「基拉耳」，这是设tī非利士人ê境内，大概就在地中海岸边ê迦萨城kah别示巴之间。这附近地区ê人对亚伯拉罕并无生份，因为tī第十二章9节、第十三章1节等等lóng有提起亚伯拉罕行到「迦南南部」ê所在。

第2节，chit节是为tio̍h第3到13节之间ê对话chhōe切入口。亚伯拉罕会kā家己ê bó͘讲做小妹，其实这mā是早期游牧民族来到一个新ê所在，保护家己家族成员ê一种方式，mā m̄是每pái lóng需要án-ne，却是tú-tio̍h地主á是强势者出现时，普遍采用ê一种方法。

第3到5节，chit段经文说明亚比米勒并m̄是故意，á是tùi亚伯拉罕手中强夺伊bó͘撒拉。Koh讲，chia讲上帝tī「梦」中出现对亚比米勒讲话，这tú好是「以」典资料ê特色，说明上帝会透过天使、梦、异象等向人启示他ê旨意。Á无亲像「耶」典上帝是直接kah人面对面讲话。

亚比米勒真清楚向上帝表明家己ê「无辜」，mā同时确信上帝绝对bē hō͘无辜ê受tio̍h惩罚。

第6到7节，上帝是无所不知ê神，他当然清楚甚么人是有意á是无辜。上帝回应亚比米勒ê担忧，mā hō͘伊知影上帝确实知影伊是无辜ê，因为án-ne chiah出现阻止chit件事。

第7节是真特别ê一节，mā是第一pái提起亚伯拉罕是「先知」，mā说明先知会替上帝ê子民祈祷（参考耶利米书七：16、十一：14、十四：11、三十七：3）。上帝严厉警告亚比米勒一定tio̍h随时kā撒拉还hō͘亚伯拉罕，若无，会带来严重ê后果。