何西阿书 4章1节 到 4章19节   背景资料  上一笔  下一笔
先知何西阿ê信息siōng珍贵ê一点,就是kā上帝kah以色列人民之间ê关系以「夫妻」ê关系来说明。伊讲上帝beh「娶」以色列人民为「妻」,是以「信实」ê态度。信实,这是圣经中非常重要ê信息之一,讲出上帝是一个值得信靠ê上帝,他坚守kah以色列人民祖先所立ê「性命之约」,并且kā chit「约」延续到后代kiáⁿ孙。他答应beh承认以色列ê后代kiáⁿ孙lóng是他ê子民,他是in ê上帝。这就是上帝ê信实,mā是上帝ê特性之一。

M̄-koh tio̍h注意ê是:有「信实」ê上帝,koh khah需要有忠实ê信徒。无法度因为上帝是「信实」ê,就随便起来。德国神学家潘贺华(Dietrich Bonhoeffer)就bat讲过,有人kā上帝当做解决问题ê神,kah-ná teh使用物件仝款,用过了后无需要了,就弃sak。Chit种上帝tī chit种心态ê人心目中,ná亲像一位「空隙之神」,只是teh弥补人ê需要而已,当人满足了需要以后,就kā上帝bē记得,á是弃之无ài。当有一工发现需要koh khah大ê气力来支持ê时,chiah koh再去chhōe chit位thang满足伊需要ê神来应急。Chit种神,m̄是kah伊性命交缠做伙,却是tī伊性命之外ê「工具」,而chit点chiah是真确信仰上siōng大ê障碍。

第四章kah头前三章有真大ê无仝;头前三章lóng kā重点放tī先知何西阿ê家庭,以伊ê家庭为主轴来谈论以色列人民án怎弃sak kah上帝之间「夫妻」ê关系。Chit章则kā重点khǹg tī上帝ê仆人祭司身上;祭司ê工作原本应该是帮助人民认bat上帝,m̄-koh tī chit章kā咱讲,以色列ê众祭司m̄-nā无án-ne尽本分,颠倒ê,in是带头引chhōa人民犯罪ê祸首,上帝无法度原谅chiah-ê祭司。Á人民mā允准chit种祭司存在,m̄-nā对in无利益,kan-taⁿ会为国家、社会带来koh khah大ê伤害。

第1到3节,koh一pái看tio̍h上帝透过他ê仆人先知何西阿对以色列人民提出「指控」,ná亲像tī法庭中beh kah对方辩论仝款。上帝ê指控并m̄是随便讲ê,却是有证据ê。这证据就是上帝kah以色列人民之间ê夫妻之「约」。上帝提出以色列人民以「不忠m̄信」(中文《和合本》用「无诚实,无良善」,《台语汉字本》mā是仝款ê用词)ê方式,拒绝履行kah上帝之间「夫妻」ê关系。所谓「不忠m̄信」,是teh指以色列人民并无无诚实遵守in kah上帝之间夫妻ê「约」,in bē记得上帝,去拜偶像神明。Koh讲,先知何西阿指出以色列人民违背kah上帝之间「约」ê关系ê具体行为,就是包括「背誓、讲白贼、凶刣、偷the̍h、奸淫」,chiah-ê lóng是kah十诫ê禁令有关。

Koh khah严重ê是in tī chiah-ê犯罪ê事顶面,是「不断来犯罪,血案累累」,而且是jú犯jú深。因为án-ne,上帝kā采取严厉手段惩罚以色列人民,包括(1)土地会炕旱,人会渴死;(2)所有ê动物—空中ê飞鸟、地上ê行兽、水里ê鱼类等lóng tio̍h面临死亡。换句话讲:人ê生活teh beh面临koh khah大ê灾难、痛苦。因为如果无chiah-ê动物存在,人ê生存希望mā会真渺茫。

