以赛亚书 3章1节 到 3章26节   背景资料  上一笔  下一笔
Chit章真清楚谈起上帝严厉ê审判,会hō͘ hiah-ê用各种无妥当手段累积大量财富ê众贵族,tī一夕之间lóng会因为上帝ê审判来临,完全消失匿迹。原因是chiah-ê社会众领袖原本是上帝拣选来替他管理子民,维护社会正义ê。M̄-koh chiah-ê社会领袖却m̄是án-ne,却是藉这欺压上帝ê子民,这是上帝siōng无法度忍受ê事。因为án-ne,上帝决定采取惩罚ê行动。Chiah-ê惩罚m̄-nā tī社会领导阶层中,mā kā波及in厝里ê妇女,理由是in过去mā óa靠丈夫ê权势,夺取别人ê财富,享受富贵奢华ê生活。Taⁿ in会hō͘侮辱到无颜见人,只有ē-tàng坐tī尘土中嚎啕大哭。因为in taⁿ会失去过去ê一切,甚至连beh遮身躯siōng基本ê衫裤mā无ā。

第1节,「人民日常生活所需要ê一切lóng the̍h走」,chit句话中ê「一切」,m̄-nā是生活用品而已,mā包括维护社会秩序ê气力。Chia特别指出the̍h走in ê「食物kah水」,这两项ē-sái讲是维护每日生活,mā是每一个人性命存活siōng基本ê要件。当上帝决定kā chit两项物件the̍h走ê时,mā就teh表示上帝beh用「死亡」来惩罚犹大人民。

第2到5节,chit段经文thang清楚看出tī一个动荡不安ê社会里必然会有ê现象,就是无好ê领导者,连基本ê伦理道德lóng酥腰落去,而chiah-ê就是上帝对悖逆子民ê惩罚之方式。

第6到7节,「tī he日子」,tī第二到四章中一再重复出现,说明这审判ê日子必定会来临。Chia讲tio̍h tī siōng艰困ê日子里,无人会想beh出来做领导者,因为连家己lóng三餐不继,根本无法度koh再为其他iau饿ê人chhōe食物。

第8到9节,「耶路撒冷会倒à!犹大会酥腰落去!」Chiah-ê预言lóng tī主前586年应验ā。原因是in违背上帝ê命令,去做无应该做ê事,这等于是「公然侮辱上帝」仝款。结果会亲像「所多玛」城被上帝毁灭,城妇人人民被上帝所弃。因为「所多玛」城内ê人已经乱到无法无天,连上帝ê特使mā想beh侮辱(参考创世记十九:5)。Á tī chia,犹大人民则根本就无kā上帝khǹg tī眼内。

第10到11节,chit两节是相对句话。「行为正直ê人kā有喜乐,事事顺利」,相对tī「作恶ê人却会受灾」,表示上帝ê赏罚分明。

第12节,「我ê子民」,这是一种呼喊ê声音,chit种呼喊是带有警告ê意味tī其中。Á「我ê子民toh」则感叹句。「被孩童欺压,被妇女管辖」,chit句话是种扼腕吐气ê意思。因为「孩童」表示无成熟、幼稚,而「妇女」teh表示懦弱、无力。当上帝ê选民被án-ne软弱ê人欺负,岂m̄是真好笑ê事?会有chit种情形出现,是因为tī犹大人民中已经chhōe bē-tio̍h好ê领导者带领in。

第13到15节,chit段经文说明上帝beh审判犹大人民中ê「长老kah领袖」,前者teh代表部落ê大老;后者代表统治阶层ê君王、贵族,mā包括先知kah祭司在内,chiah-ê lóng是社会ê意见领袖kah领导阶层。Chia讲chiah-ê领导者「破坏了葡萄园」,表示in就是tùi sàn-chhiah人ê厝内掠夺财物而富有,taⁿ chiah-ê财物tú好就是上帝审判in ê证据。Chit种谴责语句mā出现tī先知ê信息中(参考阿摩司书三:10、五:11,弥迦书二:1—2、六:10—12,西番雅书一:9)。

第16到24节,chit段经文lóng是teh描述上帝ài怎样惩罚犹大ê贵妇,原因是in骄傲到已经完全无kā上帝khǹg tī in心中,in只知影装饰打扮得非常华丽。当上帝惩罚来临ê时,chiah-ê显(hiáⁿ)目ê装扮m̄-nā会消失殆尽,上帝甚至iáu koh khah「剃掉in ê头毛,显露in ê下体」,甚至「身躯发出臭味」,kah in现有ê景况完全颠倒,而且是koh khah恶化,用chit种方式hō͘ in tú-tio̍h到严重ê侮辱。

Chia所谓「显露in ê下体」,意思是teh指in会为tio̍h生存,而沦落为娼妓。

第25到26节,chia真清楚谈起上帝惩罚ê方式,就是用战争来严惩犹大人民。若是出tī上帝ê旨意,就算siōng强壮ê勇士,mā是难逃战死战场ê结果。城池会变成废墟一般,ná亲像赤裸裸ê妇女hit种,hō͘人不堪入目。

重新查询 专卷研经 以赛亚书系列
错误回报,请联系comm[@]fhl.net