创世记 3章1节 到 3章13节   背景资料  上一笔  下一笔
这是非常重要ê一章,因为tùi chit章开始,充分表达圣经一个主题:人ê性命为甚么会有苦难?这是kah人违背上帝ê命令有密切关系。Kui本创世记ê中心主题,就是tùi chit章5节ê人想beh「亲像上帝」仝款thang掌管一切chia开始,然后直到创世记第五十章19节,约瑟对伊众兄哥讲,伊「无法度代替上帝」作结束为止,其中所串做伙ê,竟然lóng是人犯罪ê记录,mā说明人性命苦难ê原因。

Chit段经文描述人怎样tī奸巧ê蛇ê诱惑下,做违背上帝旨意ê事。

第1节,蛇是万物中siōng「奸巧」ê,chit-ê词mā有另外一个意思是「赤身露体」。如果是相亲相疼,就是「赤身露体」,是ân-ân地贴做伙。M̄-koh如果「心怀鬼胎」,he就是「奸巧」ê意思,是有含「故意扭曲」ê意思。Chia蛇就是故意扭曲上帝,thang食ê果子lóng m̄提,á故意讲做「园á内任何果子树ê果子」。

第2到3节,cha-bó͘人陷入蛇ê陷阱,就是kah它对话。

第4到5节,chit两节是kui个故事ê中心。蛇否定了上帝ê命令――bē死。并且提出只要人食了hit-ê分辨善恶ê果子后,就会「亲像上帝」,这是相当有诱惑力ê一句话。

第6到7节,cha-bó͘人听蛇诱惑,果然伸手摘落来绝对bē-tàng食ê辨别善恶ê果子来食,然后koh kā它交hō͘丈夫食。结果,果然无死,chit点tú亲像蛇所讲ê,m̄-koh却因为án-ne开了目睭,看见家己无穿衫,「赤身露体」,只好the̍h无花果树叶来遮身,表示见笑。

第8到10节,虽然是hit尾蛇所讲ê chiâⁿ实无死,ē-sái讲是另外一种「死」却出现,he就是kah上帝ê关系断裂à。In开始逃避上帝,闪躲上帝ê来临。因为惊惶,这是死亡ê另外一种记号。犯罪者共同ê态度,就是惊tú-tio̍h上帝。Chit对夫妻躲避上帝ê方法,就是用掩遮ê方式,隔离kah上帝ê关系。M̄-koh上帝开始来chhōe人,并且发出询问「你tī tó位」,希望ē-tàng唤醒人ê心。

第11到13节,讲出人犯罪了后ê具体行为反应:推诿责任。Chia cha-po͘人讲是cha-bó͘人诱惑伊;cha-bó͘人讲是蛇诱惑伊。M̄-koh无论án怎讲,lóng逃bē过上帝ê审问。


重新查询 专卷研经 创世记系列
错误回报,请联系comm[@]fhl.net