第4到6节,tùi第4节开始,指出真正带领以色列人民弃sak上帝ê,竟然是众祭司kah先知。祭司ê工作是beh帮助人民透过敬拜、献祭认bat上帝拯救ê慈爱。Á先知ê主要工作,就是忠实地kā上帝ê话传达出来。M̄-koh现在chia讲以色列ê众祭司m̄-nā无用真实ê心敬拜上帝,众先知mā是仝款,mā无好好á用上帝ê信息教导人民遵守上帝ê旨意。

第7到10节,讲众祭司因为「人数jú chē就jú大胆得罪上帝」,因为jú富有,in就jú骄傲起来。因为án-ne先知何西阿传出上帝beh用下列几项,对付chiah-ê怠懈职责ê祭司:

一是hō͘ in ê荣誉变为见笑。所谓「见笑」就是无koh承认in以及in ê kiáⁿ孙是上帝ê祭司(因为祭司是世袭制度)。

二是kā祭司ê地位贬低,无koh享受特权,kah人民仝款同受惩罚。这mā是另外一种侮辱方式。

三是无koh有上帝ê赐福降临在祭司kah以色列人民中间。上帝ê赐福siōng具体呈现出来ê有两项:其一是土地生产五谷,二是家族人口生湠chē-chē。Taⁿ上帝beh kā chit赐福收tńg去,hō͘ in无论án怎lóng会有欠缺ê压力,甚至有断绝后代ê危险,原因是in弃sak了上帝。

第11节,「新酒kah陈酒」,代表示ê lóng是会hō͘人「神志不清」饮料。
第12到13节,「柴头」、「木牌」lóng是teh指用木材雕刻ê偶像(参考耶利米书十:3)。Koh khah严重ê是iáu因为拜chiah-ê虚假ê神明,却hō͘家己ê「cha-bó͘-kiáⁿ会沦为娼妓」,新妇会「kah人通奸」。这是因为tī祭拜巴力神明ê时往往会参杂tio̍h kah庙妓行淫苟合,tùi án-ne淫乱ê思维就tī人民心灵中占有重要ê地位。

第14节,讲做chit款tāi-chì就是「无知」,会hō͘ in遇tio̍h灭亡、败坏ê结果。M̄免上帝惩罚in,in mā会因chiah-ê愚戆ê举动带来灭亡。Chia ê「无知」,指ê就是弃sak上帝ê教示。一个人弃sak了上帝ê救恩,去走chhōe偶像神明,并且向chiah-ê用人ê手所雕刻ê偶像敬拜,就是愚戆、无知ê行为,其结果只有灭亡而已。

第15节,提供一个真重要ê背景,先知何西阿虽然是北国以色列人,却希望犹大人民m̄-thang像北国以色列人民,到「吉甲」kah「伯特利」去礼拜。因为伯特利已经tùi原本ê「上帝之家」变成「犯罪之家」。先知何西阿就是用「伯・亚文」来形容「伯特利」,mā是teh反应当时ê犹大人民mā相连续不绝地前往伯特利去朝拜金牛kah巴力之神。吉甲,设tī约旦河西部、耶利哥城东边。Tī北国以色列,吉甲m̄-nā是个军事重地,mā是宗教、政治中心。

第16节,讲以色列人民像「倔强」ê母牛,意思是teh指以色列人民ê心已经硬化了,无法度改变。换句话讲,上帝已经决定beh放弃无koh牧养北国ê以色列人民à。

第17到19节,讲北国以色列人民ná亲像倔强ê母牛仝款m̄听主人ê话,因为in已经像醉汉仝款,m̄知甚么是见笑?上帝会采取「chhut-chāi in」继续堕落落去,这mā是使徒保罗所讲ê观点(参考罗马书一:18—32)。因为chit种人民已经m̄知甚么叫做见笑à。In ê心智已经被淫乱所迷惑,kui工浸淫tī荒诞ê行为中,chit种人民必定自食恶果。

重新查询 专卷研经 何西阿书系列
错误回报,请联系comm[@]fhl.net