以赛亚书 35章1节 到 35章10节   背景资料  上一笔  下一笔
Ná亲像头前所讲ê过,以赛亚书第三十四到三十五章hông称做「以赛亚ê启示」。第三十四章提起上帝严厉ê审判,而第三十五章就续落来讲tio̍h上帝拯救ê恩典,是tòe-tiâu tī惩罚了后来到。因为án-ne,tùi chit首诗歌thang看出kah第三十四章所提起上帝ê惩罚,呈现出相对ê内容;chit章是充满tio̍h被释放tńg来国ê喜乐,前一章讲tio̍h kui个以东ê城市会成做废墟,相对tī chit章,耶路撒冷呈现出来ê是沿路所经过ê所在,m̄-nā是花朵到处绽放,而且所有ê人民,包括过去hō͘人所疏忽、社会边缘ê人,lóng兴高采烈地跳跃欢唱,行上回乡之途。

详细阅读chit章ê chit首诗歌,就会发见诗人是用出埃及为背景,行过旷野,进入迦南地,然后用耶路撒冷为圣城,聚集天下万民同声歌颂上帝ê恩典。用chit种方式teh表明上帝惩罚了后,就ná亲像出埃及行入旷野仝款,所看见ê一切lóng真荒凉。M̄-koh上帝并无hō͘ in死tī旷野,虽然in bat背离上帝ê救恩,拜家己铸造ê金牛偶像。M̄-koh上帝iáu是tī极大ê忿怒中,容忍in并怜悯,继续带领in进入迦南应允之地。

第1到2节,作者用拟人化ê笔法写出「沙漠tio̍h欣喜」Chit种句话。Chia ê「沙漠」、「荒野」,并m̄是指旷野ê地带,却是指上帝赏赐hō͘以色列人民ê迦南富饶之地。M̄-nā是「黎巴嫩」ê森林出现茂密,巍巍「壮丽」,连山野ê花mā lóng开得「万紫千红」,原本荒凉ê「迦密kah沙仑」等地,chit-má则呈现出一片「肥」ê景象。Án-ne,「人人ài beh看见上主ê荣耀」,因为原本tī人看起来完全无希望ê景象,taⁿ完全颠倒,已经展现出性命ê活力。因为án-ne,每pái有人问起,就lóng会讲是上帝奇妙ê作为。

    第3节,过去是「疲乏ê手」kah「phi̍h-phi̍h-chhoahê腿」,chit-má变成ê是「健壮」ê手,kah ē-tàng安然khiā立,无koh「phi̍h-phi̍h-chhoahê腿」。Chit种句话,是teh描述坚强、壮硕、有力之外观。换句话讲,tī上帝赐福之下,性命会tùi过去ê软弱无力转变成现今强壮有力。

第4节,tùi chit节mā thang看tio̍h上帝ê疼,永远lóng tī,虽然以色列人民过去一再心硬,m̄-chhap上帝奴仆ê呼声,in甚至用嘴唇敬拜上帝,心远离上帝。M̄-koh上帝并无因为án-ne就放弃in。他iáu-koh是存丰富ê疼,只要以色列人民呼求,上帝必定会伸手救助,ná亲像第三十三章2节所提起ê恳求上帝救助之祈祷仝款。

第5到6节,chit两节清楚讲出拯救ê恩典,就是hō͘原本看bē清楚ê,taⁿ ē-tàng看kah清楚;听无看tio̍h ê,chit-má thang听见;而原本跛脚,taⁿ有健壮如鹿一般ē-tàng跳跃ê双腿;过去静默不语ê哑口,chit-má会高声歌颂上帝拯救ê恩典。先知以赛亚kúi-nā pái提起chit种奇异ê救赎恩典,就是性命完全改变,kah过去是chheⁿ-mê、耳聋、跛脚、舌结等完全无仝(参考以赛亚书廿九:18、三十二:3、四十二:7)。Chit种救恩,mā出现tī耶稣ê身上,当时行洗礼约翰ê门徒来问耶稣,伊是m̄是就是ná teh beh来临ê拯救者ê时,耶稣ê回答就是用chit两节经文(参考马太福音十一:5)。

第7节,chit节thang参考第四十一章18节,讲出上帝拯救ê结果,是出乎人所ē-tàng意料ê之外。上帝ê恩典远大大超过人所ē-tàng想像ê丰富。当人面对tio̍h「灼烧热ê沙漠」,kan-taⁿ会感受tio̍h性命ê气力耗尽,lóng无ǹg望thang讲,m̄-koh上帝却ē-tàng hō͘ chit种地方变成「池塘」;tī炕旱之地,上帝ē-tàng hō͘伊出现「水源」,hō͘「青草kah芦苇」滋生而出,性命无koh干渴。

第8节,tī上帝拯救ê日子来临ê时,会出现一条康庄「大道」,chit条大道mā会称做「圣洁之路」。Mā就是专为选民所开辟ê道路,而且是通往上帝之城ê道路,mā是以色列人民回乡ê专用道路。作者特别强调讲「罪人」、「愚昧ê人」等不配行上chit条「圣洁」ê大道,因为这两人lóng bat藐视过上帝ê救恩,无愿意听从他ê话而悔改。In是连「徘徊」tī边á观看ê资格mā无。

第9节,tī chit条「圣洁之路」上,是「无狮,mā无野兽」,这表示安全、无危险。因为chit条是上帝ê「大道」,有他带领、teh保守。

第10节,chit节kah以赛亚书第五十一章11节仝款。Chit节mā thang参考诗篇第一二六篇,诗人tī诗歌中所描述ê回乡情景。Hit种欢喜,已经无法度用任何文字来形容。因为he是超越性命ê经历。

重新查询 专卷研经 以赛亚书系列
错误回报,请联系comm[@]fhl.net