以赛亚书 43章1节 到 43章13节   背景资料  上一笔  下一笔
Chit章ē-sái讲是一首史诗,描述了以色列人民tùi hō͘上帝拣选,到in因为弃sak上帝受惩罚,诗人用历史ê经历说明上帝无比ê疼。M̄-koh显然地,直到in回乡tńg来国重建家园,以色列人民并无呈现出上帝子民应该有ê新样式、新ê心灵。诗人希望透过历史ê经历,唤醒伊ê同胞记起上帝拯救ê恩典,会听从上帝ê话,tńg来到上帝面前。

Chit段诗歌真亲像第四十一章8到10节所讲过ê,充分显示出上帝对他所拣选ê子民ê疼,上帝应允会永远kah in同在,并且会kā四散在世界各地ê子民召tńg来。这mā是头前一再叙述过ê。Koh讲,chit段诗歌mā提供了一个非常重要ê信息,就是koh一pái确认拯救以色列人民脱离奴役生活ê,就是chit位独一无二ê创造者,绝对不允准有其它ê神明kah他相提并论。因为chit位拯救ê上帝就是独一ê神,只要专一敬拜上帝,必定会得tio̍h上帝ê保守、看顾,hō͘国家、民族tī上帝所赏赐ê土地顶面,长居久安。

第1到2节,chia一开始就宣告讲「创造你ê上主」,chit句话m̄-nā是teh指单一ê个人,mā讲出一个民族、国家,lóng是tùi上帝来ê创造。上帝tī chia讲他「beh保护」以色列,意思真清楚,就是beh kā四散在世界各地ê以色列人民「救赎」tńg来。他ài tī苦难中ê子民「mài惊」,因为上帝teh beh伸出他救助ê手带领in tńg去故乡。虽然in ê性命ná亲像「临深渊」、「渡江河」、「踏炭火」、「陷tī火焰」内,lóng m̄免惊惶,因为创造ê主―以色列ê上帝,teh beh伸手救助in远离chiah-ê危害in性命ê锁枷。

第3到4节,chia说明上帝拯救以色列人民脱离顶面所讲ê苦难ê理由,就是上帝kah以色列人民之间立有性命之约,chit种约就是「我是上主―你ê上帝」。Chia讲上帝beh「the̍h埃及赎回你ê自由」,chit句话thang参考以赛亚书第十九章19到22节,说明上帝beh kā以色列人民tùi埃及人手中抢救出来。Koh讲,上帝会kā他所拣选ê子民看做是心中宝贝,因为án-ne,愿意付出siōng大ê代价来拯救他ê子民脱离苦难。

第5到6节,「mài惊,因为我kah你做伙!」这是典型上帝呼召人出来当奴仆ê话语(参考出埃及记三:12a,约书亚记一:9,士师记六:16a,耶利米书一:8,以西结书二:6—7)。

诗人tī chia提起「东方、西方」、「北方」、「南方」等,其实指ê就是全世界。既然是上帝发出拯救ê信号,就beh全世界各国lóng tio̍h kā上帝ê子民释放tńg来,因为chiah-ê被拣选ê子民lóng teh代表上帝ê「荣耀」。Chia「荣耀」一词,表示两个意义:一是teh指上帝ê拯救,另外一是teh指上帝ê创造。

第8到9节,chit两节ná亲像天顶teh开庭审理案件仝款。上帝下令,ài kā受审者「传到法庭来」,因为上帝beh亲自开庭审理案件,他ài做审判者。上帝beh审判chiah-ê「有目睭,却看bē-tio̍h」,以及「有耳á,却无法度听」ê子民,因为in去拜ê神明就是án-ne,去拜chit种神明ê人,就kah chiah-ê神明仝款。M̄-nā án-ne,上帝mā tio̍h同时审判「万国万民」,上帝ài in到法庭来kā in所拜ê神明ê能力显现出来,看māi chiah-ê神明是m̄是ē-tàng预言未来ê事,án-ne才能证明in真正有chit种能力。

第10节,「以色列人,lín是我ê证人」,chit句话tī第12节koh重复一pái。这真清楚teh说明,以色列人民因为bat hō͘上帝tùi埃及帝国手中拯救出来,in ē-tàng生存落来,就是上帝极大ê恩典。Mā是siōng好ê证人,in有义务kah责任替上帝做见证。Á beh见证ê主要内容,就是chit句:「除了我,无别ê上帝。」这mā是十条诫命ê第一诫(参考出埃及记二十:3)。Á chit句「过去无,将来mā bē有」,表示chit位拯救ê上帝,是永恒ê上帝。无论这时代怎样改变,他永远bē改变。

第11节,chit节tī第四十四章6节、8节、第四十五章5到6节、18节、21到22节、第四十六章9节等等,lóng一再重复chit位创造天地ê上帝,乃是独一ê上帝。Mā tùi chia thang看出chit-ê上帝是独一无二ê神ê信念,是用赛亚书所强调ê信息中心,mā ē-sái讲是kui本圣经ê中心信息。

第12到13节,chit位独一无二ê上帝是真实可靠ê,他ē-tàng「宣告teh beh发生ê事」,无任何一位神明有chit种能力。Á chit位独一无二ê神,beh审判世间所有ê人,「无人ē-tàng逃脱」上帝ê「掌握」,原因是kui个宇宙lóng tī上帝管理之下,无论是tī koân天á是深渊,上帝lóng tī hia等待(参考诗篇一三九:7—8)。而且,mā「无人ē-tàng改变」上帝奇妙ê「作为」,上帝决定beh做ê事一定会实现因为他是信实ê上帝。

重新查询 专卷研经 以赛亚书系列
错误回报,请联系comm[@]fhl.net