以赛亚书 45章1节 到 45章8节   背景资料  上一笔  下一笔
第四十四章28节是为第四十五章做简单ê绍介,其中记载上帝teh-beh拣选波斯帝国皇帝塞鲁士成做他羊群ê牧者,而且为以色列人民回乡后重建家园出力,chit件记事tī历代志下第三十六章22到23节已经有清楚记载。Tī以斯拉记第一章有清楚记载塞鲁士bat下命令,并且归还所有巴比伦帝国皇帝当年摧毁耶路撒冷kah圣殿ê时,所掠夺ê所有圣物。

Chit段诗歌表达一个非常重要ê观念:上帝拣选某人á是某一个国家完成他ê计画、旨意,并m̄是因为in有甚么特别要件,却是因为上帝拯救ê计画。因为án-ne,受拣选者,无法度因为án-ne而骄傲。Koh讲,chit段经文mā讲出一个领导者、当权者认清,并m̄是因为家己有甚么伟大,却是因为上帝赋予伊ê使命kah责任,ná亲像主人kā看顾羊群ê责任付托hō͘顾羊人。相对tī拣选塞鲁士来负起牧养ê工作,mā是teh表明上帝看tio̍h他所拣选ê子民受难,并无缩tńg来他ê手,mā无弃sak in。咱thang tùi chia确信,一个kah上帝有约ê基督徒,上帝永远bē bē记得、弃sak。只要人知影悔改,上帝永远phah开他ê双手,随时准备伸手救助。

第1到4节,chit段经文特别讲「上帝膏立塞鲁士」,当圣经用「膏立」用这名词ê时,有含上帝特别拣选ê旨意。既然是上帝所膏立ê君王,mā表示上帝beh赐hō͘ chit-ê人能力、权柄,然后「差伊去削减诸王ê权力」,借用伊ê手hō͘所有被掠到外国去做奴隶ê以色列子民ē-tàng回乡重建家园。M̄-nā án-ne,上帝iáu koh khah「亲自」为伊「开路」,并且koh伸手为伊「削平大细山冈」,而且「攻破铜门」,hō͘伊ē-tàng完成上帝所付托hō͘他ê旨意。Koh讲,chia mā特别提起上帝拣选塞鲁士皇帝,并m̄是因为伊「认bat」上帝,却是上帝「认bat」伊。这mā讲出上帝拣选甚么人当他ê奴仆,是上帝家己teh决定,而且chit种决定并m̄是根据人ê条件á是标准。

第5节,tùi chit句「我是上主」、「我以外无别ê上帝」,就thang看出先知以赛亚信息lóng kā重心lóng khǹg tī chiah-ê基础信仰上,chiah-ê句话koh一pái重复tī第6节、第14节、第18节、第21节、第22节。圣经一再提供一个重要信息:上帝拣选ê奴仆,上帝会伊赐力量,hō͘伊thang排除所有困难,完成上帝所付托ê使命。

第6到7节,「普天下」、「tùi日出到日落之地」、「造光明」kah「造乌暗」,kah「降福」kah「降祸」等用语lóng tī说明上帝是宇宙万物ê主宰。Chit两节表明ê就是:赏赐性命ê是上帝,结束性命ê主权mā tī上帝手中。因为性命lóng是tùi上帝来,mā会tńg来到上帝手中。Ná亲像约伯所讲ê「上主赏赐ê,上主koh收tńg来」仝款(参考约伯记一:21)。

第8节,chit节ē-sái讲是tùi第四十四章22节开始到第四十五章7节ê总结。主要teh说明,上帝照他ê旨意做tāi-chì,进行他拯救ê工作。

重新查询 专卷研经 以赛亚书系列
错误回报,请联系comm[@]fhl.net