以西结书 7章15节 到 7章27节   背景资料  上一笔  下一笔
Chit段经文讲述当敌人来攻击ê时,发生tī耶路撒冷城内ê景象,是悲惨ê,因为in过去所膜拜、尊崇为神ê偶像神明,teh发生危机ê时,是连一点路用mā无。因为无任何力量ē-tàng抵抗上帝决定ê惩罚。Ná亲像头前经文一再提起ê「终局」来到仝款,上帝决定beh án-ne做,因为只有án-ne chiah hō͘犹大人民确实知影甚么人是真正神。

第15节,chit节koh一pái看tio̍h「战争」、「瘟疫饥荒」,chiah-ê lóng是上帝用来惩罚他ê子民ê方法。Tī第14节讲无人出去相战,后来逼得一定tio̍h phah开城门出去迎战ê时,mā是仝款,一点功用mā无,因为出门去相战ê人,lóng会「死tī刀下」,而城内ê人并无比较khah好字运,因为有瘟疫致使「病死」,因缺粮严重而活活「饿死」。

第16到20节,描述面临chit种重大灾祸来临ê时,hiah-ê人反应出来ê迹象,包括有ná亲像受tio̍h惊惶ê粉鸟;脚手lóng发软无力;穿麻衣为死去ê亲人哀伤;剃光头表示tú-tio̍h侮辱;原本看做贵重而且穷毕生之力teh追求ê金银财宝mā会弃sak扔tī街路任人去拾,因为拥有chiah-ê无法度解决iau饿,况而且chiah-ê金银珠宝是诱惑in弃sak上帝chiah致使taⁿ ê结果。先知以西结用chit种方式teh描述:当人弃sak上帝,去拜偶像神明ê时,过去拥有ê一切荣华富贵lóng会变成相对ê结果,就是一贫如洗,而且是见笑到极点。 

第21到22节,上帝惩罚以色列子民ê方式,就是hō͘「外国人抢夺in」,洗劫in所有ê一切贵重物件,甚至上帝mā会允准chiah-ê敌人进入原本用来敬拜上帝ê神圣圣殿,因为tī敌人尚且无进入耶路撒冷前,上帝ê子民犹大人民,已经tī圣殿内置放偶像神明teh崇拜了,in已经比敌人koh khah早就侮辱了上帝ê神圣à。因为án-ne,hō͘敌人进入玷污圣殿,mā等于是teh玷污hiah-ê置khǹg tī圣殿中ê偶像神明。

第23到24节,上帝hō͘「siōng凶恶ê民族」(指巴比伦人ê强猛,kah暴力之重非常厉害)进入城内,进行残暴ê行为,连犹大人民看做「siōng强猛ê勇士」,(这是teh指过去专门teh欺负家己人民ê hiah-ê有权势ê人),见tio̍h chiah-ê外族人来入侵,mā会失去「勇气」,因为in kan-taⁿ会欺负家己弱小ê同胞,遇tio̍h强敌入侵是lóng无能力去抵抗。

第25节,「绝望ê时chūn到à」,这是kah头前所讲ê「终局」仝款ê意思。

「chhōe求和平」,表示想用金钱换取敌人撤军,已经无可能。Chia「和平」一词,表示「平安」ê意思。

第26节,提起「先知」、「祭司」、「长老」等,chiah-ê lóng是当时以色列民族ê社会菁英、领袖。In应该是维护社会安定kah导正社会秩序ê领导者,m̄-koh in并无án-ne,颠倒ê,ná亲像耶利米书第二章8节所提起ê,先知kah祭司lóng bē记得上帝,这就thang看出问题ê严重性。因为án-ne,「灾难接踵而来;pháiⁿ消息接连不断来传过来」,其实是一点mā不足为奇。

第27节,讲出上帝是报应ê神,以色列社会中强势者怎样欺负弱势者,上帝mā kā用in欺负人ê方式回报in。

重新查询 专卷研经 以西结书系列
错误回报,请联系comm[@]fhl.net