主人波提乏听tio̍h bó͘ ê控诉，相信bó͘ ，tī非常忿怒之下kā约瑟关进牢狱中。

M̄-koh值得注意ê是第19到20节，当波提乏bó͘对约瑟指控性侵ê时chūn，波提乏ê反应虽然是「非常受气」，m̄-koh并无指明是对甚么人受气。表面上看起来kah-ná是针对约瑟，m̄-koh看伊惩罚约瑟并m̄是马上拖出去斩首，á是鞭phah hō͘伊半遂。却是送约瑟入「王室ê监狱」，这是关高级官员ê监狱，约瑟是一个奴隶，怎可能享受chit种特殊待遇？这mā teh暗示波提乏并m̄是真正相信bó͘ ，伊宁可相信约瑟是忠实ê奴仆，m̄-koh伊却无法度对bó͘ ê指控采取轻视、m̄-chhap ê态度。

第21到23节，chia两pái重复叙述「上主kah约瑟同在」，chit句话ē-sái讲是chit章故事ê中心话句，说明就算是tī监狱中，只要有上帝同在，mā会有丰富ê性命内容。上帝hō͘约瑟tī监狱中，iáu是得tio̍h典狱长ê欢喜，得tio̍h典狱长授权，hō͘伊处理监狱ê事，而且hō͘伊所经办ê事lóng真顺利。