以赛亚书 13章1节 到 13章22节   背景资料  上一笔  下一笔
Tùi第十三章开始,一直到第廿三章等篇幅,lóng是论到有关上帝ài怎样对付chiah-ê强猛ê帝国,以及hō͘其他族群ê信息。Tī chit段篇幅中,真类似耶利米书第四十六到五十一章;以西结书第廿五到三十二章,以及阿摩司书第一到二章等,内容lóng是论到上帝对付列强列国ê预言。Tī顶面所讲chiah-ê文献中,以赛亚书ê篇幅是siōng长,共计有十一章,而且内容siōng详细。

Tùi第十三章第1节开始,一直到第十四章23节止,lóng是论到有关巴比伦帝国ê事,mā明白指出该帝国会灭亡。M̄-koh有kóa学者认为chit段经文m̄是先知以赛亚ê作品,á是讲,chiah-ê作品原本应该是teh指tio̍h亚述帝国讲ê,因为in认为chia所讲ê巴比伦乃是指tī亚述帝国统治之下ê巴比伦,因为án-ne,chia所讲ê巴比伦会灭亡,乃是指亚述帝国会灭亡ê意思。因为巴比伦是亚述帝国统治之下ê siōng重要城市。不过chit种论调,mā引起bē少争议。

第1到3节,chia讲上帝ài先知以赛亚去传达信息hō͘巴比伦。Chit-ê信息就是上帝beh惩罚巴比伦,ná亲像过去巴比伦ê军队「竖起作战ê军旗」,teh攻击其它国家仝款。Tio̍h准备攻击巴比伦ê军队lóng是经过上帝挑选出来ê「勇士」,chiah-ê军士kah一般ê战士无仝。因为in所beh phah ê是「神圣ê仗」,表示这是一场是奉上帝ê旨意而出兵ê圣战。

第4到5节,上帝所集合ê军队正蓄势待发,只要上帝手中ê旗帜挥动,chiah-ê被徵召来讨伐巴比伦ê联军,就会出动。Chia讲上帝调动ê军兵chē到数以万计,势力非常庞(pâng)大,ná亲像「万民发出ê吼叫」一般,会hō͘敌人一听就心生懔neh。Chiah-ê军队是自「地ê另外一端」kah「tùi遥远ê国家过来」。

第6到10节,「上主ê日子到à」,tī第9节koh一pái出现。Ná亲像第二章11节、17节、20节所提起ê。Chia真清楚表示上帝决定讨伐ê时间绝对bē改变。Chia koh再描述上帝惩罚ê方式就是「施行毁灭」ê动作,只要是上帝ê惩罚一到,只有毁灭一途,除非有上帝ê恩典,chiah有生存落来ê机会。每一个受惩罚ê对象「手股头lóng麻痹」,而且「勇气lóng消失」,是因为上帝亲自带军队来惩罚,大家一听是上帝ê军队,就只有ē-tàng投降,m̄敢对抗了。Mā像「像产妇临盆」ê「阵痛」,即使想beh逃脱lóng无法度动弹,只有ē-tàng Tī痛苦中「面面相觑」,因为tī「上主ê日子来到」ê时刻,会看见ê景象是「全地tio̍h成做荒野」,mā tùi「全地」Chit-ê词来看,就ē-tàng知影人犯罪ê情形非常严重。M̄-nā是大地变成荒野,连天顶ê星辰mā lóng为tio̍h án-ne变色,因为上帝ê惩罚非常严厉。当星辰、月娘、日头lóng无koh发出亮光ê时,ná亲像tńg来复到本来创造chìn前ê款,乌暗到看bē-tio̍h任何亮光,世界成做「一片乌暗」ê深渊(参考创世记一:2)。

第11到13节,chia「责罚」、「终止」、「贬低」等用词,kah「邪恶」、「骄傲」、「残忍自大」等词相对照,前者用词表示上帝发大受气ê动作,后者用来表示上帝发大受气ê对象。Soah ē-tàng承受上帝严厉「试炼」过,合格通过ê人,确实是非常ê少。当上帝出手惩罚ê时,大家lóng会感受tio̍h「天战栗」、「地摇动」tùi chia ē-tàng想像会tio̍h,人会惊惶到khiā立不住。
第14到16节,chit段经文讲出当上帝出手严厉惩罚ê时,邪恶ê人惊惶四界窜逃,想beh躲避上帝ê忿怒。M̄-koh无任何一个所在是thang当做庇护所。因为上帝是无所不在ê主宰(参考诗篇一三九:7—8)。而且是只要上帝出手打击,任何人lóng kā无一佳哉免得。而且siōng-kài悲惨koh hō͘人怵目惊心ê景象,就是「婴á」被当众phut死,「bó͘受玷污」。

其实chiah-ê lóng tī说明过去巴比伦怎样对待附近国家,taⁿ in mā会面临仝款ê报复。这tú好讲出耶稣ê教导提起,tio̍h别人怎样待咱,咱就该怎样对待别人(参考马太福音七:12)。

第17节,「米底亚人」,这是属tī波斯帝国ê一支,khiā起tī巴比伦ê东北方,今á日伊朗ê西北部。Á当chit族群来攻击ê时,并m̄是用钱财ē-tàng买收。因为in心中所beh ê,就是征服对方。

第18到22节,chit段经文讲出米底亚人ê冷血性格,in lóng无怜悯ê心。经过in攻击了后ê所在,无论是甚么城镇村落,lóng差不多变成ná亲像上帝毁灭「所多玛kah蛾摩拉」一般,成做废墟,连放牧ê人mā无koh入来「露营」过瞑。而且in ê手段非常残酷,甚至对婴á mā无怜悯之心,koh khah bē对少年人手下留情。巴比伦就是会遭遇chit种结果。

重新查询 专卷研经 以赛亚书系列
错误回报,请联系comm[@]fhl.net