创世记 18章20节 到 18章33节   背景资料  上一笔  下一笔
这是一段顶港有名声下港有出名ê故事,说明亚伯拉罕kah上帝商量讨论有关beh惩罚所多玛城、焚毁hit-ê城ê事。

第21节讲上帝beh「落去看māi」,意思是teh指上帝已经清楚知影hit-ê城ê实况,chit-má是beh落去进行惩罚ê工作。M̄-koh tī惩罚chìn前,他beh koh等待看māi hit-ê城是m̄是有悔改ê现象出现。

亚伯拉罕掠tiâu chit-ê机会,提出一个重要ê问题:公义ê上帝,是m̄是不分无辜êkah有罪ê人?圣经作者一再表示:上帝bē kā无辜êmā列入惩罚对象。圣经作者甚至讲上帝siōng讨厌有权势ê人,杀害无辜ê,流无辜ê血,上帝一定会追究(参考列王记下廿四:4)。

上帝ê回答非常清楚,是一定分别清楚。因为án-ne亚伯拉罕就一再恳求上帝kā hit-ê城「无辜ê人」hō͘ in放宽,下修制限ê数目,上帝mā照亚伯拉罕ê意思放宽à。

Chia所讲ê「无辜ê人」,若以「知影悔改ê人」ê意思来了解会比较khah正确些。基本上,hit-ê城是已经无所讲ê「好人」了,特别是创世记作者bat用chit种笔调描述人类ê行为景况:「上主看tio̍h 人tī 地上,罪恶真大,心内所想ê 念头ta̍k 日lóng 是pháiⁿ ê。」「我无beh koh因为人ê 缘故咒诅地,因为人tùi 细汉ê时,心所想ê 就是pháiⁿ。(全民版)」(创世记六:5、八:21b)。因为án-ne,无辜ê意思,若用「知影悔改」是比较接近原来ê意思。Ná亲像约拿书所beh表达ê意思仝款,只有悔改chiah ē-tàng挽回上帝ê受气。先知以西结mā提出仝款ê看法(参考以西结书三十三:11)。

第26到32节,tī chit段经文中,thang清楚看tio̍h亚伯拉罕是tùi「五十」、「四十五」、「四十」、「三十」、「二十」、「十」等数目kah上主讨论,而且制限渐渐减少。Á chiah-ê数目lóng kah「五」ê倍数有关。另外一方面,提出chiah-ê数目的主要含意是:一个公义、慈悲ê上帝,kám真正会tī有无辜êkhiā起hit内面á毁灭kui座城市?答案是:绝对bē!

此外,chit段经文mā thang看tio̍h,上帝beh惩罚犯罪ê对象,并m̄是无缘无故,却是经过详细调查,而且亲临访视chiah做出决定。这mā是「耶」典ê作者一再beh表达ê信息。

重新查询 专卷研经 创世记系列
错误回报,请联系comm[@]fhl.net