耶利米书 11章1节 到 11章17节   背景资料  上一笔  下一笔
Tùi chit章开始直到十二章6节,chit段经文ê背景是kah犹大ê约西亚王推动之宗教改革运动有关;然后第十二章7到17节是一首哀歌,是一首有关犹大被巴比伦帝国蹂躏以色列人民ê哀歌。

Chit段诗歌koh一pái提起上帝ài先知耶利米去犹大各城镇宣告kah上帝所立ê约,并且警告in若是弃sak kah上帝所立ê约,kan-taⁿ会为in带来上帝ê诅咒kah惩罚。Tī chit段经文中一再重复「chit-ê约」一词,这「约」是teh指约西亚王洁净耶路撒冷圣殿ê时,tī圣殿中所发见ê约册。约西亚王bat努力进行宗教改革ê工作,kā全国各地所有ê偶像神明,以及异教ê祭坛lóng摧毁殆尽,伊chit种严厉进行ê扫荡,有淡薄á获先知耶利米ê赞赏,并且hō͘ in极高ê评价(参考耶利米书廿二:15—16)。M̄-koh约西亚王往生后,伊ê kiáⁿ约雅敬继位执政ê时,马上就kā in父亲约西亚王所做ê改革全部废弃,甚至iáu koh一pái重建原本已经被摧毁ê偶像祭坛,并且带领人民去敬拜hiah-ê偶像神明,原本反对宗教改革ê气力koh一pái兴起,m̄-nā kā in本来kah约西亚王tī耶路撒冷圣殿所做ê誓言lóng bē记得kah chheng-khì-liu-liu,iáu快速地tńg去敬拜偶像神明。这可能kah in tú-tio̍h实际生活ê困境有关(参考四十四:15—19)。

第1到3节,chia讲上帝ài先知耶利米向犹大人民讲话,真清楚表示「甚么人不遵行chit-ê约,甚么人就受咒诅」,chit-ê约是teh指in kah上帝之间所立ê性命之约。

第4到5节,「tùi埃及,tùi hit-ê火烧tio̍h火炉中」,chit句话thang参考申命记第四章20节,是teh形容以色列人民tī埃及生活ê景况,确实是非常艰困,甚至已经进入到死亡ê边缘,chiah会用「火烧tio̍h ê火炉」chit-ê词来形容。上帝是伸手tùi这「火烧tio̍h ê火炉中」kā以色列人民ê「祖先带出来」,并且iáu kah in立约。Chit-ê约真清楚表示:只要in遵守上帝ê命令,就是上帝ê子民,上帝一定会实现对in祖先所发过ê誓,赐hō͘ in一块流奶kah蜜ê地thang khiā起。

第6到8节,chit段经文讲上帝ài先知耶利米到犹大全国各地去,甚至到每一个城镇ê大街小巷里传达上帝ê信息,就是ài in服从上帝ê命令。M̄-koh tùi in祖先开始,就一再拒绝听从上帝ê话,mā拒绝遵守上帝ê旨意。因为án-ne,上帝beh照所立之约来惩罚in。

第9到10节,上帝透过先知耶利米指控「犹大kah耶路撒冷人阴谋背叛」,chia所讲ê「阴谋背叛」,意思是teh指有计画ê拜偶像行动,包括建造祭坛,kah举行献祭礼仪等等。讲犹大人民「koh犯祖先所犯ê罪」,就是弃sak上帝去拜偶像神明。Chit种行为清楚表明in「破坏了」上帝kah以色列人民祖先之间所「立ê约」。

第11节,chit节tī第14节koh一pái叙述一pái,mā thang参考耶利米书第七章16节、第十四章12节。当审判临到in身上,陷入性命困境ê时,就算in发出哀求ê声音,上帝mā bē垂听。因为in所tú-tio̍h ê性命苦难,是kah上帝ê惩罚有密切关系。

第12到13节,犹大人民因为上帝不回应in ê哀求,就án-ne转向hiah-ê偶像神明祈求,m̄-koh偶像神明是假ê,无论in怎样哀求,都无用,因为hiah-ê假ê神明bē讲话,mā bē行路,koh khah bē动,根本是lóng无价值thang讲ê人造神明(参考耶利米书十:3—5、14—15)。Koh khah害ê是偶像神明竟然充满tī各地乡镇ê大街小巷中。

第14节,chit节thang参考第七章16节、第十四章12节等等。这lóng是teh说明上帝ê愤怒已经达tio̍h siōng koân点,chiah会拒绝听人tī苦难中发出ê哀求拯救之声。上帝koh一pái kā先知耶利米讲,不ài伊koh再为犹大人民祈求,因为上帝无想beh听。

第15到17节,chit两节讲出以色列人民tī信仰上已经堕落到分bē清楚到底in所信ê神是甚么人了。In除了敬拜偶像神明外,mā继续tī耶路撒冷圣殿中献祭,koh khah严重ê是,in iáu认为用「献牲祭就ē-tàng消灾」,这是非常荒谬ê信仰认知kah态度。先知文献中一再提起上帝所kah意ê,并m̄是献祭hō͘他,却是用谦卑ê态度遵照他ê话语去行(参考弥迦书六:6—8,何西阿书六:6,阿摩司书五:21—24)。

过去上帝栽种以色列民族ná亲像栽种特选ê果子树,「用ê是siōng好ê葡萄种」,m̄-koh chit-má上帝beh用「sìh-nà」来「烧光」、「折断」它。理由是以色列民族「作恶,家己招惹了chit pái ê灾祸」,而chit种灾祸是kah in「向巴力献牲祭」ê恶质行为有密切关系。

重新查询 专卷研经 耶利米书系列
错误回报,请联系comm[@]fhl.net