历代志下第三十六章22到23节有记载，波斯皇帝塞鲁士命令，beh hō͘以色列人民tńg来到耶路撒冷去，伊并且beh为以色列人民建造一座殿宇。Á以斯拉记第一章开始就写tio̍h：「当波斯王古列元年，因为beh 应验上主托耶利米所讲ê 话，上主就激动波斯王古列 ê 心，hō͘ 伊宣布 tī 全国。(全民版)」án-ne看起来，以斯拉记thang讲是历代志经册ê续篇，是记载有关以色列人民回乡，以及in重新tńg来到以耶路撒冷为宗教信仰中心，kah in ê信仰生活之情形。

重新tńg去故乡巴勒斯坦了后，in kā它改称做「犹大」，并m̄是只有犹大支族ê人，却是全体以色列民族。M̄-koh因为早tī主前721年，北国以色列被亚述帝国消灭，北部支族ê以色列人民大多数受卖到各地去做奴隶，人口大量减少。Á南国犹大是tī主前586年被巴比伦帝国hō͘消灭，m̄-koh南国ê以色列人民是hông集体掠到巴比伦去做奴隶，in是生活tī类似集中营ê迦巴鲁河边地区（参考以西结书一：1）。因为án-ne，当ē-tàng tńg去故乡ê时，绝大多数ê人lóng是犹大支族，其他支族ê人已经是零零san-san无chē。因为án-ne，tùi巴比伦tńg去故乡ê人，后来就lóng hông称做犹大人á是犹太人）。

第1节，chit节讲「波斯皇帝塞鲁士登基ê第一年」，就是tī主前538年，mā就是伊ê军队tī主前539年10月攻落巴比伦后，取代巴比伦统治巴勒斯坦。Án-ne，亚述帝国之内mā有bē少以色列人民当年被俘掳后，就khiā起tī亚述统治区之内，taⁿ mā lóng tī巴比伦帝国统治之下。

塞鲁士皇帝统治波斯ê时间是主前559到530年，mā是创立波斯王朝ê第一位皇帝。伊ē-sái讲是以色列民族被外族统治ê时代，siōng好款待以色列民族ê统治者。Mā因为án-ne，连先知以赛亚lóng称伊为上帝ê奴仆，beh替上帝「牧养」子民，并且「执行旨意」（参考以赛亚书四十四：28），甚至认为塞鲁士就是上帝所膏立ê君王（参考以赛亚书四十五：1）。伊ê出现，早tī先知耶利米ê预言中，讲以色列民族kā tī巴比伦经过「七十年」ê奴隶生活，然后上帝会消灭巴比伦chit-ê国家（参考耶利米书廿五：12—14）。Tùi chit章mā thang看出，kui个历史改变ê背后，lóng有上帝ê手teh主导tio̍h。他带领顺服他旨意ê子民行过siōng艰辛ê路途，同时，mā惩罚hiah-ê弃sak他ê子民。

第2到4节，chit段经文是有关波斯皇帝所下ê诏书ê内容，kah第六章2到5节所记载ê无仝。其实这是两种无仝ê文字；前者是用以色列人民被俘虏到巴比伦时代所用ê希伯来文写ê，后者是用in ê母语亚兰文写做ê，而且留落来存为官方档案资料ê路用。主要内容是关系重建耶路撒冷圣殿，hō͘伊成做敬拜ê所在。

    Tī chit份诏书中，siōng特别ê所在是塞鲁士皇帝mā承认耶和华上帝是伊ê上帝，对伊启示应该做ê事，就是beh差遣塞鲁士皇帝帮助以色列人民tńg去故乡，重建荒废ê家园，并且重建敬拜上帝ê圣殿。Koh讲，chit份诏书mā提起ài波斯ê子民：「如果tī流亡ê子民中，有需要帮助chiah ē-tàng tńg去ê，厝边会帮助in，hō͘ in金银、物件、cheng-seⁿ，mā tio̍h为耶路撒冷ê上帝圣殿献上自愿祭。」这ná亲像当年摩西带领以色列人民tio̍h离开埃及ê时，摩西tio̍h以色列人民「向埃及人索取金银首饰kah衫裤」，用chit种方式「以色列人带走了埃及人ê财富」（参考出埃及记十二：35—36）。这表明一个真重要ê隐喻：以色列人民m̄是奴隶。因为奴隶无法度带走任何物件。In是有尊严ê族群，因为án-ne，离开ê时是富足ê，m̄是空手tńg去。	

第5到6节，讲tio̍h m̄-nā皇帝塞鲁士好款待in，因为án-ne，伊ê波斯人民mā听从皇帝塞鲁士ê命令，好款待以色列人民，纷纷the̍h「值钱ê礼物hō͘ in，另外iáu有自愿为圣殿奉献ê礼物」。

不过，tī祖先出埃及ê时，in是用「索取」ê方式，mā就是讲因为有大灾难发生tī埃及，埃及人并m̄是心甘情愿地主动the̍h出来hō͘ in。会án-ne hō͘以色列人民，为tio̍h是beh ài in赶紧离开埃及，免得继续带来灾祸。M̄-koh chit-má ê波斯人是自愿地帮助出钱、出力帮助in重回家乡。第5节chia特别提起犹大kah便雅悯ê族长，是因为chit两个支族是南国犹大ê人民。可能北方ê以色列人民已经hō͘ in寄居地ê人同化得真严重，因为án-ne，谈论「以色列」chit-ê名词kah-ná有jú来jú遥远ê感觉。另外一方面，犹大乃是以色列十二支族中siōng大族，人口siōng chē，而且早已经kā西缅支族ê人并入其中，而且集体被巴比伦掠去khiā起tī集中营区中，因为án-ne，当波斯取代巴比伦ê时，就直接以「犹大」teh代表全部以色列民族。

「祭司kah利未人」，in就是专门teh负责耶路撒冷圣殿祭祀礼仪工作ê宗教师。chit-má波斯皇帝塞鲁士讲beh帮助in回乡重建耶路撒冷圣殿，因为án-ne，in mā tī第一批回乡浪潮中，而这第一批ê行动，真可能就是tī主前537年7月开始（参考三：1）。

第7到8节，chit两节thang参考列王记下第廿四章13节、第廿五章13到17节、以及历代志下第三十六章10节、第三十六章18节等等经文lóng有记载讲，巴比伦军队攻入耶路撒冷ê时，洗劫了圣殿真chē贵重ê器具。In带走chiah-ê圣殿器物，主要就是带tńg来khǹg tī巴比伦人ê神庙中，供俸hō͘ in所崇拜ê神明，表示in ê神phah败以色列人民ê上帝ê意思。M̄-koh chit-má，波斯皇帝塞鲁士消灭巴比伦帝国了后，决定释放以色列人民回乡tńg去重建家园kah圣殿，伊就kā chiah-ê掳自耶路撒冷圣殿ê贵重器物，全部lóng the̍h hō͘ chiah-ê准备回乡tńg去ê犹大人民。为tio̍h beh表示真诚心意，塞鲁士iáu特别派皇家财政大臣米提利达，由伊亲自kā所有ê圣殿物件lóng点交hō͘「犹大省长设巴萨」带tńg来到耶路撒冷。「设巴萨」chit-ê名是波斯名，是塞鲁士皇帝所任命ê犹大省省长（参考五：14）。

第9到11节，这是一份简单ê清单，说明所有圣殿贵重ê器物共计有「五千四百件」，设巴萨kā chiah-ê器皿lóng带tńg来到耶路撒冷。