创世记 44章18节 到 44章34节   背景资料  上一笔  下一笔
犹大koh一pái请求发言,tī chit段发言中,第一部分是tùi第19到23节,伊重复叙述第一pái来买粮ê时,约瑟坚持ài in带siōng小ê小弟便雅悯来见伊,并且当时koh kā西缅押tio̍h做人质。In照约瑟ê要求chhōa siōng细汉ê小弟便雅悯来。伊特别强调chit位小弟便雅悯是「老父年老ê时chūn生ê」,而且伊有一个亲兄哥已经「死去」(这是因为in m̄知khiā tī in面前ê,就是chit-ê被in出卖而且认为已经死去ê约瑟)。伊iáu特别讲这siōng小ê小弟便雅悯「老父真疼」伊。

第24到29节,这是第二段话。犹大将 in tńg去后kah老父雅各讲,照实地重复叙述一pái。伊强调老父疼ê bó͘拉结只有生两个kiáⁿ,一个已经离开、「被野兽裂碎à」,chit-má只要便雅悯出任何差错,in ê老父会「白发苍苍、悲悲惨惨地进坟墓」,表示非常悲伤、m̄甘愿死去ê意思。

第30到34节,犹大讲ê第三段话。Tī chit段话中,伊表示老父雅各kah便雅悯ê性命是相连结ê。意思是teh指便雅悯若是无法度kah in tńg去,in ê老父雅各mā bē活落去。Án-ne,in chit群兄弟就是hō͘老父悲惨死去ê罪人。Koh讲,伊bat向老父chiù-chōa过,若是无法度hō͘便雅悯tńg去,伊愿意用终生受罪责ê方式来换。因为án-ne,伊请求约瑟hō͘伊用做奴隶来换便雅悯ê安全tńg去厝里,来安年老老父雅各ê心。

犹大teh代表兄弟讲话,mā充分显示伊已经扮演大kiáⁿ ê角色。


重新查询 专卷研经 创世记系列
错误回报,请联系comm[@]fhl.net