以赛亚书 55章1节 到 55章13节   背景资料  上一笔  下一笔
Ná亲像前一章已经提起过ê,第五十四到五十五章,就是第二ê时期以赛亚书ê总结,讲述上帝beh重新复兴,并且重建耶路撒冷kah以色列人民。Chit章ê主题就是teh强调,一定会「听上帝ê话」,这mā是圣经一再强调ê中心思想:性命ē-tàng存活是因为顺服上帝ê话。

Tùi chit章ê诗歌中mā thang看出人性ê软弱;当以色列人民tùi巴比伦被波斯帝国释放回乡、重建家园了后,无jōa久受tio̍h过去tī巴比伦生活近半世纪ê物欲化生活所影响,以色列人koh一pái bē记得上帝ê话。因为án-ne,先知以赛亚koh一pái提出呼吁,tio̍h以色列人民记tiâu上帝ê话,chiah是性命真正重要ê生存要件。

第1到2节,诗人先知以赛亚一开始就讲「嘴干ê人,来pah」,呼吁所有上帝ê子民tio̍h注意听上帝ê信息,就kah-ná对「嘴干」ê人讲「chia有水lim」,mā亲像上帝带领以色列人民出埃及进入旷野ê时,hō͘石磐涌出泉水kā in赐福,mā ná亲像tùi天顶降落吗哪养饲in,chiah-ê水kah粮食lóng「m̄免开钱,不付代价」,而且赏赐kā in赐福khiā起ê迦南地乃是流奶kah蜜之地。既然án-ne,为甚么上帝ê子民iáu koh khah「开钱去买ná食bē饱ê物件」?「为甚么浪费工钱」去买chit种食bē饱,á是讲食了,结果iáu是「iáu-koh iau饿」ê物件?先知ê信息真清楚,ài in注意听上帝ê话语,照上帝ê吩咐去做,就会「享受siōng好ê食物」,mā才能hō͘ in ê「心灵得tio̍h饱足」,因为上帝ê话语是心灵ê食物。

第3节,chia真清楚讲出「注意听」上帝ê话,就ē-tàng得tio̍h「性命」,因为上帝就是用他ê话创造宇宙万物ê性命。M̄-nā án-ne,只有听从上帝ê话ê子民,上帝就会kah chit种子民「立永远ê约」,而且chit-ê约是kah大卫有关,表示上帝bat应允大卫,beh hō͘伊ê kiáⁿ孙永远掌理犹大王国,先知以赛亚用chit种方式讲出上帝极大ê慈爱(参考以赛亚书五十四:10)。
第4到5节,thang参考创世记第十二章3节。

先知以赛亚tī chia koh一pái重申上帝对大卫ê疼,上帝beh hō͘ kah他立落来性命之约ê子民「作万国ê领袖kah元首」,并且beh「藉tio̍h」Chit位被拣选ê领袖,彰显出上帝ê能力,hō͘「列国」lóng来归顺「投靠」,成做极大ê「荣誉」。

第6到7节,先知提出诚恳ê呼吁,ài大家「趁上帝teh chhōe」、「thang靠近」ê时chūn,赶紧「chhōe」、「求告」上帝。Chhōe、求告上帝ê人必定会「弃sak邪恶ê道路」,并且「回心转意」,chit种人一定会得tio̍h上帝ê「怜悯」、「阔赦」。

第8到9节,chit两节讲出上帝kah人之间ê cheng差;上帝是永恒ê,而人ê性命却是目nih-á ê;上帝是看人心内ê「意念」,而人却只有ē-tàng看tio̍h人ê外表。Chia所讲ê「道路」,是teh指性命ê方向、目标。

    第10到11节,chit两节强调只要上帝ê话一出口,必定照他家己ê旨意完成。上帝ê话,包括他对人ê应允。所谓上帝ê话「像雪kah雨tùi天而降」,意思指上帝ê话是滋润大地ê细雨、甘霖,ē-sái大地充满蓬勃ê性命力(参考诗篇六十五:9—13)。如果人听从上帝ê话语,就会亲像án-ne充满活力,bē lian去。因为上帝ê话永bē改变(参考以赛亚书四十:8),而且一定会照所讲ê实现,「从来m̄-bat落空」。

第12到13节,chit两节koh一pái指出上帝beh带领他ê子民「欢欢喜喜」kah「平平安安」地tńg去故乡。因为是上帝亲自带领in离开巴比伦(参考五十二:12),就ná亲像早年上帝带领以色列人民ê祖先离开埃及仝款,in经过ê路径连树木mā会拍手叫好。Chia用「松柏」kah「番石榴」来做上帝应允ê记号,chit两种树木kah果子是上帝应允ê记号。

重新查询 专卷研经 以赛亚书系列
错误回报,请联系comm[@]fhl.net