创世记 33章1节 到 33章11节   背景资料  上一笔  下一笔
Tī长到十二章有关雅各ê篇幅中,以第三十三章siōng ē-tàng看出以扫ê特性,kah雅各心中不安ê实况。Mā因为有chit章,对以扫ê了解有真大ê无仝;伊m̄-nā是一个bē记得仇恨ê人,而且是一个心胸相当广阔ê兄哥。Ē-sái讲是为甚么上帝无拣选伊做族长,却是选雅各?这是一个好问题,却无人ē-tàng回答chit种问题。因为拣选ê主权是tī上帝。

第三十三章1到17节lóng是属tī「耶和华文献」ê资料,后头第18到20节则「以罗伊文献」ê资料。Chit章主要是由两个情节来构成:一是第1到11节,两兄弟相会面。二是第12到20节,两兄弟分别顺续tńg去厝里。

Chit段经文继续描述雅各对以扫是「心怀戒惧」,mā充满tio̍h矛盾;伊一方面表现出真有「悔意」ê款,连续「七pái坦覆 (thán-phak)tī土脚」,hō͘伊ê兄哥以扫看tio̍h伊ê真诚,并且准备丰厚礼物做见面礼,希望ē-tàng因为án-ne得tio̍h兄哥以扫ê「赦免」。M̄-koh另外一方面,伊mā做完整防范ê准备,尤其是安排伊kah拉结、利亚生ê gín-á tī后壁,然后家己chhōa两个细姨kah in所生ê gín-á行tī头前。这明显ê就是一种预防意外发生。

第1到4节,kā chit段续接tī第三十二章8节后面,读起来会koh khah顺畅。雅各kā gín-á分别由四个妻细姨带tio̍h,然后细姨kah细姨所生ê kiáⁿ行tī头前,续落来是利亚kah伊ê kiáⁿ,最后是拉结kah约瑟。Chit种队伍真清楚,伊爱拉结kah约瑟赢过其他ê kiáⁿ kah妻细姨。万一发生意外,siōng后面ê thang有koh khah充裕ê时间逃走。

雅各家己行tī siōng头前,这mā表现出伊是一个大家长,有保护家族安全ê必要。

雅各看见以扫ê时chūn,伊ê第一个反应是「连连七pái坦覆 (thán-phak)tī土脚」,chit种方式表明伊尊敬以扫乃是当家主管、老大。Kah本来雅各骗取大kiáⁿ名份ê动作koh有完全无仝ê含意。雅各会有hiah-ni̍h大ê动作,lóng只有一个原因,希望ē-tàng因为án-ne得tio̍h以扫ê赦免。

第5到7节,可能是头前hiah-ê进贡ê队伍奏效,m̄-koh khah有可能是雅各chiah-ê卑微到极点ê动作感化了以扫本来忿怒ê心。以扫一看见雅各,随时就「走来迎接伊,揽伊,kah伊chim嘴」,然后「两人lóng哭了」。Chiah-ê动作lóng是当时中东地带热情欢迎亲友ê一种方式,表示以扫已经kā过去所有ê怨恨lóng放弃了,伊真正原谅bat伤害过伊ê小弟雅各。

就án-ne伊问雅各身边ê cha-bó͘人kah众细kiáⁿ是甚么人?雅各ê chit句「chiah-ê gín-á是上帝恩赐hō͘我ê」,mā说明性命tùi上帝来赏赐。Gín-á多,表示上帝赐福大。一方面teh向以扫表示:若是无上帝看顾、保守,伊无可能有chit种能力。续落来,伊一一绍介妻细姨kah kiáⁿ hō͘以扫认bat。

第8到9节,以扫询问chìn前hiah-ê奴仆所带领ê队伍是作甚么ê?mā就是第三十二章13到15节所提起ê hi̍t五百五十只家畜动物,非常丰厚ê见面礼,hō͘以扫mā见识到雅各确实是有上帝赐福,力量绝对无法度看轻。

以扫ê「我甚么lóng有」chit句话,tú好mā说明in老父以撒虽然无赐福伊,甚至用接近「诅咒」ê内容回应伊ê请求。M̄-koh上帝iáu是看顾伊,赐福hō͘伊,若无伊无可能有「四百人」kah跟tòe。伊向雅各恳辞chiah-ê丰厚ê见面礼。

第10到11节,雅各坚持ài伊兄哥以扫kā礼物收落来。因为chit批礼物实在是太丰厚leh,若以扫收落来,差不多每工lóng会看tio̍h chiah-ê家畜动物,而且iáu会继续繁衍落去,án-ne,以扫就bē想起beh报复ê念头。这mā是雅各聪明ê所在。伊tī拉班ê厝经历二十年,深知培育羊群ê技巧。因为án-ne,若是以扫无beh kā伊打扰,而且ē-tàng以kah伊相安无事,伊就ē-tàng tī安定生活几年后,koh重新繁殖koh khah chē羊、牛、驴等。

重新查询 专卷研经 创世记系列
错误回报,请联系comm[@]fhl.net