以赛亚书 66章1节 到 66章11节   背景资料  上一笔  下一笔
Tùi第六十五章开始,是用「上主讲」作为基础,(参考第1、8、13、17、25等节),表明这是上帝beh传达hō͘他所拣选子民ê信息,然续后接到第六十六章,继续出现「上主án-ne讲」(参考第1、9、12、17、23等节)chit种语调,koh一pái teh提醒以色列人民tio̍h注意听上帝所hō͘ ê信息。

第六十六章iáu有一个特别值得注意ê所在,就是tùi上帝ê圣殿开始(参考第1节),mā以敬拜上帝ê圣殿做结尾(参考第20到23节)。会用圣殿作为kui章结构ê主轴,是为tio̍h beh澄清一个基本信仰认知:敬拜上帝,并不在tī人ê手所建造起来ê有形建筑物,而tī人心内ê真诚、敬虔。因为án-ne,敬拜ê中心虽然是讲耶路撒冷ê殿宇,m̄-koh这耶路撒冷就是第六十五章17到19节所提起ê,是一个「新」建造起来ê耶路撒冷城,he是性命bē受tio̍h威胁ê所在,是用上帝为性命主宰ê快乐园地。

Chit段经文敬拜上帝ê方式kah地点,并不在有形ê圣殿á是现代所谓ê「礼拜堂」,重点是tī tio̍h喜爱听从上帝ê信息,无论tī tó位敬拜,只要ē-tàng传达上帝ê话ê所在,就是有上帝ê殿teh敬拜ê人ê心中。Koh讲,chit段经文mā讲出上帝赐福ê子民,一定会享受ê福气,作者用妇女有娠临盆,以及婴á食老母ê奶,来形容婴á出世带hō͘全家人ê欢喜。

第1到2节,chit两节提起上帝问他ê子民,ē-tàng为上帝建造「toh种殿宇」hō͘他作为「tòa所」?这是因为tī以色列人民tńg去故乡了后,lóng tī为tio̍h建造圣殿而无闲,因为án-ne有人反应建造圣殿成做in ê生活负担(参考尼希米记五:1—5)。

「天是我ê宝座,地是我ê脚凳」,chit句话参考以赛亚书第四十章22节;历代志上第廿八章2节。Chia用「天」kah「地」来形容,表示kui个宇宙之空间,lóng有上帝ê同在。Mā表示天地lóng是上帝「亲手创造」ê,包括「宇宙万有」lóng是。

「我看顾谦卑痛悔ê人」,chit句话kah头前ê建造殿宇有密切关系。上帝所kah意ê,并m̄是外表建筑物,却是心内对上帝ê忠实。「谦卑」,这表示人心中知影家己ê有限kah软弱,清楚知影家己是「人」,án-ne chiah可能谦卑落来。Chit种人chiah「喜爱听从」上帝ê话,而听从上帝ê话,就会享受tio̍h性命ê欢喜(参考六十五:11—13)。

第3到4节,thang参考以赛亚书第一章11到14节。

「讲到一般人」,这是teh指不敬拜上帝、拒绝上帝为in性命之主ê人。Chia特别指出「用人做牲祭」ê迦南人,in认为án-ne做thang为大地消除灾难,mā会为土地带来生产作物ê气力。M̄-koh这是错误ê认bat,因为真正会赐福hō͘土地带来生产丰富五谷ê是上帝,m̄是chiah-ê虚假ê神明。因为án-ne,上帝决定beh「降落siōng惊人ê灾祸」,因为上帝「呼叫,in无回答应」,上帝「讲话,in m̄听」,而且是「故意不服从」上帝,而且去做他「无欢喜ê pháiⁿ事」,就是teh指去拜偶像。

第5节,chit节提起「敬畏上主」,就是对上帝对忠实ê人,mā会tú-tio̍h极大ê侮辱,kah hō͘人所「恨」,甚至是hō͘人「拒绝来往」,陷入孤独、无助中,chiah-ê lóng tī说明对上帝忠心ê人,mā会tú-tio̍h性命困境,m̄-koh上帝一定会伸手救助。

第6节,chit节是teh回应第5节所讲ê,当时hiah-ê悖逆上帝ê人,认为上帝并无会干涉世间ê事,其实不然,上帝对hiah-ê侮辱他ê人,上帝绝对bē有看kah-ná无看tio̍h、听而不闻。上帝一定会进行惩罚,chia就提起上帝惩罚带来ê哀嚎声音。

第7到9节,chia用妇女有娠生产来形容性命出世做譬喻。先知以赛亚强调从来无发生过ê事就是tī有一个国家tī「一工之内、一下á生落来」,这是teh表示in亡国chiah-ni̍h久,m̄-koh,独立建国会真紧to̍h发生。就算妇女有娠生kiáⁿ,mā需要有十个月怀胎ê时间,m̄-koh beh建立一个国家应该会需要koh khah长ê时间,m̄-koh chia讲「一工之内、一下á」就出现chit-ê国家,表明上帝一定会成就chit件tī人看起来是无可能ê事。

第10节,「tio̍h kah耶路撒冷同齐欢乐」,tī chit chìn前,耶路撒冷城被巴比伦摧毁ê时,是悲伤、痛苦。Taⁿ上帝m̄-nā带领in tńg去故乡,而且有能力hō͘ in tùi废墟中重建chit-ê城,并应允beh hō͘ chit-ê城繁荣成做世界ê中心(参考以赛亚书四十九:19—20)。

第11节,chit节thang参考以赛亚书第六十章16节。

因为上帝beh hō͘耶路撒冷城为万国聚集敬拜上帝ê中心,因为án-ne,大家lóng会聚集做伙tī chia,hō͘ chit-ê城ná亲像老母丰满ê乳房,有源源不断ê奶汁流出来仝款。用chit种方式来形容城市繁荣ê景象。

重新查询 专卷研经 以赛亚书系列
错误回报,请联系comm[@]fhl.net