雅各书 2章14节 到 2章26节   背景资料  上一笔  下一笔
雅各书作者写chit本书信ê时代,大约是tī主后六十年代写做ê,in中间有bē少人lóng是来自犹太教传承ê第一代信徒,因为过去tī犹太教ê信仰中已经养成了hit种随便ê信仰态度,即使转换做耶稣ê信徒,mā是仝款,并无tùi根本上改造做起,因为án-ne,chiah会teh实践信仰ê行动上缺乏力量。这mā是行洗礼约翰出来传信息ê时警告hiah-ê前来受洗ê犹太人讲ê,tio̍h用实际行为来证明in确实有悔改,m̄-thang认为有祖宗亚伯拉罕作in ê保证人,he是无用ê(参考马太福音三:7—9)。

雅各书作者Tī chit段经文中一再强调,信心若是无搭配实际ê行动,就无见证thang讲。无见证ê信仰,等于无信仰仝款。因为án-ne,做一个信徒beh kah上帝建构合宜ê关系,就是beh用实际行动表现出来,若无,就是无信心。

第14节,所讲ê「如果有人讲伊有信心」chit句话,表示家己讲ê并无算数,因为信心m̄是家己讲ê,而是beh用实际行动表现出来chiah算数。

第15到16节,作者引用一个生活中siōng简单容易bat ê例,来说明伊ê观点。伊讲如果有人「无得穿,无得食」,一个有疼心ê人会马上就有所反应,而bē讲beh用祈祷帮助伊,á是用祝福ê方式回应chit-ê sàn-chhiah者ê苦难。Chit对无得穿,无得食ê人来讲,是不切实际ê。

第17节,「信心无行为就是死ê」,chit句话ē-sái讲是雅各书作者想beh表白ê思想中心,tī第26节koh一pái提起。Chit节所用ê「死」chit-ê字,tī希腊文是「nekros」,意思是teh指无性命ê活力,bē弹动、反应ê现象。

第18节,chit节反应了早期教会有人为tio̍h信心kah行为之间孰重、孰轻有纷争,作者认为he是错误ê信仰认知,因为伊认为信心kah行为是一体ê两面,两个无法度分割。

第19节,作者讲「邪灵」mā相信只有一位上帝。换句话讲,基督徒相信只有一位上帝是无够ê。因为án-ne,基督徒若是m̄免实际行动来证明伊心中真正相信上帝,án-ne就无甚么意义thang讲,因为邪灵mā án-ne相信,而且iáu「非常惊上帝」。

第20节,chit节做一个简单ê结语:无行为ê信心是无用ê。因为无法度产生信心ê效果出来。

第21到24节,作者采用创世记第十五章6节,讲亚伯拉罕是hông称做义人在先,而后chiah有创世记第廿二章1到19节记载有关亚伯拉罕献以撒ê故事为例,说明信心kah实际行动搭配ê重要性。作者ê意思是teh指亚伯拉罕就是因为先对上帝有绝对ê信心,所以当上帝beh伊kā独生kiáⁿ以撒做献祭品ê时chūn,伊一屑á 都无憢疑地就遵照上帝ê旨意去行。伊无停留tī「思考」ê层面phah转,一再询问上帝为甚么beh án-ne?伊遵照对上帝ê信心去行。作者强调只有tī实际行动之下显示出来ê信心,chiah是真实ê。

第25节,作者koh举了另外一个例,就是约书亚记第二章所记载ê一则有关妓女喇合ê故事。作者讲喇合就是因为排除困难,帮助约书亚ê密探逃离受掠ê危险,因而成做上帝ê子民。因为伊深信带领以色列人民行出埃及ê上帝chiah是真神。

第26节,chit节就是所读chit段经文ê总结,作者koh一pái重复强调:信心kah行为是一体ê两面,无法度分开单独阐述。Chit-ê「气息」一字,tī希腊文是用「pneuma」chit-ê字,它ê意思是teh指「空气」,mā thang做「风」、「呼吸」解释。换句话讲,「pneuma」是teh指活动ê「气流」,m̄是停止ê状态。因为身躯若是无流动ê「气息」,就表示chit-ê人已经死去。

重新查询 专卷研经 雅各书系列
错误回报,请联系comm[@]fhl.net