以赛亚书 21章1节 到 21章17节   背景资料  上一笔  下一笔
Chit章总共提起三个族群,一是巴比伦,二是以东,三是阿拉伯。值得注意ê是,chit章kah第廿二章chit两章编辑tī chia有kóa奇怪,因为以赛亚书第一部分,mā就是tùi第一到三十九章,一般来讲是用主前第八世纪为主要背景。Á巴比伦ê灭亡,是属tī主前第六世纪ê时代。因为án-ne,chit段经文可能比第十三到十四章ê背景tio̍h晚,m̄-koh应该比第四十到五十五章ê资料to̍h早。有一种看法是:chit章ê资料背景应该是tī主前第八世纪无错,因为tī主前第八世纪,巴比伦就bat有过两pái想beh摆脱亚述帝国ê控制,一pái tī主前722到710年间,另外一是tī主前705到702年间。Á chit-má chit段经文,真可能就是tī主前711年,先知以赛亚得tio̍h启示,预言巴比伦会遇tio̍h严厉ê惩罚,果然,主前710年左右,亚述帝国确实phah败巴比伦。

其实,tùi第三十九章thang看tio̍h巴比伦后来为tio̍h beh壮大声势,以及控制kui个巴勒斯坦,iáu bat派特使来到犹大,藉tio̍h请安希西家王,隐藏想beh窥探犹大国防防卫力量ê虚实。Chiâⁿ实tī主前587年,巴比伦举兵入侵犹大,并且tī主前586年消灭了犹大。

第1节,chit章开始就真清楚是「有关巴比伦ê信息」,讲出该国teh beh像被「旋风刮过沙漠」仝款,遇tio̍h惨重ê「灾难」,而且其严重性是到à hō͘人窒息ê状态。

第2节,chit节ê「以拦」是设tī底格里斯河ê下游平原。Chit-ê民族久长以来一直是亚述kah巴比伦人ê世仇,后来加入波斯ê军队,tī主前538年征服了巴比伦帝国。Á「米底亚」,koh称做「玛代」,chit-ê族群khiā起tī巴比伦帝国ê东北方,是后来波斯军队ê主力。

「上帝beh终止巴比伦带hō͘人ê痛苦」,chit句话真清楚说明一个国家ê盛衰,lóng有上帝ê旨意在其中。若是无尊崇上帝,认为家己真有能力,无论是一个人á是国家、民族,lóng会tú-tio̍h仝款结果。

第3到4节,先知以赛亚用「像临盆ê妇女阵痛仝款」来说明伊心内ê「痛苦」。先知以赛亚并且用「看bē-tio̍h」kah「听bē-tio̍h」来形容伊知影chiah-ê消息了后,心中极大ê「惊惶痛苦」,并且描述出心内ê矛盾,一则希望看见巴比伦帝国被消灭,以减轻被伊统治ê人民ê痛苦。M̄-koh另外一方面,伊看见hit种受tio̍h新兴帝国波斯军队强猛、勇猛所摧毁ê城邦,其人民面临ê惨状,心中koh开始有「恐怖」感,深惊这新ê帝国kan-taⁿ会koh khah残酷。因为án-ne,产生「惊惶得pi̍h-pi̍h-chhoah」kah不安,致使「头眩晕」。

第5节,记载tī巴比伦帝国首府内,大家正teh准备佳肴宴请宾客ê时,忽然有消息讲波斯帝国ê军队已经来临。M̄-koh就算in想赶紧整军备战,mā是来不及了。这就表示巴比伦帝国根本都无警觉国家teh beh发生危机,iáu家己认为真安全,无人会想tio̍h上帝kā出手惩罚。

第6到7节,上帝ài先知以赛亚去做一个守望者,专心斟酌看māi巴比伦遇tio̍h毁灭ê情形。「骑兵两个两个地过来」,这是古代亚述帝国ê战术,in用一匹马giú一战车,车上khiā两名骑兵。有一位驾驭tio̍h战马,另外一位可能就是弓箭手,á是枪手,án-ne,即使tī疾驶中ê骑兵mā ē-tàng真准确ê射箭、hiat枪。Á安排骑「驴á」者,是用来欺敌ê方式,先派骑驴á ê队伍tī前,hō͘敌方城池了望台顶ê守卫掠做是是家己城内ê人,á是「骆驼」商队来进行贸易。

