创世记 38章1节 到 38章11节   背景资料  上一笔  下一笔
Chit章是「耶和华文献」ê资料,mā是真完整ê一篇故事,主要除了teh说明犹大ê两个kiáⁿ儿法勒斯kah谢拉ê由来,mā koh一pái提起一个性命ê观念:上帝是性命ê主宰者。什么人刻意阻挡性命ê延续,lóng会引起上帝ê愤怒。犹大ê次子俄南ê行为tú好说明了chit-ê重要ê信息。Koh讲,犹大ê事件,mā teh说明每一个人对性命ê延续lóng负有责任,逃避,kan-taⁿ会带来koh khah大ê性命负担。

另外一方面,创世记第十九章记载罗得kah伊ê cha-bó͘-kiáⁿ发生乱伦ê事件,tī chia是看tio̍h犹大kah家己ê新妇发生乱伦行为,这lóng tī说明一个事实:无一个民族ê血缘是「纯洁」ê,因此,用「民族净化」作藉口,进行种族歧视á是杀戮是真荒谬ê举动。Chit点tī当今世界koh khah值得政治人物、军事强人省思,ná亲像耶稣所讲ê:「遵照上帝旨意ê 人就是我ê 兄弟、姊妹kah 老母(全民版)」(马可福音三:35)chit句话chiah是上帝所期待看tio̍h ê人类社会。

Chit件犹大kah新妇她玛乱伦事件ê背景,kah申命记第廿五章5到10节摩西法律ê规定有真重要ê关系,而且为摩西chit条「利未拉特婚姻条例」作了真好ê诠释。

第1到2节,「犹大离开伊ê众兄弟」,chit句话mā说明chit份资料是比较晚期ê作品。因为犹大就是雅各后裔ê领导者。Á chit句「遇tio̍h迦南人书亚ê cha-bó͘-kiáⁿ,就kah伊结婚」是一记暗笔,除了说明犹大kah迦南人之间关系亲密外,伊mā做以前伊ê阿公以撒kah阿妈利百加看做讨厌ê事,就是kah迦南cha-bó͘-gín-á通婚(参考廿六:34—35、廿七:46、廿八:1、8)。因为bē记得祖先ê叮咛,chiah会有后来乱伦ê事件发生。

第3到5节,chit三节是一份简短ê族谱,说明犹大三个kiáⁿ ê名包括有「珥」、「俄南」,kah「示拉」,m̄-koh最后只有示拉活teh。

第6到11节,犹大kā珥娶bó͘, 她ê名叫「她玛」,chit-ê名有「竖立」、「棕树」ê意思。Chia并无说明「珥」到底做甚么事得罪上帝,致使「上主就取伊ê性命」,照圣经作者时常表达ê方式,就是离弃上帝,去拜偶像,chit种人是上帝所厌弃ê对象。

第8节回应了申命记第廿五章5到10节ê摩西律法「利未拉特婚姻条例」ê规定。犹大ài俄南娶阿嫂她玛做bó͘,并且强调这是「义务」,为tio̍h是beh替「兄哥传后」。

第9节,thang看出俄南并无想beh遵守律法ê规定,原因是无想beh hō͘兄哥珥有后代,án-ne,伊就ē-tàng继承兄哥ê产业。这是贪婪。贪婪等于「拜偶像」(参考以弗所册五:5,歌罗西书三:5)。上帝看俄南chit种意念kah行为是邪恶ê,因此mā取伊ê性命(第10节)。

第11节,犹大生三个kiáⁿ,前两个lóng死去,原因lóng kah上帝ê惩罚有关系。Chhun落来这siōng小ê「示拉」,chia并无说明伊ê年纪,只有犹大向她玛表示, ài她先tńg去后头厝等,因为示拉iáu软chiáⁿ,等伊长大「成人」后就会叫她玛tńg来。M̄-koh作者tī chia特别注明,事实上是因为犹大惊示拉也kah两个兄哥「仝款死去」。她玛听ta-koaⁿ ê话tńg来后头厝。



重新查询 专卷研经 创世记系列
错误回报,请联系comm[@]fhl.net