因老父所犯ê罪报应kiáⁿ」。

上帝ê「计画伟大」、「作为非凡」,而且会照人心内ê意念作为审判ê标准(参考希伯来书四:12—13)。

上帝tī埃及行神迹奇事,以大能「领以色列人民出埃及」。

上帝信守「诺言」,kā「流奶kah蜜」之地赏赐hō͘以色列人民。

M̄-koh先知耶利米歌颂上帝了后,随时讲以色列人民tī得tio̍h上帝赏赐ê土地了后,就bē记得上帝ê恩典,「不服从」上帝ê命令,mā「不遵行」上帝ê教示,因为án-ne上帝施行惩罚,hō͘以色列人民「遭遇大灾难」。

第24节,koh一pái提起耶路撒冷城会因为为「战争、饥荒、瘟疫」遭遇加倍ê灾难。背叛上帝会有chit三种灾难ê降临一直是先知耶利米对以色列人民ê警语。

第25节,chit节是teh回应头前所讲ê,上帝ài先知耶利米去买地,而且是tī明明知影巴比伦帝国teh beh攻落耶路撒冷城,以色列人民会hō͘俘虏去做奴隶了,tī chit种前提下,上帝iáu是beh先知耶利米去买hit块属tī哈拿默ê土地。

第26到27节,koh一pái确定上帝无「做bē到ê事」,这是绝对无可能发生ê事。因为上帝是万物ê创造主,他事事lóng ē-tàng(参考创世记十八:14,约伯记四十二:2,马可福音十:27)。

第28到29节,上帝决定beh hō͘巴比伦王尼布甲尼撒ê军队来「占领」耶路撒冷。上帝án-ne决定,tāi-chì便会án-ne完成。而且chia清楚指出巴比伦王ê手段会真残酷,伊会「放火烧毁一切」。

第30到32节,chit段经文真清楚说明上帝会án-ne做出毁灭耶路撒冷城ê原因,是kui个犹大国集体ê犯罪行为,而且是一代续接一代,是「以色列kah犹大人民tùi开国以来一直作恶激怒」了上帝,而且耶路撒冷是tùi「建城以来,居民mā不断来激怒」上帝。Á koh khah令上帝所无法度容忍ê,就是chiah-ê以色列人民ê领袖,包括「君王、首领、祭司、先知,lóng做邪恶ê事」。

第33节,chit节讲tio̍h以色列人民kah社会领袖lóng「变面不认」上帝,chia ê「变面」一词,意思是teh指kā面背向上帝(参考以西结书八:16);mā就是表示去拜偶像神明。虽然上帝是一再差遣他ê奴仆先知去警告以色列人民,m̄-koh「in lóng是m̄听」。类似chit句警语一再出现tī耶利米书中(参考耶利米书七:25—26、十一:7—8、廿五:5、廿六:4—5)。

第34到35节,chia重复第七章30到31节ê话。

重新查询 专卷研经 耶利米书系列
错误回报,请联系comm[@]fhl.net