创世记 35章1节 到 35章15节   背景资料  上一笔  下一笔
Chit章是由「祭司文献」、「耶和华文献」,以及「以罗伊文献」等三种资料混合编辑而成。第1到4节、第7到8节、第16到20节,lóng是属tī「以罗伊文献」;第5到6节、第9到13节、第15节、第23到29节lóng是属tī「祭司文献」ê作品;只有第21到22节chit两节是「耶和华文献」ê资料。

Chit章mā是雅各族长史暂告一个段落,续落来就是beh讲约瑟ê历史。因为chit章用雅各ê十二个gín-á作为一份简单ê族谱,区隔一个时代ê结束,新ê另外一个时代开始。同时mā交带以撒往生。然后,第三十六章提供一份族谱外,mā tùi第三十七章开始讲tio̍h第四位族长约瑟ê故事。

Chit章也kah第三十四章有密切关系,因为原本雅各是想beh tī示剑chit-ê城市khiā落来ê,m̄-koh,chit-má雅各感觉tī-chia khiā起已经无安全,伊深深感受tio̍h「人数无chē」,深惊外族人ê反扑攻击,致使被消灭ê危险,因为án-ne,决定离开示剑。

Chia koh一pái提起「伯特利」,这原本是雅各逃亡ê时,亲自经历到上帝kah伊同在,而且向伊启示表示beh保守伊、看顾伊ê所在。因为án-ne,tī chit-ê siōng无安全感、危机ê时chūn,雅各koh一pái得tio̍h上帝ê启示,ài伊去伯特利,并且tī hia「起一座祭坛」敬拜上帝。这mā是后来伯特利成做敬拜ê圣地ê原因。

第2到4节,雅各带领家族开始学习对向伊显现ê上帝表示忠chiâⁿ,因为án-ne,命令家族ê人,bē-tàng koh再有任何其它神像之物。雅各深深体会tio̍h,若是无chit位全能ê上帝带领,就算拥有世间数算不尽ê财宝mā是枉然。

第5节若是编辑tī第三十四章29节后面,有可能会koh khah清楚当雅各kah全家离开示剑ê时,无人敢去拦截,替示剑人报复ê原因。Á编辑tī-chia,主要是beh说明雅各带家族离开示剑,tńg去伯特利重新敬拜上帝,因为án-ne,有上帝庇护in。

第6到8节,雅各照上帝ê吩咐,tī来到伯特利了后,就建造一座祭坛敬拜上帝。第8节ê底波拉,是利百加ê婢女,chit-má已经是老奴仆à。M̄-koh却无说明底波拉为甚么跟tòe雅各?kám讲当时雅各逃离老父ê厝,á是老父以撒ài伊去拉班ê厝时,hō͘底波拉陪雅各同齐去?M̄-koh这无啥可能。

第9到12节,上帝koh一pái向雅各显现,beh赐福hō͘伊。上帝ê赐福,就是改变伊ê名叫「以色列」,这是第二pái记载雅各被改名,第一pái是tī第三十二章28节,he是属tī「以罗伊」ê资料。Chit-má chia ê改名,是属tī「祭司文献」ê资料。

第11节讲出上帝ê特性:全能者。Chit句「我是全能ê上帝」,mā是上帝对亚伯拉罕应允ê时讲ê(参考十七:1)。

第12节讲上帝对雅各ê应允kah上帝应允hō͘亚伯拉罕、以撒ê仝款。Chia特别提起「赐hō͘亚伯拉罕、以撒ê土地」,表示雅各就是传承祖先tùi上帝领受ê赐福。

第13到15节,为tio̍h beh记念上帝对伊ê疼,雅各koh一pái tī伯特利做记念碑,顶pái是用石头做记号(参考廿八:22)。

重新查询 专卷研经 创世记系列
错误回报,请联系comm[@]fhl.net