Chit段经文thang看tio̍h一件事实：欺骗所得tio̍h ê，无一定是上帝ê祝福，颠倒，所带来ê是beh付出koh khah chē ê代价。Tùi雅各身上所看tio̍h ê就是真好ê例。chit-má chit章开始ê逃走，以及以后伊tī丈人拉班厝内受tio̍h ê欺负、剥削等等ê生活经历，到处lóng teh说明伊性命大部分时间是活tī无安全感中，而且一再受欺骗ê生活中。M̄-nā hō͘伊所óa靠ê 阿舅，mā是伊ê丈人拉班所欺骗，晚年iáu hō͘家己ê kiáⁿ欺骗等等，chiah-ê lóng是真好ê教示。

Koh讲，咱看tio̍h圣经作者á是编者一个非常好ê所在，就是一再kā人性上ê缺点暴露出来，所beh表明ê一个重要信息：无一个完美ê人。只要是人，lóng有缺点，即使亲像亚伯拉罕、雅各等chit种伟大族长mā是仝款，有人ê软弱。上帝m̄是beh拣选一个完美ê人，却是拣选一个人来成做他拯救世人ê器皿。用chit-ê角度看拣选ê意义就会比较容易明白做基督徒受拣选，m̄是因为基督徒比别人khah好，却是因为上帝beh透过基督徒kah教会来完成他拯救ê计画。

第廿八章开始进入绍介第三位族长雅各ê历史。主要资料是「祭司文献」，tùi第廿七章46节起到廿八章9节。然后是「以罗伊文献」ê作品，有第11到12节、17到18节、20到22节。Iáu有古老ê「耶和华文献」ê作品，包括有第10节、13 到16节、19节。

如果小khóa注意一下就会发觉「祭司文献」作品显然对tī雅各kah老母利百加合作欺骗以撒ê事件并无清楚，á是讲忽略à。因为án-ne，伊tī记述雅各到阿舅拉班hia娶bó͘ ê事，kah第廿七章所描写ê理由完全无仝。Ko̍h kā以撒无欢喜以扫ê事件看做kah娶迦南cha-bó͘人做bó͘有关。Á第9节ē-tàng看出以扫是一个真会体贴老父感受ê gín-á。

第46节thang kah第廿六章34到35节连起来看，lóng teh说明以色列人民kah迦南cha-bó͘-gín-á之间ê bē合，kah以色列人民弃sak上帝去拜巴力神明ê背景有密切关系。

第廿八章1到4节，这是用撒叫雅各去外公彼土利ê厝娶bó͘，ná亲像亚伯拉罕ài老奴仆tńg去哈兰kā以撒娶bó͘ ê事件仝款。「mài kah迦南cha-bó͘-gín-á结婚」，这说明雅各tio̍h离开老父ê厝，kah第廿七章41到45节所记载ê理由完全无相仝。

第3节，以撒祝福雅各tī chit件婚姻ê事顶面有美好ê结果，ē-tàng得tio̍h上帝ê赐福来「生湠chē-chē，作真chē民族ê祖先」，chiah-lóng teh表明以撒祝福雅各有充分ê性命力。

第4到5节，整节ê中心思想，就是kā亚伯拉罕tùi上帝ê赐福传承到雅各身上。这表明雅各就是亚伯拉罕chit-ê家族kah kiáⁿ孙ê传承者，m̄是大kiáⁿ以扫。这mā说明传承家族ê，并无一定是大kiáⁿ。雅各是第二kiáⁿ，虽然是欺骗得tio̍h大kiáⁿ名份，m̄-koh真正拣选kah大kiáⁿ名份并无直接关系。