耶利米书 23章9节 到 23章32节   背景资料  上一笔  下一笔
Tùi第9节开始,一直到chit章ê结束,chit段经文是针对hiah-ê假先知所讲ê惩罚信息。先知耶利米时代,mā是动乱ê时代,tī动乱时代中,siōng容易出现假先知来搅乱人民。

Chit段经文mā指出假先知ê真面貌,in专门讲kóa不切实际ê信息,而chiah-ê信息lóng m̄是上帝ê启示,是in家己ê想像。因为án-ne,上帝一定会用严厉ê惩罚对待in。

第9到10节,先知耶利米讲伊「心破碎」,因为听tio̍h假先知ê话,就会「全身pi̍h-pi̍h-chhoah」,表示无法度接受in用上帝ê名传假ê信息?上帝「神圣ê话」kám是ē-tàng随便用家己想讲ê话取代。因为án-ne,先知耶利米形容家己听hiah-ê假先知所传达ê信息了后,郁卒到极点,kah-ná「被酒灌醉ê人」仝款,m̄知该án怎讲chiah好。伊讲四界lóng有充满tio̍h「对上主不忠ê人」,去拜偶像神明ê人民非常chē,m̄-koh chiah-ê lóng kah假先知ê行为有关。因为án-ne,上帝决定beh严厉惩罚,就是hō͘天空无koh落雨,土地干旱,牧场ê草会lian去。

第11到12节,chia清楚指出上帝ê奴仆「先知kah祭司lóng m̄敬虔」。In甚至「tī圣殿里做pháiⁿ事」,chit句话thang参考耶利米书第三十二章34节,另外参考列王记下第廿一章5节,以西结书第八章5节、10节、16节等等。Chiah-ê经文lóng清楚指出in是kā上帝ê圣殿,khǹg并列了偶像,拜上帝mā同时拜偶像神明。为chit-ê缘故,上帝决定beh「降灾难」来「惩罚」in。

第13到14节,「撒马利亚先知」是借用「巴力神明ê讲预言」,这tú好说明chiah-ê先知m̄是属tī上帝ê先知,in是名符其实ê假先知。续落来tī chia指出犹大「耶路撒冷众先知koh khah 可恶」,in是无恶m̄做,包括「奸淫,讲白贼,怂恿人做pháiⁿ事」等,in kah-ná bē记得家己是上帝ê奴仆。上帝决定用对待「所多玛」kah「蛾摩拉」这两城ê方式来惩罚in。

第15节,chit节重复耶利米书第九章15节ê话语。对tī无忠实ê上帝奴仆先知,上帝一定会严厉惩罚,beh hō͘ chiah-ê假先知「食苦果,lim毒水」,原因是tī各地「散播不敬虔ê风气」,意思是teh指生活态度随便,而且带头拜偶像。

第16到17节,上帝beh耶路撒冷人民m̄-thang koh再听信hiah-ê假先知ê信息,因为in所hō͘ ê信息lóng是「虚幻」不实在ê假信息,m̄是上帝ài in讲ê话,甚至危险来临ê时chūn,mā讲真安全,he是错误ê信息。

第18节,「上主ê天庭亲自听伊讲话」,这表示是tùi上帝ê宝座发出ê信息。真正先知,会得tio̍h上帝ê启示,讲真实ê话。M̄-koh假先知kā家己所想ê,当做是上帝ê旨意来发言。另外一方面,上帝ê奴仆先知,khiā tī「上主ê天庭亲自听伊讲话」,chit句话mā teh表示每一个先知lóng一定tio̍h面对tio̍h上帝ê审判。

第19到20节,chit两节经文tī第三十章23到24节koh一pái重复出现。

「上主ê忿怒像强烈ê旋风」,这是描述上帝非常受气。「旋风」,teh代表威胁性命ê气力。「pháiⁿ人」,就是teh指chiah-ê假借上帝ê名发言ê人,而且是发出错误ê信息来迷惑上帝ê子民。上帝发出ê忿怒,会一直到「完成家己一切ê计画」chiah会停止,chit时chūn,以色列人民「chiah会完全明白」chit位带领in tńg去故乡ê上帝chiah是in ê主宰。

第21到22节,上帝真清楚甚么人是真正先知,甚么人是假ê。假先知会一再假借上帝ê名发言。相对ê,真正先知是传达上帝hō͘伊ê信息,并且忠实地kā上帝ê信息传达出来,hō͘听tio̍h上帝信息ê子民知影tio̍h「弃sak邪恶,m̄做pháiⁿ事」。

第23节,「我是无所不在ê上帝。」chit句话讲出基督教所信仰ê上帝之三大特性:一是无所不能、二是无所不知、三是无所不在。Chia上帝讲他是无所不在,mā同时teh表示kui个宇宙lóng是他创造ê,他是主。

第24节,chit节thang参考诗篇第一三九篇7到12节,真清楚说明上帝m̄-nā是tī所有ê空间,包括所有ê时间在内,lóng是属tī上帝ê范围。因为án-ne,chia讲「无论天地ê toh一个角落」lóng会有上帝teh看顾。

第25到27节,chit节真清楚讲tio̍h有人冒用上帝ê名讲预言「骗人」,chit种人就是所谓ê「假先知」。Chit种人siōng大ê特点,就是会对民众讲,伊tī「梦中得tio̍h」上帝ê启示。其实,ná梦是in「家己编造ê」,m̄是真实ê。因为是虚构ê梦,chiah会hō͘人民「bē记得」上帝,无koh相信上帝。

确实在圣经中有一种属tī主前第八世纪出现ê「以罗伊文献」资料,记载上帝会透过天使、异象、梦等三种方式来hō͘人了解他beh讲ê话á是他ê旨意。

Chiah-ê假先知就是用chit种tī「梦中」遇tio̍h上帝ê方式来欺骗人,结果hō͘相信ê人民mā tòe in误入「歧途」,偏离了上帝ê旨意kah教导。M̄-nā án-ne,「in骗人」iáu m̄知tio̍h收敛,国家已经面临存亡ê时刻,却iáu teh继续欺骗ê行为。

第28节,chit节讲出审判ê一个基础,就是分开、分辨清楚。真假先知之间siōng大ê差别就是,真先知会「忠实地传达」上帝ê信息,而假先知kan-taⁿ会「做梦」,然后用所讲ê「梦语」来欺骗人。这ná亲像「杂草kah麦á」,是完全无相仝ê物件仝款。

第29节,chit节讲上帝ê「信息像焰火」,这mā是先知耶利米ê经历(参考耶利米书二十:9),ē-sái领受tio̍h信息ê先知即使面临性命ê危险mā tio̍h讲出来。Á上帝ê信息mā「像一把击碎岩石ê铁锤」hit种有力。只要是真正kā上帝ê信息忠实传达出来,确实注意听ê人一定会悔改,就ná尼尼微城ê人民仝款。

第30到32节,chia讲tio̍h假先知ê手段,就是欢喜彼此利用,chit种作法ná亲像诈骗集团ê方式,彼此利用来欺骗无知ê人民,假先知就是「彼此引用对方ê话」,而且除了讲「白贼」外,mā会kā所讲ê hō͘ in夸大,kā in家己编织出来ê梦话当做是上帝ê话teh「传达」。其实,chit种行为等于是乱使用上帝ê名仝款,是十诫所禁止ê行为(参考出埃及记二十:7),上帝一定会对付chit种人。因为chit种人对众人m̄-nā无好处,反tńg会误导人民行入歧途,弃sak上帝。

重新查询 专卷研经 耶利米书系列
错误回报,请联系comm[@]fhl.net