Chit段经文是继续第廿二章谈起上帝对犹大人民ê领导者之警告，同时mā是对犹大人民ê警语。一个国家á是民族会堕落，领导者固然tio̍h负起渎职、怠责ê责任，m̄-koh人民允准chiah-ê领导者怠忽职责mā tio̍h负责任。

Tī第廿二章24到30节是论到约雅斤王，照理应该继续论到西底家王。虽然chia无明显记录出西底家王，m̄-koh却thang看出chit段经文是论到伊kah伊ê幕僚人员，以及hit时chūn ê犹大人民ê问题。

第1到4节，圣经提供一个重要观念：所有上主子民ê统治者，lóng是hō͘上帝赋予来照顾上帝子民ê，ná亲像牧者为上帝放牧他ê羊群仝款。Á chiah-ê统治者、领导者，除国王外，包括先知、祭司、众长老lóng是。Chia先知指责in并无照上帝ê旨意，好好á看顾chiah-ê属tī上帝ê羊群。Chit种顾羊人必定会遭tú-tio̍h帝严厉ê惩罚，因为án-ne讲「惨lah」，因为上帝ài beh进行审判。上帝决定beh亲自扮演好ê顾羊人，他beh kā失散ê羊群，就是hō͘俘虏到「各国」ê羊群，尚且活teh「残存ê子民集合起来」，上帝lóng tio̍h亲自带领in「归回故土」。M̄-nā án-ne，chiah-ê残存而被他带领tńg来ê子民，lóng kā得tio̍h上帝赐福，ē-tàng「chē子chē孙，人口繁盛」。而且iáu koh khah「派领袖照顾in」，这表示上帝beh重新拣选新ê领导者来带领伊ê子民，ná亲像选出新ê顾羊人来照顾他ê羊群仝款。Án-ne，上帝ê子民就ē-tàng「无koh非常惊惶」，而且上帝mā「无koh惩罚in」。

第5到6节，「时chūn会到」，这是teh指上帝审判ê行动kah时刻。上帝beh「为大卫兴起正义ê『枝子』」，mā就是一位新ê君王，伊会「以公平正义治国」，hō͘人民thang「安居乐业」，因为bē koh再有战争，á是有战争mā bē危kah到in khiā起生活ê所在（参考以西结书三十四：25）。人民thang「享受太平」ê生活。

第7到8节，这是重复第十六章14到15节ê句话。表示上帝过去带领以色列人民离开埃及，带领in进入应允ê迦南地，而chit-má是beh带领in离开巴比伦帝国tńg来归故乡迦南地。Chit种新ê应允，就ná亲像先知以赛亚所传出ê信息，讲以色列民族会建立一个全新ê国度，就ná新天新地一般，充满上帝ê赐福（参考以赛亚书六十五：17—25）。