Chit段经文thang讲tī创世记中占有真重要ê地位。Chit段经文mā是传统上所讲ê「雅各天梯」ê经文，主要ê内容是beh说明为甚么tī以色列人民ê心目中「伯特利」占有非常重要ê地位（参考士师记二十：18，列王记上十二：25—33）ê原因。

Tī chit段经文中mā是teh说明上帝kah人之间并无距离，却是上帝一直kah他所拣选ê子民同在。当雅各teh「逃走」ê途中，上帝并无弃sak伊，mā无bē记得伊，却是无论伊行到tó位，上帝就跟tòe伊到hia。
第10到11节，雅各照老父以撒ê吩咐，出发去阿舅拉班ê厝。Tī旅途中伊困去。

第12到14节，雅各「梦见」天使kah上帝，chit种透过「梦」kah上帝相会ê写法，tú好是「以罗伊文献」ê特色，说明上帝无koh直接kah人面对面，却是透过「梦」来启示人明白他ê旨意。第13节koh一pái说明上帝直接对雅各说明他ê应允，á chit-ê应允mā是上帝hō͘亚伯拉罕kah以撒ê应允。这说明雅各就是亚伯拉罕、以撒ê传承者。

第15节，chit节说明上帝拣选雅各，必定会保护伊。上帝并且强调一定会实现他对雅各ê应允。

第16到17节，雅各第一pái经历到上帝竟然陪伊行到chit-ê伊歇困ê所在。因为án-ne，伊讲hi̍t 所在是「上帝ê殿」。这就是后来伯特利成做圣地ê原因。

第18到22节，雅各用石头作记号，并且向上帝献祭、下愿，伊下愿了四种内容：一是上帝kah伊同在；二是tī旅途中保护伊；三是hō͘伊生活上ê需要无缺乏；四是带领伊平安tńg来到故乡。果若án-ne，伊就beh用上帝赐hō͘伊ê「十分之一」献hō͘上帝。