耶利米书 25章15节 到 25章38节   背景资料  上一笔  下一笔
Chit段经文真清楚是一段非常严厉ê警告,讲上帝用酒杯kah杯里ê酒来表示对犹大人民惩罚。Tī前段有记载上帝beh带领受掠受难ê以色列kah犹大ê人民tńg去故乡,另外一个同时发生ê事,就是用惩罚hiah-ê欺压过以色列民族ê列国、族群,作为以色列kah犹大ê人民得tio̍h释放之方式。Tī先知文献中,类似chit种譬喻一再出现(参考以赛亚书五十一:17、22,耶利米书四十九:12,撒迦利亚书十二:2)。虽然是teh指tio̍h巴比伦帝国对犹大人民以及耶路撒冷城ê严重残害,m̄-koh,mā thang扩大看做是对所有背叛上帝ê人民,á是国家、族群所提出ê警告。

第15到16节,上帝ài先知耶利米带上帝hō͘伊「盛满大受气ê酒杯」,带到「各国,hō͘inlim」,hō͘ chiah-ê国家「lim了后会东倒西歪,疯狂乱撞」,用chit种ná亲像酒醉ê人ê样式,来形容「战祸」所带来ê混乱kah残害之严重。Chit种情形ná亲像以前上帝惩罚耶路撒冷kah in ê众领袖仝款(参考耶利米书十三:12—14)。

第17到18节,先知耶利米照上帝ê吩咐,就「tùi上主手上接落这酒杯」,然后kā这盛满上帝大受气ê酒杯「交hō͘上主差派」伊去ê各国,「ài in lim」落去。上帝过去用chit种方式惩罚「耶路撒冷、犹大各城镇,连同in ê君王kah官员」,taⁿ mā用chit种方式惩罚巴比伦kah各国,hō͘ in「成做别人诋毁、唾弃、诅咒ê对象」。所提起ê各国就是tī第四十六到五十一章中所提起ê。
第19到26节,chit段经文中看tio̍h列出来一份真长ê名单,lóng是teh-beh lim这惩罚之杯ê人。值得注意ê是最后一个名单,就是「巴比伦」mā列tī其中。它原本是上帝用来惩罚chiah-ê族群ê「奴仆」,m̄-koh因为巴比伦王自认为有强壮ê军事武力,是家己ê能力,kah上帝无关系,而m̄听从上帝ê话,结果引起上帝ê忿怒,终其尾mā tam-tio̍h灭亡ê果子。Ná亲像诗人ê诗中讲:「上主手上the̍h杯,杯中盛满伊震怒ê烈酒。伊kā酒倾倒出来;邪恶ê人lóng来lim,直lim到最后一滴。」(诗篇七十五:8)

第27到29节,上帝ài先知耶利米kā chiah-ê被列名单中ê国家讲,一定ài in lim下上帝惩罚ê烈酒之杯,而且是beh hō͘ in lim到「醉」了,而且是「呕吐、跋倒,koh khah án怎都爬bē起来」。圣经作者一再表示:只要上帝命令一出,绝对无可能逃避á是拒绝,却是「非lim这杯bē-tàng」,除了悔改求上帝赦免以外,别无他途(参考以西结书三十三:11)。上帝讲他beh先毁灭耶路撒冷,然后,上帝用惩罚耶路撒冷城ê方式,来惩罚顶面所讲chiah-ê国家。换句话讲,上帝既然连家己ê城lóng会án-ne不宽待,koh khah无可能宽待其它ê城镇、邦国、族群。Á上帝采用ê这苦杯,就是「用战争」ê方式,而战争所带来ê已经不止是众勇士彼此gia̍h刀剑厮刣而已,连带出现ê乃是全体国民ê iau饿、破病、伤残、家庭破碎、田野荒废等。

第30到31节,这是用上帝开庭审判万国万民来描述上帝惩罚ê方式。Chia讲上帝「tùi天顶发出震怒」,伊beh tùi他「神圣ê居所发雷霆」而且他发出怒吼ê声音,就「像踹葡萄ê人发出ê hoah声」。以色列人民采收葡萄ê时,beh kek葡萄酒chìn前,一定tio̍h先榨压葡萄汁,chit时hiah-ê人会一面踩踏葡萄,一面唱诗歌,á是呼喊,hō͘所有参与踩踏葡萄ê工人用一样ê节奏工作,这mā表示上帝ê惩罚是按部就班,连惩罚lóng真有计画。因为án-ne,每一个地方ê人「lóng ē-tàng听tio̍h」。

第32到33节,「灾难」kah「大风暴」仝款,是teh指上帝极大ê忿怒ê意思。上帝所列出来ê名单,无一个会遗漏、佳哉免得。因为是惩罚是「tùi一国到另外一国」、「tùi地球ê一头到另外一头」,四界lóng会看见「尸体」,m̄-koh无人「收殓埋葬in」,chiah-ê尸体只有ē-tàng当做「肥料堆在地面」,而且会hō͘野兽、飞鸟啄食、吞食。

第34到35节,chia koh一pái提起「人民ê领袖」,其实就是上帝所委派ê「牧者」。In会受tio̍h严厉ê惩罚,情景ná亲像「公羊被宰」刣仝款,chit种讲法tī先知耶利米一再提起(参考十:21、廿二:22)。「连一个mā逃bē过」,意思是teh指无人例外。

第36到37节,因为上帝发出大受气,ná亲像头前所提起ê,他beh对所有m̄听从他旨意ê人民kah领袖进行惩罚,结果「安逸ê国土成做废墟」,无任何人ē-tàng tī家己ê土地顶面过安逸ê生活。

第38节,「上主弃sak伊ê子民」,这表示上帝无koh看顾、保守in,失去上帝保守ê人民ê遭遇,就是危害in性命ê气力随时可能出现。

重新查询 专卷研经 耶利米书系列
错误回报,请联系comm[@]fhl.net