以赛亚书 44章1节 到 44章20节   背景资料  上一笔  下一笔
Tī chit章中先知以赛亚继续提起一个重要ê信息:真正上帝,是宇宙万物ê创造主。Tī chit世界上,无任何一个神明ē-tàng kah他比并。若m̄是chit位创造主所拣选、指定ê奴仆,就是假ê,bē-tàng信,ná亲像hiah-ê崇拜偶像神明ê愚戆者仝款。

Chit段继续前第四十三章所提起ê,先知呼吁以色列人民tio̍h听从上帝ê声音。因为in是属tī上帝拣选ê子民,是上帝ê奴仆。先知以赛亚Tī chit段经文中mā真清楚teh谴责hiah-ê弃sak真正万军统帅—救赎主,而去拜虚假ê神明ê人,in ê愚笨tú好kah hiah-ê无用ê虚假之神仝款。

第1到2节,chia连续两pái lóng讲以色列民族是上帝ê「奴仆」,而且是上帝ê「选民」,是上帝所「意爱ê选民」,表示tī上帝对以色列民族确实是情有独钟,对in mā有特别ê期待。

第3到4节,因为是上帝亲自拣选,因为án-ne,上帝「赐力量」,hō͘以色列民族,hō͘ in thang tī艰困、恶质ê环境下,mā thang生长kah像栽种tī溪水边ê青草、杨柳树一般,生做非常「茂盛」,永远bē lian去。

第5节,因为有上帝ê灵(力量)灌ak tī以色列民族ê身上,而且lóng tī in ê「手股头上刺tio̍h上主ê名号」,因为án-ne,吸引koh khah chē人趋之若鹜,跟tòe向往beh来分享。Koh讲,chit种「上主ê名号」mā代表in kah上帝有特殊关系。古代奴隶lóng会tī手股头á是额头壳顶刺tio̍h主人ê记号,表明主仆ê关系。以色列民族就是上帝ê奴仆,后来改变用割礼做记号。

第6到7节,chia用「开始」kah「终结」Chit两个词来形容chit位创造主是永恒ê上帝,mā是人类kah世界ê主宰(参考四十一:4,启示录一:8、17)。Tio̍h注意ê是「开始」Chit-ê词,意思是teh指他m̄是tùi甚么所在出现,mā m̄是tùi某一个存在物开始,他是原本就已经有ê,而且万物lóng是因为他「开始」。Á「终结」Chit-ê词有两种意义;一是teh指万物lóng终结ê时chūn,他iáu是继续存在。Koh讲,他无hông时间所限制。这就是chia所beh表达ê信仰观念:除了chit位创造万物ê主宰,无任何上帝、神明,ē-tàng kah chit位宇宙万物ê主相比。

第7节,chit节koh一pái强调真正神,是会预言将来beh发生ê事,而且所预言ê,lóng必定会实现。因为万物kah万事lóng是tī chit位创造主ê手中才能出现、发生。Chia用「预言将来ê事」、「Kā beh发生ê事宣布出来」、「甚么人ē-tàng做我做过ê事」等句话,表示无任何一位神明有án-ne ê能力。

第8节,上帝beh他拣选ê以色列子民m̄免「非常惊惶」,原因上帝是历史ê主宰,却m̄是人tī创造历史。In是上帝「大能力」ê见证人。Chia ê「大能力」,另外一个意思是teh指「石磐」、「óa靠ê气力」ê意思。表明是永远可靠ê气力。

第9到11节,chit三节经文m̄-nā提起虚假ê神,是用人ê手所雕刻出来ê偶像,而去拜chit种假神ê人,mā会kah in仝款受tio̍h侮辱。Chia特别指出「造偶像ê mā是人,并无比别人高明」,chit句话已经说明人人tī上帝面前lóng仝款,m̄是甚么人ê手艺精巧细腻,造出来ê神明就会比较khah有能力,所有ê人tī上帝看起来lóng是仝款,无论伊身怀任何绝技,到上帝面前受审判ê时,lóng会「惊惶见笑」,因为ài面对真神ê审判。如果in所雕刻ê神明是真正,就m̄免án-ne「惊惶见笑」了。

第12节,这是描述用「金属锤链」铸造偶像ê情景,古往今来lóng仝款。有限ê人无可能造出无限ê物。Koh讲,chiah-ê师傅mā会饿会渴,若是m̄食不lim,就会「疲劳困倦」,这tú好说明师傅ê软弱,伊ê手所造出来ê神像mā必定kah伊仝款脆弱无力。

第13节,前一节提起铁匠铸造金属神明,kā它「做成人ê形像」,然后khǹg tī「庙宇内」供人崇拜ê荒谬。

第14到17节,chit段经文是描述chiah-ê师傅所用ê材料lóng是tùi上帝来ê赏赐,hiah-ê树木本来是上帝赏赐hō͘人遮荫、取暖á是烘火做食物,taⁿ却被师傅the̍h来当做神明,这是非常讽刺ê话语。Chia特别提起「香柏树」、「橡树」、「桧树」、「松树」等等chiah-ê品质极佳ê木材,lóng需要上帝tùi天顶降落ê「雨水」才能「hō͘它长大」。换句话讲,chiah-ê人看做siōng珍贵ê材料lóng是tùi上帝来赏赐,为甚么不敬拜上帝,却去敬拜上帝落雨灌ak才能长大ê树木?如果chiah-ê树木lóng是神明,就bē-tàng当做生活用品,用来「烘火取暖á是烘饼」,因为án-ne做,对神明是非常不敬ê态度。Ē-sái讲是人却用来当做神明膜拜,koh khah害ê是向chiah-ê「柴头」神明祈求拯救。若是chiah-ê柴头偶像thang救人,它就ē-tàng救家己免受炉火ê火烧,mā m̄免hō͘人用锯子锯断,而且hō͘人用来雕刻。

第18到19节,chia thang参考第六章9到10节。Chia指出雕刻chiah-ê偶像神明ê人,真正是非常「愚戆」,只要in小khóa「动点脑筋」,就会醒悟起来。M̄-koh真清楚ê,chiah-ê师傅á是去膜拜chiah-ê偶像神明ê人lóng是无醒悟ê人。

第20节,「the̍h灰充饥」,意思是teh指chiah-ê柴头烧成了灰了后,是无法度用来当做食物。人若是iau饿iáu是仝款会感觉iau饿,拜chiah-ê虚假之神,对人生存ê迫切需要iáu-koh lóng无路用。

重新查询 专卷研经 以赛亚书系列
错误回报,请联系comm[@]fhl.net