耶利米书 31章23节 到 31章40节   背景资料  上一笔  下一笔
Chit段经文讲述上帝救援ê手,mā kā带领南国犹大ê以色列人民重tńg来故土,而且hō͘过去已经荒废ê城镇,全部恢复繁荣ê景象。上帝beh kah重回故乡ê以色列人民重新立约,而且这新ê约kā会kah旧ê约无仝。因为新ê约是刻画tī人ê心版上,hiah-ê人kā永远bē bē记得。

第23节,对以色列人民来讲,耶路撒冷就是上帝ê圣城,是上帝所khiā起ê所在。有上帝ê所在,就会有公义ê上帝kah in tòa做伙。

第24到26节,chit三节讲tio̍h上帝会赐hō͘以色列人民有极大ê恩典,m̄-nā原本荒废ê城镇,lóng kā变成「人烟稠密」ê所在,而且会建构出安定ê生活环境,因为án-ne,「农人」thang安心种作,「牧者」thang安心放牧「in ê羊群」。Hiah-ê人以后be7 koh「iau饿」,大家lóng ē-tàng食得饱,而且ē-tàng安然入睡到天光,这是性命siōng大ê享受。

第27到28节,chit两节表示上帝会hō͘ chiah-ê tńg去故乡ê以色列人民,重新展现新机,荒废ê城市lóng会繁荣起来。因为上帝已经kā过去腐败、颓废ê现象lóng hō͘根除了。Chit种根除动作mā是原本上帝呼召先知耶利米出来传达信息ê时所hō͘ in ê使命(参考耶利米书一:10)。

第29到30节,「老父食了酸葡萄,kiáⁿ ê嘴齿酸pháiⁿ了」,这是当时流行ê一句俚语。先知以西结mā讲了chit句话(参考以西结书十八:2)。这kah出埃及记第二十章5节所讲,上帝beh追究人ê罪,tùi父到子,到三、四代ê讲法有真大ê出入。真可能是因为tī先知耶利米、以西结ê时代,有真chē人存有chit种想法,认为in chit-má会án-ne有灾难,会受痛苦,并m̄是因为in家己ê罪ê缘故,却是来自祖先ê罪过。M̄-koh chit-má先知耶利米、以西结对chit种看法真无掠做当然,in认为每一个人lóng tio̍h为家己所犯ê罪负责,无法度推卸责任。

第31到33节,当上帝带领受掠ê以色列人民重回故乡而且已经根除过去所有ê旧习了后,就beh kah in重新立约,而这新ê约kah旧ê约siōng大ê无仝,就是新ê约是刻tī「心版上」,hō͘ in永远记tiâu。因为in不时bē记得过去ê约,因为约ê记号是刻tī表皮上,mā就是割礼(参考创世记十七:7—14),á是tī西奈山下ê约,是写tī石头壳顶ê诫命(参考出埃及记三十一:18)。

第34节,thang讲是kui章经文ê中心,因为chit段经文讲tio̍h以色列民族kā kah上帝有一个全新ê关系,就是订立「新约」。其实「新约」ê特点kah旧约是仝款ê,就是以色列民族kah上帝之间ê关系永远bē分开。M̄-koh这「新约」有一个特点,就是hō͘原本分裂ê以色列民族重新合一,此后无koh分裂了。因为「全国顶下lóng认bat」上帝,而上帝就是in kui个民族ê连结剂仝款,koh khah重要ê,是上帝「beh赦免in ê罪,无koh记tiâu in ê过犯」。

第35到37节,chit段诗歌kah-ná kah前后ê经文lóng m̄连贯,有kóa圣经学者认为可能是后代编者所加添。不过,mā thang看出这是一首o-ló ê诗歌,teh描述kah上帝订立「新约」了后,以色列民族会享受安kah乐利ê生活,ná亲像天顶ê星辰一般bē改变。诗人用「日头」、「月娘星」、「波涛澎湃」等来表示过去混乱ê现象,taⁿ lóng kā恢复一切,ná亲像chiah-ê天顶ê星辰kah大海仝款,lóng展现了in原本该有ê秩序。「只要自然界ê秩序继续,以色列国运就会继续」,这真清楚说明除非上帝创造ê自然界已经失序了,chiah会hō͘新ê以色列国产生危机,若无,以色列国会永远长存。这mā说明无人ē-tàng理解上帝ê奇妙作为,ná亲像无人ē-tàng「量出天空ê极限」kah「测出大地根基ê深度」仝款。上帝拯救ê恩典就是chiah-ni̍h奇妙。

第38到39节,chia ê「哈楠业楼到角门」,这是分别设tī耶路撒冷城ê东北kah西北ê城墙。Á「迦立山」kah「歌亚」chit两个地点目前不详。

第40节,thang参考第三十七章所描述过ê。说明过去hiah-ê原是荒野、lóng无人迹ê所在,taⁿ lóng改变à。所有ê改变lóng是因为上帝奇妙ê作为,「耶路撒冷」会成做一个新ê、快乐ê、有希望ê、有上帝赐福ê所在。因为he是「圣城」,必定「无koh被拆毁,被破坏」。

重新查询 专卷研经 耶利米书系列
错误回报,请联系comm[@]fhl.net