第8节,「日瞑tī chia khiā岗」,表示看守城墙ê警卫非常警醒,无怠懈职责ê意思。

第9节,chia讲确实有看见「有骑兵两个两个起来」,表示来者是胜利者tú-teh接近城门,而且是成群结队地起来,这表示波斯ê军队已经逼近了。因为án-ne,守望者chiah会hoah出「巴比伦倾覆了」。

「偶像lóng被phah碎tī土脚」,tī古代社会lóng是kā in敬拜ê神,当做战争ê守护者。因为án-ne,攻击对敌ê一方ê时,一定会连带ê kā敌方所拜ê神明同齐phah碎,并烧毁寺庙。Án-ne,敌方所拜ê神明就bē koh来复仇。

第10节,上帝讲过去以色列人民ná亲像「筛á里被筛ê麦á」,表示以色列人民ná亲像巴比伦人á是chìn前ê亚述人手中收割ê「麦á」一般。意思是in是任人宰割ê、thang随意处理ê族群。M̄-koh chit-má先知以赛亚去传「好消息」hō͘「以色列同胞」。Chia虽然无讲出是甚么「好消息」,m̄-koh tī第四十章到2节讲,ná消息就是上帝决定赦免in了。

第11到12节,chit两节真特别,谈起以东ê信息,m̄-koh无说明以东会tú-tio̍h ê结果,不过tī其他先知ê文献中,却thang真清楚描述以东ê惨状。包括有耶利米书第四十九章7到22节;以西结书第廿五章12到14节提起,上帝kā对以东人进行「报复」ê行动;阿摩司书第一章11到12节;俄巴底亚书ê描述篇幅koh khah chē,kui卷lóng是谈论有关以东ê事;玛拉基书第一章2到5节,先知称以东是「罪恶ê国家」。Chia ê背景真可能是tī先知阿摩司时代ê主前第八世纪,mā是亚述帝国国势siōng兴旺ê时代。

「有人tùi以东问我」,这表示以东人mā有人听闻先知ê信息,而且深信tī先知以赛亚所传出ê信息,必定是tùi上帝来,而且一定会实现。问ê人连续用两pái「暗夜快过了pah」chit句话,「暗夜」teh代表危险、不安、惊惶等。Á先知以赛亚ê回答是肯定ê,而且表示「天快亮了」,m̄-koh chit种天光ê时间真短,因为续落来是「暗夜beh koh再来」,这清楚讲出以东并bē-tàng脱离灾难,即使有,时间mā是真短促。

第13到15节,chit段经文是有关阿拉伯ê信息。

「底但ê人」,mā是亚伯拉罕ê kiáⁿ孙(参考创世记廿五:2—3),是阿拉伯人ê一个游牧部落。Á「提玛ê人」,这是设tī亚giú伯沙漠ê北pêng,是一个绿洲城市。因为án-ne,生活用品够额。先知以赛亚建议in,当难民走来向in请求食物ê时,m̄-thang拒绝。当chiah-ê难民需要水来止渴ê时,就beh kā in赐福水lim,而bē-tàng拒绝伸出援手。因为in lóng是tī「刀下逃生,弓下逃命」ê战争难民。

第16到17节,「tī一年内」,这表明是一个非常确定ê时间,ná亲像「雇工合约」期满仝款。「基达」,chit-ê族群虽然是沙漠中siōng强猛民族贝督因人ê祖先,m̄-koh in会tī一年内消失,无koh存在。

Tùi顶面所讲chiah-ê信息thang看出阿拉伯人ê chiah-ê小聚落民族,真紧to̍h会hō͘亚述帝国吞灭。In lóng无法度抵抗亚述ê大军压境。

重新查询 专卷研经 以赛亚书系列
错误回报,请联系comm[@]fhl.net