以赛亚书 22章1节 到 22章14节   背景资料  上一笔  下一笔
Chit章thang分做两个部分,前一部分是第1到14节,用四个段落来说明有关耶路撒冷ê毁灭,会hō͘敌军攻入城内,毁坏所有ê一切。第二部分是tùi第15到25节,论到宫廷大臣舍伯那会tú-tio̍h ê惩罚。M̄-koh无论是tùi第一部分á是第二部分来看,lóng thang看tio̍h一个中心信息:无听从上帝ê话,赶紧悔改归向上帝,就算有人间siōng坚强ê军事武力作国防,mā是枉然。

Chit段经文主要是用耶路撒冷城发生被包围ê背景为主。耶路撒冷城kúi-nā pái被敌军所包围,包括主前701年亚述皇帝西拿基立率军进攻,m̄-koh并无成功。Á tī主前588到586年,被巴比伦围城长到一年半,结果m̄免koh再攻打,城门就主动phah开。

有bē少学者认为chit章经文ê背景,应该tùi主前第六世纪588到586年ê背景来看,巴比伦王尼布甲尼撒率军包围耶路撒冷城长到一年半ê chit段时间,会koh khah贴近chit章经文所叙述ê内容。不过,mā有一个可能,就是先知以赛亚亲目看tio̍h主前701年西拿基立率亚述大军围城所发生ê景况,已经讲出若是犹大人民继续án-ne「混」,拒绝听从上帝ê话,其结果是án-ne ê惨状会koh一pái重演。Á chiâⁿ实tī巴比伦帝国时代ê主前588年围城事件发生。

第1节,「景象谷」,真可能是teh指耶路撒冷东边ê汲沦溪。有可能先知以赛亚tú好行经chit所在ê时,得tio̍h上帝ê启示,就tī chia传出了上帝ê信息。先知以赛亚用giâu疑ê语句强调危险时刻已临到目睭前,m̄-koh耶路撒冷城内ê人民kah-ná无警觉tio̍h,iáu teh「厝顶上庆祝」,因为án-ne,伊问到底是「发生甚么事loh」。

第2到5节,chit段经文讲出一个国家ê灭亡siōng大悲哀,就是人民根本m̄知敌人已经兵临城下了,m̄-koh城内ê人民iáu浑然m̄知,「全城喧嚷」、「四界闹兴奋」,这kah-ná是teh庆祝一个重大节期ê款。因为án-ne,先知以赛亚chiah会讲in并m̄是「死tī战斗」。M̄-koh当in中间有人发见无对tâng ê时,就赶紧逃走伊去,m̄-koh就算逃走mā无用,因为iáu是hō͘追了tńg来。先知以赛亚讲出当时ê惨况,是「同胞lóng死去」,无死ê是「惊惶、失败、混乱」,而且tī chit时chūn「城墙攻破了」,这是主前586年ê事。

第6到8节,chit时chūn「以拦ê骑兵」mā加入巴比伦ê军队抵挡亚述帝国。In ê「箭袋里装满弓箭」,已经准备好势tio̍h进攻耶路撒冷。Á「吉珥」族以步兵出名,in mā加入巴比伦军队ê行列。In lóng聚集tī「犹大肥ê山谷」,准备ài攻击耶路撒冷城ê外国军队。战争所带来ê就是田园荒废,续落来是缺粮饥荒,chit种饥荒并m̄是因为天无降落甘霖雨水,却是因为人祸造成。仝款ê,久长iau饿所带来ê结果,就是瘟疫蔓延。Án-ne,即使犹大有防卫,mā仝款会「崩溃」。因为人民kah军人无粮食,就会动乱,若无就是军队因iau饿而软弱无力ē-tàng守卫。即使ē-tàng「tùi军械库the̍h出兵器」,mā无气力使用。

第9到11节,chia提起耶路撒冷「城墙上有真chē缺口」,表示敌军攻击已经开始,m̄-koh iáu未攻入城内。因为án-ne,犹大指挥官派兵强拆人民ê房屋,the̍h来当做建材修补城墙缺口ê漏洞,mā the̍h来当做修筑蓄水池ê需要。Koh讲,为tio̍h beh修补城墙漏洞,以及修筑蓄水池,koh得抽出一部分兵力来投入修筑工事ê需要,真自然tek,守卫ê气力就相对降低了。

第12到13节,chit节到第14节chit段经文kah第1到4节相通。「痛哭哀号,剃光头毛,穿麻衣」,chiah-ê lóng是一种悲哀、侮辱ê样式。M̄-koh chiah-ê lóng kan-taⁿ是外表ê哀痛,是m̄是真心悔改,án-ne chiah是重点。Tùi第13节来看,犹大人民显然并m̄是真心悔改,若无,bē是「iáu teh嘻笑、狂欢」、「宰了牛羊,大食大lim」。In ê心态iáu-koh是「横直明á载就beh死去」,连一点点á悔改ê心意mā无。

第14节,因为有第13节ê chit种心态,上帝ê忿怒就bē减低,却是会增加,他bē「赦免」Chit种罪恶。

重新查询 专卷研经 以赛亚书系列
错误回报,请联系comm[@]fhl.net